WAROMA 8
8
1Kyasia ili kii kido wulalu kwiho oseso lohoya walya wai Kristo-hu Yesu-pfo. 2Kyamba wuwawaso-wu wo Mumuyo moende moo fukeri Kristo-hu Yesu, nyiwo wulenjiletsa na wuwawaso wulya woende wunyamaṟi na opfu. 3Kilya wunyamaṟi wulaweidima ili wuwei-wufafaṟe wudi nyi nyama, nyio Ruwa alekiwuta. Kechiduma Mana-chu oke amonyi, awa mfano fo nyama chaso tsirie wunyamaṟi, na kitewe alemduma na kya wunyamaṟi, kawonya wunyamaṟi-wu wukuwode ipfo nyamehu owingo. 4Kiwehendekye kido kundu chile tsa wuwawaso tsishike yawutsyo nyiso lulekechumia mchumie fui-mhendeshe nyi nyama tsa mndu o wandu, indi luichumia mchumie kui pfinya ya Mumuyo. 5Kyamba iwa wai wa mbuka ya nyama wo wekyechilio nyi shii sha nyama tso, indi iwa wai wa mbuka ya Mumuyo, wo wekyechilio nyi shii sha wai wa mbuka ya Mumuyo, wo wekehia shii sha Mumuyo. 6Kyamba shilya nyama-tso tsekekuelengya, nyi shiduo opfunyi, indi shilya Mumuyo fokekuelengya sho shiwika moo na ofoṟo. 7Kipfa shilya nyama-tso tsekekuelengya shiende kituwa na Ruwa kyamba tsilaindye wuwawaso wo Ruwa madu, manya tsilaidima iwuta tsido. 8Indi iwo wakukerye-ho mkao ya nyama waidima ichihiana na Ruwapfo.
9Indi nyo mukeri wa mkao fo nyamapfo kya indi mukeri wa mkao fo Mumuyo, komkoya Mumuyo o Ruwa aikukaya konu ketsinda nanyo. Mndu alai na Mumuyo o Kristo ichu chi o Kristo-pfo. 10Indi komkoya Kristo akuwode nanyo, mbihu-i yanu yechipfa kipfa kya wunyamaṟi, indi Mumuyo fui moo fuimbike ipfo konu kundo momtano wahoṟotsu. 11 Indi komkooya Mumuyo o ichu aleṟutsa Yesu wapfunyi aikukaya konu ketsinda nanyo, mṟutsi-chu aṟutsye Yesu Kristo wapfunyi nechimtana na mbihu yanu ii mfari-moo, iwe meny-moo kipfa kya Mumuyo-cho oke ai kiidi kyanu.
12Ili kii kido wanawawama nyi lukeri welya sile, indi sile tso tsilakeri tsa nyama tsadu, luwechikapya moo luiwaitike nyitso. 13Kyamba kokooya mokapya moo mui-waitike nyi nyama tsanu mokunda ipfa. Indi komkoya mowaha mbutie ya nyama tsanu njiwicho mui-waitike nyi Mumuyo nyi mochiwada moo. 14Kyamba iwa wose wadao nyi Mumuyo o Ruwa nyiwo wai wana wa Ruwa. 15 Kyamba nyi mulaleambya Mumuyo fo wusinga foamtsa-se lingi wuowu chi wudopfo, kya indi nyi muleambya Mumuyo o wuwana moluenenga ilaha; hoi Aba, hoi Wande. 16Nao Mumuyo-cho nyi akusanzye na mumuyo-fu fodu kya iṟingishya ke nyi lui wana wa Ruwa. 17Indi kyamba so lukeri wana wa Ruwa nyi lui na waoṟi luchiambia mboṟa tsa Ruwa; lukamba waoṟi nyi lui na waoṟi weoṟa hamu na Kristo kiwe lohenda ikisokiso nao kundu lushike iwiko na wuitoṟinyi wumu nao.
Kiṟumi kyechicha
18Kyamba ngahamba mawawiyo ha ki-wulalu halaṟingananyi na wuitoṟi wulya lochikaa luwutambaṟuyo. 19Cha kipfa mweṟeṟukye fo mbika ii fuwedye mnu ke wana-wa wa Ruwa washike ihenda itambaṟuka. 20 Kyamba mbika-ii indambikye masionyi chi kipfa iwekundi ihendeke idipfo, kya indi nyi kipfa kya Ruwa ichu moidambika-ho. Iwewa kya owedi. 21Cha kipfa na shiwumbe shi shechikaa shihende yashuo wusingawu wo mkae yepuo ishike ikoya mkuachie fo wuitoṟi-wu wana wa Ruwa wawode. 22Kyamba luichi ke shiwumbe shi shose shikeri itsika shiwodo nyi kinangananga shika wulalu cha ha okoki a. 23 Manya chi shiwumbe shi tupupfo, kya indi naso luwenyi lui na Mumuyo chu, ili luwode mbetesa iya ya Ruwa lutano wana ipfo matalayonyi ha mbihu fodu. 24Kyamba ikiṟo nyi lomekiṟo kya owedi. Indi kyeweda kikamboneka iweda lyahenda isia; kyamba mndu kindo kilya akiwonyi nyi akiweda-se ki? 25Indi lukamba mowedya ikyo lulawonyi nyi lokiwedya lochikutirisia. 26Na wudo na Mumuyo akeri iludaṟa keluwikya ngaya hando lufafaa; kyamba so lulaichi chandu kiluwaṟi iterewa chando kiwuṟie isumhantso, kya indi Mumuyo amonyi ailuikayaho na masumukyo halechiwa ihamba. 27Indi msa motichya ngoo tsa wandu nyio sa aichi chuṟe tsa Mumuyo ai moterewya wandu wa Ruwa akundi. 28Na luichi kya shindo shose Ruwa nekeṟunda hamu na walya, wamkundi na iwaonyisha wucha wose, nawo nyiwo wai-walahe kui kyama kilya kyake. 29Kitewe nyi kipfa iwo alesonguo iwamanya kawesonguo na iwasambuṟa wawe wefanana na mfananye fo Mana-chu oke, kundu o nawe wawae o wana wa wee limu wafoi. 30Na iwo alesonguo iwasambuṟa nyiwo alewalaha, na iwo o nyiwo alewatana wahoṟotsu; oshangunyi loke; indi iwo alemaa iwatana wahoṟotsu wadi nawo nyiwo alewasumba wuitoṟi.
Ikunda lya Ruwa kiidi kya Kristo Yesu
31Aka luhambe-se luda kya iki? Komkoya Ruwa ailuikaya aka ichu alufoye nyi wu? 32Ruwa Amda alanunya ma Mana-chu oke kimumu mfi katana amdambika kipfa kyadu so lose, nyi wuda echida alaluinenga shicha shose, nalusumbe nasho ngesa? 33Ichu echianduya iwa wai-wasambuṟe nyi Ruwa nyi wu? Ruwa aiho awa mletsi! 34Ichu echihutsya owingo nyi wu? Kwipfo-pfo? Kristo Yesu aiho, nyio sa alepfa na kya ngoseṟa nyi aleṟutso, awuka ko wapfu, o akukerye ipfo ko kulyo ko Ruwa Kawa moluterewya-ho so! 35Ichu echiluletsana na ikunda lya Kristo nyi wu ngesa? Ngesa kiwe nyi shiwira ang'u ikisokiso, ang'u iterengyo, ang'u nyi njaa ang'u nyi iwuṟa nguo, ang'u nyi ndenga; ang'u ifunyo oshu? 36 Kihendekye chando kii-kiṟehye, “Nyi kitewe kyapfo loanga mowoho taṟaraa puti; lukatano cha ili lui machondi heshinja.” 37Kya indi kya shindo sho kose shindo-shi shiluwode nyi lokia-ho lui wawinzi lukuwawie na ichu alukundi adi. 38Kyamba njikusihye ke ma opfu ma moo ma wamalaika ma waitoṟi ma isho shiiho wulalu ma isho shekaa shiwe ili numa ma maapfinya mawe. 39Ma kilya kikuilikishye ngine-hu ma kilya kisokie ipfo shi ma mbika ingi njiwe shilechiidima iluletsana na mkundana fo Ruwa alukundi nafo furianyi na Kristo Yesu Mndumii odu.
Ruwa na mkambo foke msambuṟe
Currently Selected:
WAROMA 8: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
