DANIELI 12

Kiheri kya matsitsionyi

1 “Kiheri kyo Mikaeli nechihoṟoka, mnene o ngapano nahoṟoke ora lo wana wa wandu wako; kochiwa kiheri kya wukiwa wulalemewono wokia mbooko itane kiheri kyo, na kiheri kyo wandu wapfo wechikiṟo orio umu echiwono amṟehiye kiidi kya kitapu kilya. 2 Kingi wafoi wa iwo wekoyo walee maṟungunyi wechiṟutso, wengi wawone moo fo mlungana na wengi sonu na wukiwa wo mlungana. 3Walya walaanyi wo wechiwaa cha sa ya nginehu, na iwo wesongoya wengi iwuta mecha wechiwaa cha nyenyeri mlungana na mlungana. 4 Kyaindi iyo Danieli, pfunga madedoha, nohawike kiṟingishiyo kitapunyi; nopfunge kitapu kyo mṟasa kiheri kya ifurumia; wafoi wechihenda ipfo na ipfo na wuṟango wochiengeṟeka.”

5Nalyo inyi Danieli, ngaambuya, ate, wahoṟoki se wengi wawi, umu ora lumu lo meda na ungi ora lulya lungi lo meda. 6Umu kawesa mndu ulya amṟike nguwo tsa katanyi, awei huya mṟinga fo meda, “Ngesa nyi kiheri kya maka inga mṟasa ifurumia lya mbonyi tsi?” 7 Inyi ngaicho mndu ulya amṟike nguo tsa katanyi, awei huya mṟinga fo meda, kairia owoko loke lo kulyo na owoko loke lo kumoso huye ruwehu; kalya nyamu ya ichu ai na moo mlungana na mlungana, ke kochiwa kiheri na shiheri shiwi, na kyenga kya kiheri; kake wakamemaa ifunja pfinya tsa wandu wo waele, nlyong'u mbonyi tso tsose tsechiinukia. 8Inyi ngaicho indi njilamanye, nlyong'u ngahamba, “Ee Mndumii-Ruwa oko, ifurumia lya mbonyi tsi lyechiwa lida?” 9Kahamba, “Henda Danieli; kipfa madedoha hamepfungo na iwiko kiṟingishio mṟasa kiheri kya ifurumia. 10 Wafoi wechikuilisha, na ikulaluo wailyi, na ikusanja; indi wawicho wechiwuta mawicho; kuwode mbicho ma umu echimanyapfo; indi iwo walaanyi nyiwo wechimanya. 11 Na wokia kiheri kilya shidaso shemaya modonyi ilyi shechiwutoho shilya sha kitsitsi, na kiwi kya orumatso ilyi kechihoṟotso, kechishika mfiri kiku na mahana haṟaṟu na makumi haṟaṟu na itanu (1,335). 12Kyaindi iyo kuhendie mṟasa ifurumia lilya, kipfa iyo nyi ochichihiyo na isia moo, na iyo nyi ochihoṟoka kiidi kya kuṟu kuhya lyapfo iya masiiyonyi ha mfiri yo. 13Kyaindi iyo Danieli, kuhendie nohende ionyonya kipfunyi, na kiheri kyo kikashika, nochiṟuka na iambilia kiṟimiṟa kyapfo.”

Currently Selected:

DANIELI 12: KIM2

Highlight

Compare

Copy