HOSEA 1
1
1 Ili nyi idedo lya Mndumii-Ruwa sa lilechea Hosea mana o Beeri, kiheri kya Uzia, Yothamu, Ahazi, na Hezekia, wawekeri wamangi wa Yuda, na Yeroboamu mana o Yoashi, awekeri mangi o Israeli.
Mka na wana wa Hosea
2Kiheri Mndumii-Ruwa alewoka ideda na wandu wa Israeli kui dumbu lya Hosea, nalewia Hosea, “Henda nohende ialika; mka opfo echiwa mhendeli kopfo pfo; na wana wapfo nawudo wechituṟa wuhendeli cha mayawo. Nawudo wandu wako walenjida inyi na wakawa wameluki.”
3Kyasia, Hosea kahenda, kaalika Gomeri, mana o Diblaimu. Gomeri kakapika, kafeya Hosea mana o kisoṟo. 4 Mndumii-Ruwa kawia Hosea, “Inenga mana cho rina, ‘Yezreeli,’ kipfa kutsuhee-pfo kiheri kitutu tupu, na inyi njechikapa wandu wa mba ya Yehu kipfa kya wuwahi sa alewuta kulya pichinyi lya Yezreeli. Njechiarisia kuleshe wumangi wo Yehu kiidi kya isanga lya Israeli. 5Na kiheri kyo, ipfo pichinyi lya Yezreeli, njechifunja pfinya tsa olemali tsa Israeli.”
6Kyasia, Gomeri kakapikase, kafeya Hosea mana o kika. Mndumii-Ruwa, kawia Hosea, “Dumbuya manacho rina nyi, “Alechisaṟio ,” kipfa njechiwonase ikunda ko wandu wa Israeli-pfo, ma njechiwahoṟiase-pfo. 7Kyaindi njechihoṟia wandu wa Yuda, na iwakiṟa. Inyi, Mndumii-Ruwa, Ruwa owo, njechiwakiṟa, kyaindi chi ko pfinya tsa olemali-pfo, ma chi ko wuda, ang'u ko oshu, ang'u ko frasi, ang'u ko wedoya frasi-pfo.
8Kiheri, “Alechisaṟio,” aleshitsa ohendo lo mo fo ida ionga, Gomeri kakapikase, kafeya Hosea mana ungi o kisoṟo. 9Kyasia, Mndumii-Ruwa kawia Hosea, “Dumbuya manacho rina nyi, ‘Chi Wandu wako-pfo, Kipfa wandu wa Israeli chi wandu wako-pfo, manya inyi njii Ruwa owo-pfo.’”
Israeli yechisungusio ko wuhya
10 Kyaindi wandu wa Israeli wechifo cha msanga fo ipalyipalyi, sa fulechiidima ihesho ma iitalo. Wulalu Ruwa nakeri muwia, “Nyo chi wandu wako-pfo,” kyaindi kuwode mkonu fuicha sa echimuwia, “Nyo nyi wana wa Ruwa ai Huye!” 11Wandu wa Yuda na Waisraeli wechilungana na isahuo msongoru owo umu; nawo wechioṟa orukenyi lowo. Mkonufo fochiwa mkonu mnene fo Yezreeli!
Currently Selected:
HOSEA 1: KIM2
Highlight
Share
Compare
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
