WAROMA 6
6
1Aka luihamba luda ngesa? Lukaae lochiwuta kya wunyamaṟi, kundu wotonga wushike ifo ko? O, manyale. 2So lukamaa iwiia wunyamaṟi wapfu, nyi wuda luwuye-se ikaa nawo lingi ngesa? 3Ang'u mokaa mulaichi ke so ili luiwapatisye Kristo Yesu nyi lui wapatisye opfu loke? 4 Kikawa kido nyi lui-waṟike kimu nao opfunyi kulya kui wupatiso kundu chando Kristo aleweṟutso wapfunyi kui wuitoṟi wo Wande na wudo so lukae-ho lochihendekya luirie moo mhya.
5Kyamba kokoya lomehenda ilungyo kila kya opfu lulya loke, na kya iṟuka lyake na lochihenda ikilungyo. 6Kilya lukiichi kikeri kiile; ke wumndu wodu lui-wawike nawo, wo womaa ihenda ikapyo msalabe-hu kimu nao kundu mbihu-fu fuichiwie inyamaṟa fudi fuhende irumara so lulakisingye-se wunyamaṟi. 7Kyamba alyando mndu o wandu amhenda ipfa nyi aimdumbwo mwaanya fonyamaṟa. 8Indi kokoya lomhenda ipfa kimu na Kristo nyi luidikie ke lochikaa nao. 9Nyi luichi ke Kristo alemeṟutso wapfunyi ekifasepfo, opfu lokimwidimasepfo. 10Kyamba kilya alepfa kyakyo nyi alepfa kya wunyamaṟi ili limu lyedumbwo teṟe, indi iki kimbode ili ai-ho na moo nyi kii-le; ke nyi ai mopfuṟukanya nafo Ruwa. 11Nanyo na wudo kewekuitalenyi mui wandu wawewiia wunyamaṟi wapfu, na moo muwode nyi mukuwodye nafo Kristo-hu Yesu mochipfuṟukanya nafo Ruwa.
12Ko ikyo mulalekie wunyamaṟi wuchilie mbihu yanu yechikaa ipfe muwechiidikyana na lango tsafo. 13Ma mulawone mochidambikya wunyamaṟi shiwungo shanu shiwe shihia sha wukika, kya indi kudambikenyi nyo muwenyi Ruwa cha wandu warie moo waweṟukie nafo wapfunyi, na shiwungo shanu shiwiie Ruwa shihia sha wuhoṟotsu. 14Kyamba wunyamaṟi wulechimwidimase, kyamba mulai shi ya wuwawaso kya indi nyi mukeri shi ya wutonga.
Chando kiwaṟi iwa wahendeli
15Alewo kiwukye-ho nyi ki? Ke luwute kya wunyamaṟi kipfa ili lulai shi ya wuwawaso kya indi lukakaa shi ya wutonga? O, chi wudopfo. 16Aka mulaichi ke ichu mochikumdambikya cha masinga kyemwanguya madu nao nyio mombia masinga hake mochimwanguya madu kiwe kya wunyamaṟi woduo opfunyi kiwe kya wuidiki woende wuhoṟotsu oshangunyi lo Ruwa. 17Indi Ruwa nawikyo mwaano kipfa muwesia ikaa masinga ha wunyamaṟi mukashika yanguya madu mateteṟa-chu mompfunda muiwadambikye koke mukuwode-ho na mrima msanze. 18Indi mlewuto wusingenyi wo wunyamaṟi nyi musingye wuhoṟotsu wu. 19Ngadeda njidi kiwandu kipfa mofafaa kui nyama tsanu;) Kyamba chando muwewedambikie shiwungo shanu shiwe shesingya ngafu na wukika wofeṟya-ho wukika, nyi wudo muwe mochidambikya shiwungo shanu wulalu shiwe shechisingya wuhoṟotsu-wu wuduo kiilishyonyi.
20Kyamba ilindi muwei masinga ha wunyamaṟi mandi-ha muwechi chandu kimuwaṟi iwa wahoṟotsu pfo. 21Nyi kiira kiki mulewona ho mandi halya? Chi kiwei kya mbaṟi imwinengye mopfia kyayo sonu wulalu? Cha kipfa kiira kyakyo nyi opfu. 22Indi wulalu ili momeletso na wunyamaṟi mukatano masinga ha Ruwa; nyi muwode-ng'u kiira wulalu kimwendie iilisho na kiheṟi kyefurumia nyi moo fo mlungana. 23Kyamba wueri wosingya wunyamaṟi nyi opfu, indi kilya Ruwa aisumba nakyo mndu oke nyi moo fo mlungana fukukerye Kristo-hu Yesu Mndumii odu.
Kiloshio kiwukanyi na walyi
Currently Selected:
WAROMA 6: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
