MARIKO 13
13
1Yesu kechiwuka ipfo hekalunyi, umu o wa kiloshyonyi kyake kambia, “Mlosha, ambuya maho ho ha mba tso chando hai ha kiṟiha!” 2Nao Yesu kambia, “Kuwonyi mba tso tsing'anyi? Manya kokaa kudeo-ho iho likuhekye huya iho lingi lide lilawundwohopfo.”
Mawookyonyi ha wukiwa na maturo
(Mat 24:3-14; Luk 21:7-19)
3Yesu adamie ipfo fumvu-hu lya shidi sha Mtsinepfu ai sumhana na Hekalu, Petro, Yakobo, Yohane na Andrea wakambesa kyanya, 4“Keluwie-wo, mbonyi tso nyi tsekaa tsiwe indii? Na kiṟingishyo, ki kii kechiloṟo ili isho shose shichikaa shiwe?”
5Nao Yesu kawoka iwawia, “Kyekuṟisenyi, mlawone mndu kyemlemba. 6Koekaa kuche sa wafoi, wache kui rina lyako, wahambe, kye, ‘Inyi nyio!’ Wadetse wandu wafoi. 7Mkaicho shida na mbonyi tsa shida, mlakangaṟike. Mbonyi-tso kiwaṟi tsiche, kyaindi masiyonyi hamecha-pfo. 8Kipfa mkambo fumu fochikapana na mkambo fungi, umangi wukapane na umangi wungi. Orio handu kochicha shiding'ashi na njaa. Mbonyi-tso nyi cha okooṟa lo mana aifeo.”
9 “Na mkuṟise muwenyi. Wandu wechimdambika mengenyi ya Synedrion na mochikapo ipfo ma sinagogenyi. Mochidao oshangunyi lo wachili na wamangi, kipfa kyako, kundu munjiṟingishie kowo. 10Indi kiwaṟi kuwoka Mbonyi tsa Sia tsiongoyo mbaṟinyi tsa wandu tsose. 11Nawo ili wechimduo wemdambike, mlawado makusaṟo chando mochideda, kyaindi nyi mochinengo kededa kiheri kyo kikamshika nyikyo mochihamba-ho, cha kipfa wededa-ho chi nyopfo nyi Mumuyo Mwele. 12Manomae o mndu nechitwaṟa mana o mae, na wana wa wandu waamkye wafee wawo na iwawaha. 13 Nanyo muwenyi mochisuika ko wandu wose kipfa kya rina lyako. Kyaindi ichu mokarishya-ho tane masiyonyi, nyio echikiṟo.”
Kiwi kya orumaro
(Mat 24:15-28; Luk 21:20-24)
14 “Mochiwona ‘Kiwi kya Orumatso’ kii alyando kilakundikie iwono.” (Ichu Mosoma namanye mdambuye!) “Nalyo iwo wai kunu Yudaya wahende dichya kulya mafumvuhu. 15 Na ichu echikoya ai ipfo mbehu, nalasoke-pfo, ma nalaide na mba koke ke ikuondoya-ho kindo. 16Na ichu ekoya ai demenyi nalawuye na numa, ihenda kuondoya nguwo tsake tsa huye. 17Ochia lo iwo wekoya nyi wakupfungye na iwo wekoya weonza mafiri ho! 18Keterewenyi, kundu mbonyi tso tsilawutike kiheri kya mbeo. 19 Nyi kipfa mfiri yo kochikaapfo wukiwa wung'anyi sa wulalemewoneke kiwokia mawokenyi ha shindo sho shi shiwumbe nyi Ruwa shika mandi ha wulalu. Ma ili numa wochikiwoneka-se wudopfo. 20Na mafiri ho nokoe Mndumii alawechihaanguṟa, kuwechikiṟo mndu ma umu-pfo. Kyaindi nyi kipfa kya walya wa wasambuṟe, nyi kyondo Mndumii aleanguṟa mfiri-yo.”
21“Nalyo mkakoya ma mndu kembia, ‘Kristo aichu kunu,’ ang'u, ‘a ulya alya.’ Nanyo ma mlaidikye. 22Kipfa kochikure-pfo Wakristo wa wongo na waikimbi wa wongo na iwuta mawuto ha kiṟingishyo na ha kiṟiha, kundu watewe na walya Ruwa awasamburie, nokoe nyi kiwechiwa. 23Kyaindi nyo mkuṟise! Ngamsonguo imbia shose, ili shilamehoya.”
Icha lya Mana o Mndu
(Mat 24:29-31; Luk 21:25-28)
24 “Nahong'u mafiri ho, kombona wukiwa wo womeida na mnengeṟi fochihaluka meema na meeri fochiloṟa ngela yafopfo. 25 Na nyenyeri tsechiwa molokya tsiwuke ipfo ruwehu, na pfinya tsa ipfo ruwehu tsechisingitsosingitso. 26 Mandi nalyo wawone Manomndu kechicha ipfo mapuchinyi ai na pfinya ing'anyi na wuitoṟi. 27Na numa echiduma wamalaika wake; na isanya walya wasambuṟe wewuka njora tsiina tsa oruka, kuwokia kishingonyi kya oruka tane kishingo kya ruwehu.”
Kiloshio kifananyi na mkuyu
(Mat 24:32-35; Luk 21:29-33)
28“Kuloshienyi mkuyunyi muwute-ho mfanano fu, Mkamkoya oṟuwe lofo luuwiriwiri lukadosa mambale, mkawuta-ho imanya nyi ipaṟika-ng'u kui. 29Nanyo na wudo, mkamewona isho shechiwutika, mumanye, ke Mana o Mndu nyi amshika kufui. 30Na kya lohi ngambia, ke mbaṟi i ya wandu ikeri-ho, yechisia manyale-pfo, na kutane isho shose shawutika. 31Kulya ruwehu kukakye kunyamaṟike na kunu orukenyi, kyaindi madedo hako hechinyamaṟika manyale-pfo.”
Kuipfo msa aichi mfiri manya saa yopfo
(Mat 24:36-44)
32 “Kyaindi mfiri fo na saa iyo kuipfo mndu aichi mbonyi tsashopfo, ma wasu wa ipfo ruwehu manya o Mana, shile na Wande. 33Ambuyenyi muwekuṟisa na ilaa dembo kipfa mulaichi, indi kiheri kyo kyecha. 34 Nyi cha ili mndu ahenda kyaṟo kuleshe kada mba yake kadambikya shisinga shake ipfo kanyi orio mndu na iṟunda lyake, kawawasa ulya moikalya mongo ke nalae dembo. 35Nahong'u mlae dembo kipfa mlaichi kiheri menyi mba echicha, kokoya nyi kyukany ang'u kio makidi hawi, ang'u kiheri kya aheṟa, ang'u ngamenyi otuko. 36Laenyi dembo ili echicha peṟeseng'u nalakoye mui madonyi. 37Kyaindi kindo ngambia nyo, ngawia wose, laenyi dembo!”
Kyama kyewaha Yesu
(Mat 26:1-5; Luk 22:1-2; Yoh 11:45-53)
Currently Selected:
MARIKO 13: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
