EZEKIELI 48

Oruka lo shishari sha ora lo mtsudu

1Iha nyiho marina ha shishari sha Waisraeli na njora tsa ohawi lotso. Kuwokia mṟasa fo mtsudu paṟapaṟa ya Hethloni uhende shika Hamathi mṟasa mṟi fo Hazar-enoni (fukeri mṟasenyi na Damasko na Hamathi ora lo mtsudu na uhende kudo kuwokia ora lo ngamenyi mṟasa ora lo kyukanyi) teri yo yechiwa ya Dani. 2Teri iṟasanyi na Dani, kuwokia ora lo ngamenyi mṟasa ora kyukanyi yechiwa ya Asheri. 3Oshari lo Naftali lochioshana na ora luitumanyi na lulya lo Asheri, kuwokia ora lo ngamenyi mṟasa ora lo kyukanyi. 4Oshari lo Manase nyi lochiitumana na ora lo Naftali, nalo ni lochiwokia ora lo ngamenyi mṟasa ora lo kyukanyi. 5Ora luṟasanyi na Manase kuwokia ora lo ngamenyi mṟasa lo kyukanyi nyi lochiwa lo oshari lo Efraimu. 6Ora luitumanyi na lo Efraimu, kuwokia ora lo ngamenyi itane ora lo kyukanyi nyi lochiwa lo oshari lo Rubeni. 7Ora luitumanyi na ora lo Rubeni, kuwokia ora lo ngamenyi mṟasa ora lo kyukanyi nyi lochiwa lo oshari lo Yuda.

Teri ya kyanya ya makidi hawi ha oruka

8Kufui na teri ya Yuda nyi ochipima teri iwode wuleshe wo kilomita ikumi na tsiwi na wulandari na wudo, nalyo nyi lyechiwuka ora lo ngamenyi mṟasa ora lo kyukanyi; na ora ludose luwewokia ora lo ngamenyi mṟasa ora lo kyukanyi; teri i iṟingane na teri injihawie ko orio kishari. Oo kiidi kya teri ii nyiho handu kochikaaho mba ya Ruwa. 9Teri yo ochiiteseheṟa kipfa kya Mndumii-Ruwa nyi yechiwada wuleshe wo kilomita ikumi na tsiwi na kyenga ko kilomita ikumi. 10Kiidi kya ora lo, wakohanyi nyi wechiwadaho ora lowo. Ora lo nyi lochiwada wuleshe wo kilomita ikumi na tsiwi na kyenga luwuka ora lo ngamenyi mṟasa ora lo kyukanyi na kilomita tsitanu kuwokia ora lo huye itane ora lo nuka. Mba yo ya Mndumii-Ruwa nyi yechikaa makidi hawi ha teri yo. 11Ora lu nyi lochiwa lo wakohanyi wa oshari lo Sadoki, iwa nyi walya waleṟundia Mndumii ko wuhoṟotsu walakilekane na Ruwa kiheri kilya Waisraeli walelekana na Mndumii-Ruwa kimu na Walewi. 12Ilo nyilo ohawi lowo lilisambuṟe liwe teri njiele, teri njiele nakamu liitumanyi na teri ya Walewi. 13Teri ya Walewi nyi yechiitumana nuka ya iya ya Wakohanyi. Wuleshe wolo nyi kilomita ikumi na tsiwi na kyenga luwukie ora lo ngamenyi itane ora lo kyukanyi, liwewada wulandari wo kilomita tsitanu kuwokia huye itane ora lo nuka. 14Teri yo ya handu ho yechikumbo manya le pfo, manya iinengio ko mndu osepfo, kyamba teri ya iya nyi injiele ko Mndumii-Ruwa; nayo nyi ikeri ya wuhuru wung'anyi kota teri ya oruka lu lose.

15Teri iya ingi yechitsuhaa, iwode wuleshe wo kilomita ikumi na tsiwi na kyenga na wulandari wo kilomita tsiwi na kyenga, nyi yechihenda iwa ya maṟunda hengi ha orio mfiri ha mṟi, kuwade handu hekaa na handu ha madema, oo makidi hawi hayo nyi kochiwa mṟi, 16nafo nyi fochiṟingana njora tsose orio ora nyi lochiwada wuleshi wo mita shiku shiwi na mahana hawi na makumi hatanu (2,250). 17Mṟi fo nyi fochitengetio nyi teri ii pata iwode wulandari wo mita ihana na makumi hawi na shitanu (125). 18Teri yo yechitsuhaa hekalu lyo lyambiko, ora lo nuka lo mṟi kilomita tsitanu ko kilomita tsiwi na kyenga, ora lo ngamenyi kilomita tsitanu ko kilomita tsiwi na kyenga, ora lo kyukanyi nyi kochiwa handu hedema ko wandu walya wekekaa ipfo mṟinyi. 19Wandu walya wekekaa ipfo mṟinyi wa shishari shose sha Waisraeli nyi wechiidima ikudemia handuho. 20Ambuya teri yose ochiipima ya handu haele na ii ya mṟi nyi yechiṟingana njora tsose, kilomita ikumi na tsiwi njora tsose. 21Teri yo yechitsuhaa njora tsose tsa teri iya njiele na iya ya mṟi, nalyo liṟinganyi njora tsose liwode kilomita ikumi na tsiwi ko orio ora, wokia ora lo ngamenyi mṟasa ora lo kyukanyi liweitumanyi na teri ya njoshari tsa Waisreli nyi yechiwa ya Wamangi. Teri iya njiele alya hando mba ya Ruwa injiwike nyi yechiwa makiidi hawi ha yo. 22Teri iyo ya Walewi na iya ya mṟi nyi yechiwa kidi kya wamangi. Teri ya mangi nyi yechiwa mṟasenyi na iya ya oshari lo Yuda na iya ya Benyameni.

Teri ya njoshari tsingi

23Njoshari tsilya tsatsuhaa nyi tsechihawio tsidi: Kishari kya Benjamenyi nyi kechihawio wokia ora lo ngamenyi mṟasa ora lo kyukanyi. 24Ora lo luitumanyi na lo Benyameni kuwokia ora lo ngamenyi itane ora lo kyukanyi nyi lochihawio oshari lo Simeoni. 25Ora luiṟasanyi na ilo lo Simioni kuwokia ora lo ngamenyi mṟasa ora lo kyukanyi nyi lochiwa lo oshari lo Isakari. 26Teri yo iitumanyi na ora lo Isakari kuwokia ora lo ngamenyi itane ora lo kyukanyi nyi lochiwa lo Zebuloni. 27Ora lo luitumanyi na ilo lo Zebuloni kuwokia ora lo ngamenyi mṟasa ora lo kyukanyi nyi lochiwa lo Gadi. 28Ora lo luitumanyi na ilu lo Gadi luidie ora lo nuka mṟasa mṟi fo Tamari fukaweshikia soka tsa Meriba-kadeshi, ikaweida mṟasa ora lo ngamenyi lo Misri na ipalyipalyi lya Mediteranea. 29Ilo nyi lo oruka lo shishari sha Israeli. Ipfo nyipfondo wechiinengo teri yawo kishari kui kishari. Nyi wudo Mndumii-Ruwa ahamba.

Mongo ya Yerusalemu

30 Mṟi fo Yerusalemu nyi fochiwada omombo luwode mongo yeida na mba na yewuka. Ora lo huye wuleshe wo omombo nyi mita shiku shiwi na mahana hawi na makumi hatanu (2,250). Oralo lo huye nyi 31lochiwada mongo iṟaṟu, mongo fo Rubeni, mongo fo Yuda na mongo fo Lewi. 32Omombo lulya lo ora lo ngamenyi nyi lochiwada wuleshe wo mita shiku shiwi mahana hawi na makumi hatanu (2,250). Ora lo nyi lochiwada mongo iṟaṟu; mongo fo Yosefu, mongo fo Benyameni na mongo fo Dani. 33Omombo lo nuka nyi lochiwada wuleshe wo mita shiku shiwi na mahana hawi na makumi hatanu (2,250). Oralo nyi lochiwada mongo iṟaṟu; mongo fo Simeoni, mongo fo Isakari na mongo fo Zebuloni. 34Omombo lo ora lo kyukanyi nyi lochiwada wuleshe wo mita shiku shiwi na mahana hawi na makumi hatanu (2,250). Ora lo nyi lochiwada mongo iṟaṟu; mongo fo Gadi, mongo fo Asheri na mongo fo Naftali. 35Wuleshe wo njomombo tso nyi mita shiku kenda (9,000). Rina lya mṟi fo wokia wulalu nyi lyechiwa: “Mndumii-Ruwa nyi akeri iya.”

Currently Selected:

EZEKIELI 48: KIM2

Highlight

Compare

Copy