MIKA 4
4
Ruwa nechiitoṟia wandu wake kwi ofoṟo
(Yes 2:1-4)
1Kochicha kiheri
fumvu lya mba ya Mndumii-Ruwa
lyeching'ana kota mafumvu hose,
ee da, lyechidosio huya shifumvu shose.
Wandu wafoi wechihenda pfo,
2wandu wa mkambo ifoi wechishika pfo wechihamba;
“Nndenyi ludo na fumvuhu lya Mndumii-Ruwa,
luhende mbenyi ya Ruwa o Yakobo,
kundu naluloshe njia tsake,
luweosha njayo tsake.”
Kipfa uwawaso wochiwuka ipfo Sioni;
idedo lya Mndumii-Ruwa ipfo Yerusalemu.
3 Ruwa nechimarisa shiloyo sha wandu wa mkambo ifoi,
nechidumbuo kya wandu wa mkambo ing'anyi ya wandu wa kuleshe.
Wo wechitsana njoshu tsawo tsiwe makumbi,
na mapfumu hawo hawe mndo.
Mkambo fo wandu fochikapana na fungi-pfo,
ma wechikulosha kya shida-pfo.
4 Orio mndu nechikukaya kwi olele
wanda ya mashidi ha msabibu yake,
alechiowesho nyi mndu oose.
Mndumii-Ruwa ahamba isho amonyi.
5Wandu wa mkambo ingi yekeosha njia tsawo,
wechikusiria maruwa hawo,
indi so luiosha njia tsadu lochikusiria Mndumii-Ruwa,
Ruwa odu, mlungana na mlungana.
Waisraeli wechiwuya wawuka wusingenyi
6Mndumii-Ruwa nahamba,
“Mafiri halya njechisanyia watiliwanyi shiwungo,
ee da, njechisanyia walya waledao osamiṟonyi,
wandu walya njilewahoṟuo.
7Iwo watiliwanyi shiwungo nyi wo wedeyo moo;
iwo waledao osamiṟonyi wechiwa mkambo fuwode pfinya.
Na inyi Mndumii-Ruwa njechiwaitoṟia fumvuhu lya Sioni,
wokia kiheri-kyo itane mlungana.
8Na iyo kifumvu kya Sioni,
iki Ruwa akeri iringa huya wandu wake,
cha mlisi na po lya machondi hake;
iyo nochiwa se mṟi mnene cha kuwoka,
na Yerusalemu fochiwa mṟi mnene fo Mangi.
9“Wulalu nki ili muifuha mukaichio ṟu ling'anyi?
Ngesa, kuwode-se mangi?
Ulya mosoṟa mbonyi nadekadeka.
Moiria maṟu ha fowa,
cha mndu mka aifee!
10Lanye wandu wa Sioni,
fihiṟenyi na ikukapa wanda cha mndu mka akeri ifee!
Kipfa wulalu mochikure kiidi kya mṟi fu
muhende ikaa patehu,
mochihenda itane Babeli.
Indi ipfo, mochikiṟo.
Ipfo Mndumii nechimukiṟa mawokonyi ha wakituwa wanu.
11Mkambo ifoi yakusanza ikapana nanyo yechihamba,
‘Lekenyi mṟi fowo fufantso ngafu,
naso luwone chandu Sioni alewunduyo!’
12Kyaindi wo
waichi makusaṟo ha Mndumii-Ruwa manya
waichi kilya ateseherie-pfo.
Ke nawasanyia handu hamu,
cha mhanda handu heseya.
13Mndumii-Ruwa nahamba,
“Nyo wandu wa Sioni,
hoṟokenyi muhende ihoṟuo wakituwa wanu!
Njechimuinenga pfinya cha ipung'a lyiwode membe
tsa menya na mbahachu tsa aṟeṟa.
Mochisa wandu wa mkambo ifoi,
shilya mowonafo mochinjiinenga inyi shidambiko shako,
masaa hawo mochinjiinenga inyi Mndumii-Ruwa o wuyana wu wose.”
14Kusanzenyi lanye wandu wa Yerusalemu,
mochihamba, “Luwatengetie, lopeṟehetso,
na mnene o Israeli wakeri imkapa nguchu na iṟiinga.”
Currently Selected:
MIKA 4: KIM2
Highlight
Share
Compare
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
