HOSEA 4
4
Mndumii-Ruwa anunuwa kya Israeli
1Adanyienyi Mndumii-Ruwa,
nyo Waisraeli.
Mndumii-Ruwa nanunuwa kipfa kya wandu wa oruka lu.
Kuwodese wuhendeli ma mrima mcha orukenyi-pfo;
kuwodese mndu aichi Ruwa kunu orukenyi-pfo.
2Ilya nyamu, wongo, uwahi, wuiwi na wuṟuhui wuichuopfo.
Wunyamaṟi wuongeṟa ifo, na samu ipusuyo orio mkonu.
3Koikyo, oruka lose lui ngumia,
wandu wose wa orukalu wakeri isaramaya,
handu hamu na mando ha ngeṟenyi na malehe;
ma makunga ha ipalyipalyinyi hairumatso.
Mndumii-Ruwa anunuwa kya wakohanyi
4Kyaindi wandu walawonyio owingo, ma ikekedio,
kipfa inyi njikukekedia iyo mkohanyi.
5Iyo nochikapa mtulia mfiri,
nao miikimbi nechikapa mtulia kio handu hamu na iyo.
Njechirumatsa mayo Israeli.
6Wandu wako warumara kipfa walanjiichi;
kipfa iyo mkohanyi noleha iwapfunda.
Ngakuleha ulawe mkohanyi oko.
Kipfa nohadima mdumbuye ya Ruwa opfo,
na inyi njechihadima iwikia mboṟa wana wapfo.
7Chandu wakohanyi waleongeṟeka,
na wudo wose waleengeṟa injitwaṟa.
Koikyo, njechihaluo kiṟumi kyawo kiwe sonu.
8Kipfa wakuihutsa ko shiano sha wunyamaṟi wo wandu wako.
Wawodo mnu nyi macha hewawona wewuta wunyamaṟi.
9Kyaindi isho shechiwakoya, nasho shechikoya wakohanyi;
njechiwahoṟuo kipfa kya mchumie fowo,
njechiwatana watae kipfa kya mawuto hawo wamonyi.
10Wechilya, kyaindi wechiihuda-pfo;
wechimelukameluka, kyaindi wechiwona wana-pfo,
kipfa wanjida inyi Mndumii-Ruwa,
na ioshana na maruwa hengi.
Ruwa asesa miindie ya maruwa ha wongo
11Mvinyo mhya na fo kacha,
fokesoka wandu wulaanyi.
12Wandu wako weketerewa wulaanyi ko mashidi;
wukidi wowo wo lasha nyiwo wokewainenga otambahaluo.
Macha hawo hewuta wuṟuhui nyiho hawadetsa;
wawuta wuṟuhui ko ioshana na maruwa hengi,
wakanjida inyi Ruwa owo.
13Wakeri iwuta shidaso shawo shitonyohu sha mafumvu;
ee da, wawuta shiano mafumvunyi,
wanda ya Mialoni, Migude na Moya,
kipfa maṟinje hayo nyi mecha.
Koikyo wana wanu wa kika wechiwuta wumelukimeluki,
na wamali wanu wechiwa waṟuhui.
14Kyaindi njechihoṟuo wana wanu wa kika kiheri wawuta wumelukimeluki-pfo,
ma wamali wanu kiheri waiwuta wuṟuhui-pfo,
kipfa, wasoṟo wawenyi nyiwo waioshana na wamelukiwo,
na iwuta nawo shidaso kiidi kya miindie ya wumeluki.
Wandu wa watuṟie wuṟango kya lohi wechirumara!
15Kya lohi nyo Waisraeli mui wamelukimeluki!
Kyaindi mulatewe wandu wa Yuda wawade mti!
Ma mulahende handu haele ipfo Gilgali,
manya mulahende kulya Beth-aweni.
Manya mulalye nyamu mochihamba,
Chandu Mndumii-Ruwa ai na moo!
16Waisraeli wai walang'a cha nzoi.
Nkili Mndumii-Ruwa echiwalisa,
cha machondi patenyi ling'anyi lya maṟa?
17Wandu wa Efraimu wamekupfunga na sanamu.
Koikyo! Waleke waengeṟe ichumia chandu wakunda!
18Wakamenyo mvinyo fufoi,
wekekuombotsa wumelukinyi wo wamonyi;
wakakundia ihutsio sonu kota iinengo kiṟumi.
19Kyasia, wechidao nyi kiwiṟi,
na wechiwona sonu kipfa kya wunyamaṟi wowo.
Currently Selected:
HOSEA 4: KIM2
Highlight
Share
Compare
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
