HOSEA 5
5
Walosha wawicho wa Israeli
1Keadanyienyi lanye wakohanyi!
Keadanyienyi nyo Waisraeli!
Keadanyienyi nyo oshari lo kimangi.
Nyi kiwemuwaṟi muhoṟokie wusumhanyi,
kyaindi nyi mulehaluka mdeho kulya Mispa.
Mukawehaluka mdeho ipfo Tabori;
2Mkawesuma ṟungu lileshe lyewadeha ipfo Shitimu,
Kyaindi njechimukapa nyo moose.
3Ambuya inyi njiwaichi wandu wa Efraimu,
Waisraeli waidima idekeka koko pfo.
Nyo wandu wa Efraimu nyi muleṟuhuya,
ambuya Waisraeli wose nyi walekufanyitsa.
Hosea adedia weindiya maruwa hengi
4Mawuto hawo nyi hawaima walaidime iwuuya Mndumii-Ruwa owo,
Mrima yawo nyi iichuo wuṟuhui,
wanjiichi inyi Mndumii-Ruwa pfo.
5Ikudosa lya Waisraeli nyi liwonekanyi na pata;
Wandu wako Efraimu nyi wechiomboka kipfa kya wuwicho wowo,
na wandu wa Yuda nyi wechiomboka handu hamu nawo.
6Ambuya nyi wechihenda na mapo hawo ha mbe na machondi;
wechishiha Mndumii-Ruwa;
kyaindi wechiidima imbona pfo,
kyamba amekuletsana nawo.
7Kyamba nyi waleda ikusiria ko Mndumii-Ruwa,
wafee wana wa mkika
ambuya meri fui okombe,
nyi fochiwameṟa handu,
hamu na madema hawo.
Shida kiidi kya Yuda na Israeli
8Kapenyi ombe ipfo Gibea
na taṟumbeta ipfo Rama.
Kapenyi king'oṟa ipfo Beth-aweni.
Nyo wana wa Benyameni wakituwa wapfo nyi wakeri nduma yapfo.
9Efraimu nyi yechiwa nuka mresi .
Iki nyi kindo kya lohi kihenda iwutika kiidi kya Israeli.
10Wanene wa Yuda
nyi wekeilacha mṟasa ya teri.
Ambuya inyi nyi njihenda,
iwaletsia nyashi yako cha mṟinga.
11Efraimu nyi walelya wukiwa,
kawesoko na shilya shiwembaṟi,
kyamba nyi alekunda iosha wutondo.
12Koikyo inyi nyi njikeri cha ilondo ko Efraimu,
na itiinga liwicho ko,
wandu wa Yuda.
13Kiheri wandu wa Efraimu,
walemanya ndaṟe yawo,
na Wayuda wakawemanya itiinga lyawo,
wana wa Efraimu nyi,
walehenda ko mangi,
o Ashuru kundu nawaikanyie,
kyaindi echiidima imukanyia,
manya ichiṟa itinga lyanupfo.
14Kyamba inyi njechihenda iwa cha miiso ko Efraimu,
na imana lya miiso ko wandu wa Yuda.
Kyamba inyi njimonyi njihenda iwaranduo randuo
na iwaduo, manya kuwode mndu echiidima iwakiṟa pfo.
15Ambuya nyi njiwuya na handu hako na ikuashuo na wo,
mṟasa mandi wechiwona ideko lyawo wanjiwuuye,
wukiwa wowo nyi wochiwatewa wanjipfule wechihamba;
Currently Selected:
HOSEA 5: KIM2
Highlight
Share
Compare
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
