HAGAI 2

Wucha wo hekalu lihya

1Meri fo mfungade, meri makumi hawi na limu ya meri fo, idedo lya Mndumii likacha kui dumbu lya muikimbi Hagai, lyekamba, 2“Wulalu deda na Zerubabeli, mana o Shealitieli, mchili o Yuda na Yosua, mana o Yehosadaki, mkohanyi ang'anyi, na wandu watsuhee uhambe, 3 Kiidi kyanu nyiu atsuhee ho alewona kiṟumi kya mba i lilya mbooko? Na wulalu mwiwonyi kuda? Na iwaṟi chando mwiwonyi wulalu? 4Indi wulalu kuwanze tse ukarie, Iyo Zerubabeli, Mndumii akuwia, na iyo Yosua wa mkahari mana o Yehosadaki, mkohanyi ang'anyi nanyo wandu wose wa oruka lu, Mndumii ahamba, muhende iṟunda kipfa inyi njii nanyo Mndumii menyi matorito ahamba; 5 Chando njilehamba lilya mulewuka Misri, na Mumuyo foko fukakaa huye yanu ma mulaowuo. 6 Kipfa Mndumii Menyi matorito nahamba adi, ‘Limu se kioweṟe sa kitutu, njechisingitsa ngina, na oruka, na ipalyipalyi na handu hahadutsu; 7njesingitsa wandu wa mkambo yose na shindo shilya shishilange mnu nyi mkamboya wandu shechicha na inyi njilawuo kiṟumi kya mba-i, Mndumii Menyi matorito ahamba. 8Fesa nyi tsako, na sahabu nyi yako Mndumii o matorito. 9Kiṟumi kya ifurumia kya mbai kechiida Kiṟumi kilya kya mbooko na handu-ha mochiwona ofoṟo,’” Mndumii Menyi Matorito ahamba.

Wandu wose wafanyi ngafu

10Meri makumi hawi na kaana, meri fo kenda maaka fo kawi fo mangi Dario, idedo lya Mndumii likacha kui dumbu lya muikimbi Hagai lyehamba, 11Mndumii menyi matorito, nahamba adi, Kewesenyi wakohanyi mbonyi tsa uwawaso ke, 12Mndu kaduo nyama njele ikakuwasha nao nguwonyi yake, kakushia na mkate ang'u ikato, ang'u mvinyo ang'u mafuda, ang'u kando kose, ngesa kindo kyo kechiwa kyele? Wakohanyi wakahaluo ote! 13 Nalyo Hagai kahamba, kokoya mndu echifana ngafu ili awada mnying'a kawada kindo kimuho kya ishi, ngesa kechiwa ngafu? Wakohanyi wakahamba, kechiwa ngafu. 14Nahong'u Hagai kahamba, nyi wudo wandu wa oshari lu wai oshangunyi loko, Mndumii ahamba; na iṟunda lya mawoko hawo nawudo lyi, na orio kindo wechiwuta cha kidaso kifanyi ngafu.

Mndumii-Ruwa awikia kyasa kya ona

15Wulalu ngamuterewa, kusaṟenyi necha; wokia mkonu iya yose ilemeida itane mkonufu fo inu; wokia lilya mandi iho lilandewiko huya lingi mbenyi ya Mndumii. 16Maheri ho mndu aleshikia kiheo kya makumi hawi kuwewode ikumi tupu; na mndu kiheri aleshika hekamya mvinyo naambiṟe kiheo kya makumi hatanu, ate nyi makumi hawi tupu. 17Njilemkapa na kwari na mu fung'anyi, na mtiima na mvuo ya maho, kiidi kya maṟunda hanu hose; indi mulenjihalukiapfo Mndumii ahamba. 18Kusaṟenyi ngamuterewa wokia mkonu fu fo inu na mkonu yechiituma; wokia meri makumi hawi na nyanya meri fo kenda, ee, wokia mkonu lulewika otende lo hekalu lya Mndumii, kusaṟenyi isho. 19Alewo na kuwode mbeu kikumbinyi? Ee, msabibu, manya ikidi lya ndunda lyose lilewikapfo, wokia wulalu mkonufu fo inu njechimuwikya ona.

Kyasa ko Zerubabeli

20Nahong'u idedo lya Mndumii likachea Hagai lya kawi mfiri fo makumi hawi na kaana fo meeri ke 21Deda na Zerubabeli mchili o Yuda uhambe, Njechisingi-tsa ruwehu na oruka; 22Njechipfuluo loṟika lo mangi na inyamaṟa pfinya tsa wamangi wa mkambo ya wandu; njechipfuluo makari, na iwo wadamye pfo, iwo wadamye huya frasi wechioloka wanda, orio mndu kwi oshu lo manomae. 23Kiidi kya mkonu fulya, Mndumii menyi matorito ahamba njechikuduo iyo Zerubabeli mṟundi oko, mana o Shealitieli Mndumii ahamba, na inyi njikuhaluo iyo ufanane na rachi injitsanyie ofano; kipfa ngakusambuṟa Mndumii menyi Matorito ahamba.

Currently Selected:

HAGAI 2: KIM2

Highlight

Compare

Copy