MARIKO 14
14
1 Kuwetsuheṟe mfiri iwi kushike mfiri fo Pasaka na fo Mkate Ilantarang'ashe. Wakohanyi wanene wasanganyi na walosha wa wuwawaso wakapfula, chando wechimbada na mtambo, wambahe. 2Indi walehamba, “Lulambade mfiri fu mnenepfo kuwone kochiduka kituṟu kya wandu.”
Yesu ashio mafuda Betanyia
(Mat 26:6-13; Yoh 12:1-8)
3 Kyasia Yesu nawekeri kulya Betanyia mba ko Simon ulya awewodo nyi iwawe. Adamye-ho kechilya shelya, kukacha mndu mka, umu arie chupa ya alabastron iwode mafuda hapfama ha nardo mecha ha wuhuru wung'anyi, kampusuya o mdonyi ko Yesu. 4Na kukakaa-ho wandu mata, walesuo wechikuwesa, “A mafuda ho hadetsyo hado wanda nyi ha ki? 5Hakawekumbo haweende dinari mahana haṟaṟu tseenenga wakiwa.” Wakafuluko wakapomya mka ulya.
6Kyaindi Yesu kawawia, “Kemlekenyi, nki ili muiwinyishawinyisha mka chu? Nyi kindo kicha anjiwutya. 7 Kipfa wandu wakiwa mui nawo mfiri yose, mkakunda na moidima iwawutya necha, kyaindi kyako inyi mokaa na inyi mfiri yosepfo. 8Nyi awuta, chando akuidimya; nyi asonguo ishimbwo mbihu foko ifuṟeheṟa fuhende iṟiko. 9Na kya lohi ngambia, Orio kundu kose komeongoyo Mbonyi tso Njiicha wuyaneny kose, na kyake anjiwutye napfondo kyehambo, kundu nakumbuo-pfo.”
Yuda aidikia itwaṟa Yesu
(Mat 26:14-16; Luk 22:3-6)
10Nao Yuda Iskariote ai umu o, walya ikumi na wawi kahenda ko wakohanyi wanene, kundo nadambike Yesu ipfo kowo. 11Wakohanyi wanene wekiicho wado wakachihio, wakamteṟya kyemenenga fesa. Yuda kawoka ipfula mfiri mcha fomdambika.
Yesu alya pasaka hamu na wa kiloshionyi kyake
(Mat 26:17-25; Luk 22:7-14,21-23; Yoh 13:21-30)
12Mfiri fo kuwoka fo mfiri iya yelya Mkate Ilantarang'ashe, kiheri kyeshinja huṟuwi lya Pasaka, wa kiloshyo kyake wakambesa, “Nyi ku ukundi luhende isungusia-ho, lukulie-ho Pasaka?”
13Yesu kaduma wa kiloshyonyi kyake wawi kawawia, “Kehendenyi ipfo mṟinyi na mokumbuhanana na mndu umu akudikye kinungu kya mṟinga muitumane nao. 14Na mba mochiwona aida-napfo muwie menyi mba, ke Mlosha akuwia wai, ‘Nyi kiṟiha kihya lochikulia-pfo Pasaka so na wa kiloshyonyi kyako?’ 15Nao echimloṟa kiṟiha king'anyi kya ipfo kai ki kyale nguwo ki kisungusie nyihondo mochilusungusia.”
16Wa kiloshyonyi wakakure wakahenda kulya mṟinyi, wakawona chando Yesu alewawia, wakasungusia mfuho fo Pasaka. 17Ili kyukanyi, Yesu kacha na wa kiloshyonyi kyake walya ikumi na wawi. 18 Wai kiliiyonyi Yesu kahamba, “Na kya lohi ngambia, umu onu-ho, ailya na inyi, echinjidambika.” 19Wa kiloshionyi kyake wakawoka isokyo nyi fowa na imbesa umu kui umu, “Ngesa nyi inyi?” 20Yesu kawawia, “Nyi umu onu nyo ikumi na wawi sa luikapa nao mkate kunu kitelenyi. 21Nyi lohi Manomndu ihenda nyi ahenda, chando Madedo Maele hamaṟehie kyake, kyaindi ochia lo mndu ulya, echidambika Manachu o Mndu! Kiwei kicha, okoe mnduchu alalefeo.”
Kilayo kya Mndumii
(Mat 26:26-30; Luk 22:14-20; 1Kor 11:23-25)
22Na ili wawelya shelya, Yesu kaira-ho mkate kaidapfuma Ruwa kafufunja, kawainengya wa kiloshionyi kyake kahamba, “Ngenyi ifu nyi mbihu foko.” 23Kawewada na kirahu kaana Ruwa kawainengya, wakanyoya-ho kirau kilya wose. 24 Kawawia, “Iki nyi samu yako iṟingishia mkundano fo Ruwa; samu ikeri ipusuo kipfa kya wandu wafoi. 25Nyi kya lohi ngambia, ‘Njechikinyo-se kya ndunda tsa msabibusepfo, na njitane ngashika mfiri fulya, ilindi njechinyoyaho wuhya ipfo Wumanginyi wo Ruwa.’” 26Wameimba, wakahenda kulya Fumvunyi lya shidi sha Mtsinepfu.
Yesu ahamba chandu Petro echimkana
(Mat 26:31-35; Luk 22:31-34; Yoh 13:36-38)
27 Yesu kawia wa kiloshionyi kyake, “Mochiendyo wusutsu nyi inyi mose, kipfa ki kiṟehye kirehio kiele, ‘Njechikapa mlisi na machondi hawerahanyika.’ 28 Kyaindi ngamidima iṟuka, njechimsongoya, kulya Galilaya.” 29Petro kambia, “Ma kokoya wose waendyo wusutsu na ilekana na iyo, inyi njechilekana na iyo ma ntapfo.” 30Yesu kambia, “Nyi kya lohi ngakuwia, inu kio ki, olong'onyi lulamekapa kawi ochinjikana kaṟaṟu.” 31Petro kaengeṟa ihamba, “Kiti njikukane na njipfe njisanzeo na iyo njechikuda-pfo.” Na wa kiloshionyi wakahamba wado wose.
Yesu aiterewa kulya Getisemane
(Mat 26:36-46; Luk 22:39-46)
32Wakashika kyungunyi kii kiiṟihye kilaho Getisemane, Yesu kawia wa kiloshyonyi kyake, “Kedamyenyi iya, ili njikeri iterewa.” 33Nao kahenda arianyi na Petro na Yakobo na Yohane, kawoka iwuko mnu nyi madima na ieṟewe. 34Kawawia, “Mrima foko fuwodo mnu nyi fowa, ngakiṟa ipfa. Kyekaenyi ya muwelaa dembo.” 35Katikira mbele kitutu kaho wanda katerewa, kokoya na kyechikuwiia saa yo ya maturo imwidye. 36Kahamba, “Wande oko, ipfo kopfo shindo shose shechiidimika. Njiwutawo kirahu ki kya maturo Indi kilawe chando njikundi inyi kiwe chando iyo ukundi.”
37Kacha kakoya wa kiloshionyi walya waṟaṟu walee mado. Kawia Petro, “Simon, nyi ulee mado? Oidima ilaa dembo ma saa imu?” 38Kawawawia, “Kelaenyi dembo mbeterewa, mlashike iida kiheshonyi. Ngoo yo yako nyi injiṟamtsu, kyaindi nyama tsikalehela.”
39Kawuya ihendase katerewa kechihamba madedo halya halya. 40Kawuya kakoya walee-se mado; kipfa meso hawo hai malemie mado. Walamanye kindo wemhaluo.
41Ili alewachea lya kaṟaṟu alewawia, “Nyi molaa mado na isia moo? Nahongu kyakushikya-ng'u, saa yamshika! Ambuya, Manomndu, aidambiko mawokonyi ha wanyamaṟi. 42Kurenyi luhende, Ambuyenyi monjidambika a ichu aicha.”
Yesu ashio mawokonyi
(Mat 26:47-56; Luk 22:47-53; Yoh 18:3-12)
43Yesu kekideda-se ado, nalyo liyenyi Yuda Iskariote nyio umu o walya ikumi na wawi, kacha arianyi na kituṟu kya wandu, warie njoshu na shiṟeta, wai wadume nyi wakohanyi wanene na walosha wa wuwawaso na wasongoru. 44Na Yuda mṟiingi ulya momdambika awewateṟye kichano, kehamba, “Ichu, njechimhekya momu nyio-ng'u; mumbade na imduo kiringonyi.”
45Adi Yuda kacha katikirya kufui na Yesu kambia, “Mlosha!” Kamhekia momu. 46Wandu walya wakamleshya mawoko wakawada Yesu. 47Umu o walya wahoṟoki-ho na Yesu, kasomuo oshu loke kakapa isinga lya mkohanyi mnene kamdumbuo kudu. 48Yesu kawawia, “Mowuka kanyi murie njoshu na shiṟeta mkacha injiwada, cha ili njii msoki? 49 Orio mkonu njiwekeri konu ipfo hekalunyi njichilosha-ho, mlanjiwade. Wulalu kiwaṟi Shiṟehiyo Shiele shiinukye.” 50Nahong'u wa kiloshionyi wakamda wakadicha wose. 51Kuwekeri-ho manake amwituma Yesu aṟee nguwo ya owiṟo alaṟee nguwo ya kya mba. Wakaheṟia imbada. 52Nao kasheṟuka kada-ho nguwo yo ya owiṟo kadicha ai kitaṟe.
Yesu ai osehu lo mengenyi ya wameku
(Mat 26:57-68; Luk 22:54-55,63-71; Yoh 18:13-14,19-24)
53Kyasia wakaduo Yesu kulya ko Mkohanyi Mnene, handu wakohanyi wanene na wasongoru na walosha wa wuwawaso wose wawesanzie. 54Petro kaitumana na Yesu, ai kuleshe, katana ashika alya osehu ko Mkohanyi ulya mnene kadamia-ho handu hamu na waringi kechioda modo. 55Nawo wakohanyi wanene na menge ya Sinedrio wose wakashihia Yesu owingo lo mbaha, walawone.
56Wandu wafoi wawekeri ihamba-ho njowingo tsa Yesu tsa wongo njowingo tsilya tsilasumhanane. 57Kukakure-pfo wandu wehamba owingo loke lo wongo wechihamba, 58 “Luleicho kechihamba, ‘Njechisanja hekalu lyo li liwike na mawoko ha wandu njiwike lingi ko mfiri iṟaṟu lilaliwike na mawoko.’” 59Ma ili walehamba-ho wado ma shilasumhane shose.
60Naho Mkohanyi Mnene kahoṟoka o makidi hawi kawesa Yesu, “A nyi kiili kulahamba ma shehaluo ishi sha wandu wa wahamba-ho shekuwinga?” 61Nao kakutsia sau, nalahaluo ma kindo. Mkohanyi Mnene kawuya imbesa-se kambia, “Iyo na ukeri Kristo, Mana o Ruwa ichu aidapfumo?” 62 Yesu kahamba, “Ee da inyi nyio. Nanyo mochiwona Manomndu adamye ipfo ora lo kulyo lo Menyi Pfinya, kechicha ipfo mapuchinyi ha ruwehu.” 63Mkohanyi Mnene karanduo kanzi yake kahamba, “Nyi kiki-se luipfula wehamba-ho shewinga? 64 Na momicho kirumo kyake kyeruma Ruwa. Mokusaṟa muda?” Wakamkumbya owingo wose, kindo kimsumhanyi na opfu. 65Kyasia maata ho wakawoka imiselya mnyeri wakamshikia kyamu wakamkapa ngofi wachimbia, “Kehamba malasha nyiu akukapa!” Na walya wapfuṟukanyi-ho wakamwambya, wechimkapa ngofi.
Petro akana yesu
(Mat 26:69-75; Luk 22:56-62; Yoh 18:15-18,25-27)
66Nahong'u Petro akeri-ho o seri osehu, kukacha mana o waka, akeri umu o shisinga sha Mkohanyi Mnene. 67Kawona Petro, kechioda modo, kamwambuya kambia, “Na iyo na kuwekeri na mndu cho Yesu o kulya Nasareti.” 68Nao Petro kakana, kechihamba, “Ma ngamemanya-pfo, ma njiichi kindo ohambapfo.” Petro kawuka-pfo, kahenda nja ya mbele. Olong'onyi lukakapa. 69Mana ulya o waka kisinga kawona-se Petro; kawoka-se lingi iwia walya wahoṟoki-ho, “Mndu-chu nyi umu o walya.” 70Petro kawuya ikana-se. Oweṟe kitutu walya wahoṟoki-ho wakawia Petro, “Nyi kya lohi ukeri umu o walya, kipfa ui Mgalilaya.”
71Nao Petro kawoka ikusesa na ilya nyamu ke, “Njiichi mndu chu mumhambapfo.” 72Nalyo lienyi olong'onyi lukakapa lya kawi. Petro kakumbuo idedo lilya, chando Yesu ambie, ke olongonyi lulamekapa kawi, ochinjikana kaṟaṟu. Petro katamuo-ho kalia mchenyeṟe.
Yesu ai oshangunyi lo Pilato
(Mat 27:1-2,11-14; Luk 23:1-5; Yoh 18:28-38)
Currently Selected:
MARIKO 14: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
