DANIELI 1

Wanake Mengenyi ya mangi Nebukadneza

1 Maka fo kaṟaṟu fo wuchili wo Yehoyakimu, mangi ya Yuda, Nebukadneza, mangi ya Babeli nyi alehenda Yerusalemu kafuwinza. 2 Mndumii-Ruwa kawika mangi Yehoyakimu mangi ya Yuda mawokonyi hake, hamu na shindo maata sha mba ya Ruwa sa aleshiwada mdeho, kashiduo mṟasa oruka lo Shinari, kashiṟika kulya mmbenyi ya ruwa oke. 3Mangi kawia Ashepenasi awei mnzenge naende wanake maata wa Israeli, wa oshari lo mangi na wa oshari lo njama tsa mangi. 4Wanake wa kisoṟo walawode paṟi manya ngoru, wecha piu, wawode shaamu shicha, waṟango, wenyi wulaanyi, wawode wuhidi, waloshe, wenyi sonu njicha, wechiidima ihoṟoka kiidi kya mba ya mangi; kiidima walosho mbuka tsa Wakalidayo na kishomo kyawo. 5Kyasia mangi iya ikawawasa ke wainengo kelya kya mangi na mvinyo fulya ekenyo handu ha maka iṟaṟu, numa waendose ko mangi. 6Kyasia kiidi kyawo kuwewode wana wa oshari lo Yuda: Danieli na Hanania, Mishaeli na Azaria. 7Kyasia mnzenge ulya mnene kawadumbuya marina kalaha Danieli Belteshaza na Hanania kamlaha Shadraka na Mishaeli kamlaha Meshaki na Azaria kamlaha Abednego.

8Indi Danieli kadumbuo mrimenyi foke ke echikuwasha na kelya ang'u mvinyo fo mangipfo kundu nalakufanyitse ngafu. Katerewa mnene ulya mnzenge nakumnengie momu. 9Kyasia Ruwa kawonesia Danieli iidikio na ikundika ko mnene ulya. 10Mnene ulya kawia Danieli, inyi njiowoye mangi ai mndumii oko ichu alewawasa kelya kyanu na mvinyo fonu, kechiwa kida ilindi echiwona shamu shanu shilashisunuhutsu na njoshangu tsanu tsilai njicha, muwonyi ke inyi njechiwutio kindo kiwicho? Na njiwuteho iwoho kipfa kyanu? 11Naho Danieli kawia ulya mohoṟokia ai mnene o mnzenge alewiko kipfa kya Daniel, na Hanania, na Mishael, na Azaria, 12Hoi lokuterewa uluheshe so wasinga wapfo handu ha mkonu ikumi uluinenge mboha lulye na mṟinga lunyo. 13Numa noambuye shamu shadu uṟinganyishe na walya wailya shelya na inyo kilya mangi aleluwawasia uluwutie kilya ochiwona kekuchihiya. 14Kawaidikia kawahesha handu ha mfiri ikumi. 15Mfiri iya yekisia shamu shawo na njoshangu tsawo tsikachia na iila na mbihu yawo ikanuo necha kota walya wengi walelya kelya kya mangi. 16Kyasia mnene ulya kawutaho kilya kyawo kawainenga mboha na mṟinga tupu.

17Kyasia kui mbonyi tsa wanake wo waana Ruwa kawainenga wuṟango, wulaanyi; Danieli kawa menyi wuṟango wuidie womanya mawonesio na itambahaluo ndodo. 18Mfiri iya yekisia iya Mangi aweteṟie, mnene ulya mnzenge kaende wanake walya oshangunyi lo mangi Nebkadneza. 19Mangi kadeda nawo. Kiidi kya wose kuwode walewonekaho wawei cha Danieli, Hanania, Mishaeli na Azaria pfo. Ko ikyo wakahoṟoka oshangunyi lo Mangi. 20Orio kindo kya wulaanyi na wuṟango mangi alekiwesa wakawoneka ke wo nyi waichi ngoseṟa ka ikumi kota wahanga na walaanyi wa mangi. 21Kake Danieli cho kakaapfo mṟasa maaka fo kuwoka fo mangi Koreshi.

Currently Selected:

DANIELI 1: KIM2

Highlight

Compare

Copy