MIKA 3
3
Mika adedia wasongoru wa Israeli
1Wulalu adanyienyi nyo wanene wa oshari lo Yakobo!
Adanyienyi nyo wa oshari lo Israeli!
Nyi kimuwaṟi nyo imanya mbonyi tsa wusumhanyi.
2Indi nyo musuo wucha mukakunda wuwicho.
Mokeowuo wandu wako njonyi tsawo,
mukaowuo na nyama tsa mbihu yawo ipfo mafuonyi hawo.
3Mkalya nyama tsa wandu wako,
mkaowuo njonyi tsawo,
mkafunja funja mafuo hawo,
mkawawehaweha cha nyama tsekoṟa,
cha nyama tsewika nungunyi.
4Kuwode kiheri kechicha mfuhiye Mndumii-Ruwa,
kyaindi echimhaluo-pfo.
Nechiṟika kyamu kyake mandi-ho,
kipfa muwutie mawuto mawicho.
5Mndumii-Ruwa nahamba adi,
kirianyi na waikimbi wadekesha wandu wako,
waikimbi waonguo ofoṟo kokoya wainengo kindo,
indi wakaowesha wandu ke kuwode shida kokooya walainengo kindo.
6“Konu nyo waikimbi kochiwa meema kulawode mawonesio,
kochiwa meema kulawode otambahaluo,
konu nyo waikimbi kochiila,
mfiri fochiwa meema konu.”
7Iwa waichi ihamba mbonyi tsechicha wechisonu,
walya waichi ihamba mbonyi wechisuka;
wechipfumbuṟia madumbu hawo,
kipfa Ruwa echiwahaluo idedo - pfo.
8Kyaindi ko ora loko,
njiichuo pfinya na mumuyo fo Mndumii-Ruwa,
nanjitaramie imanya mbonyi tsa wulohi,
ngawewada pfinya njiongoye,
wa oshari lo Yakobo ideko lyawo,
na oshari lo Israeli wunyamaṟi wowo.
9Adanyienyi mbonyi i nyo wasongoru wa oshari lo Yakobo,
adanyienyi nyo waitoṟi wa Israeli.
Nyo musuo mbonyi tsa wulohi mukadetsa chile.
10Nyo muwika mṟi fo Sioni ko samu,
ee da! Mṟi fo Yerusalemu ko iwonyia wandu.
11Wachili wawo wekeṟunda ko itsutsumo,
wakohanyi wakaṟunda kwi itao,
waikimbi wakaṟunda wainengo fesa.
Wakakushela ke wakusirie ko Mndumii-Ruwa wechihamba,
“Mndumii-Ruwa chi ai naso,
kuwode kechilupaya kiwicho pfo!”
12 Kyasia! Kwi kipfa kya ikyo,
Sioni yechidemo cha mdemi.
Yerusalemu yechisamo na ifumvu,
lya hekalu lyechiwa ngeṟa.
Currently Selected:
MIKA 3: KIM2
Highlight
Share
Compare
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
