MIKA 2
2
Mika na walya wekekaṟuo
1Ochia lo walya wekuteseheṟa iwuta mawicho,
wekelaa kio wekusaṟa kya wuwicho.
Ilyi mandi kotambaṟuka wakainutsia,
kipfa wawode wuidimi.
2Wekelanga madema na ihawada;
wakakunda mba wakarakuo,
wekesoka na iwonyia wawode mba na wa kanyi kowo,
wekesoka wandu masaa hawo.
3Ko ikyo Mndumii-Ruwa nahamba adi;
“Njiṟeheṟa imuendie nyo mawicho,
mulechiidima ihaowia.
Kechiwa kiheri kiwicho konu,
ma mochiidima ihenda wo kushela pfo.
4Kiheri kyo wandu wechimutaluo ko shiimbo,
wechifihiṟa na ikapa kilio kwi iwawio wechihamba,
“Losaramaya piu,
Mndumii-Ruwa naduo oruka lodu,
ee da! Naluwuta mawokonyi hadu.
Madema hadu nahawia walya waleluduo wupfungo.”
5Ko ikyo mochihawio ma kipeṟengu kitutu kya teri,
kiidi kya wandu wa Mndumii-Ruwa pfo.
Walya wamkaṟuo
6“Ulaluongoye so mbonyi tso.
Itso chi mbonyi tseongoyo pfo.
Kuwode kiwicho keluhoya pfo!”
7Ngesa, kiwaṟi ihamba kudo nyo wana wa Yakobo?
Ngesa Mndumii-Ruwa nadeye itirisia lyake?
Ngesa, nekewuta mbonyi cha itsi?
Mika
Chi wudo-pfo! Madedo hako hawaṟi walya wewuta mbonyi njicha.
8Kyaindi Mndumii-Ruwa nahamba adi;
“Nyo nyi mokepufukia wandu wako cha wakituwa.
Mokewasoka maṟao hawo wandu watsiri,
wandu wekekuchumia na ihenda kowo,
kulawode wuowu,
walawode mahio hose ha shida.
9Mukafuna waka wa wandu wako,
wawuke mbenyi tsawo njicha.
Mkasoka wana wawo kiṟumi kyawo mlungana.
10Kurenyi hendenyi konu!
Iya kuwode hesia moo pfo.
Kipfa kya iwuṟa wuhendeli,
masaramayo hang'anyi hamuwedie!
11Kokoya kuwemewuka mndu kadeda madedo ha wongo na ha wulya kahamba;
‘Ngaende wuikimbi, ke mochiwona mvinyo na wari sa wufoi,’
ichu moonguo nechikundo nyi wandu wa.
12Kyaindi kya lohi ke njechisanyia wandu wako wa Yakobo,
ee da! Njechisanyia walya wa Israeli waletsuhaa.
Njiwaende na mfiṟihenyi cha machondi cha po limu ling'anyi kilisionyi,
nanyo mochiwa po lya wandu wako wafoi.
13Mndumii nechiṟuhuo njia nawawute wusingenyi nawasongoe,
nawo wechifunja kichumi wahende.
Mangi yawo Mndumii amonyi nechiwapfunguo nawasongoe.”
Currently Selected:
MIKA 2: KIM2
Highlight
Share
Compare
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
