EZEKIELI 47

Soka iwukie hekalunyi

1 Kyasia kanjiwihiṟa na alya mongonyi foida na hekalunyi. Handuho kukaapfo mṟinga fuwukie wanda ya kisingikiti kilya kya hekalu nafo fukahenda ora lo ngamenyi. Ambuya mṟingafo nyi fuwekeri isoka fuwuka wanda ya ora lo nuka lo mongo fo hekalu nuka ya rasionyi. 2Nao kawenjiduo nja ora lo mongo fulya fo ora lo huye. Nao kawenjitengetsa ko njia ya ora lo nja mṟasa mongo fulya fo kya nja ora lo ngamenyi na ipfo mṟinga nyi fuwesoka fuwuka ora lo nuka. 3Kyasia mndu ulya na kidi kilya kyake kepima kapima mita mahana hatanu (500) ko ora lo nuka na ora lo ngamenyi, kanjiitsa kulya mṟingenyi. Mṟinga nyi fuweshikie ndifonyi tupu. 4Kawepima se mita mahana hatanu (500), kawenjiduo kundu lutoole mṟinga fulya. Mṟingafu fukashika ndinyi tsako. 5Kawepimase mita tsingi mahana hatanu (500), nao kawenjiduose kundu luambade mṟingafu. Iya mṟinga fukashika kitsinyi kyako, kawepimase mita tsingi mahana hatanu (500), wulalu meda fukasoṟowia mnu njilaidime se iambada. Fulewase iambada ko ichumiapfo na ate mndu naikelee .

6Nalyo mndu ulya kanjiwia, “Ambuya necha kya mbonyi tsi utsiambuye ko osaṟe.” Kyasia kawenjiwihiṟa se na wambaṟa ya meda fulya. 7Kiheri njileshikapfo ngawekuwonyia mashidi sa hafoi ipfo mbai ya meda. 8Nao kanjiwia ambuya mṟinga nyi fuisoka fochiida wanda mṟasa Araba, na fukomeshika ipfo nyi fochihenda ihaluo mṟinga fo ipalyipalyi lilya lya monyo fuwe mṟinga sa mcha. 9Ambuya orio handu meda fu fochiida, mando hose hai na moo na makunga nyi shechikaa na moo. Meda fu nyi fochihenda icheleṟa ipalyipalyi lya monyo. Handu hose fochiidia nyi kochiwada moo. 10Ambuya wedeha makunga nyi wechikuala-ala mbai ya ipalyipalyi wokia Engedi mṟasa En-eglaimu nyi kochiwa handu koanyikia mdeho yawo. Nalyo kuwekaapfo mbaṟi tsifoi tsa makunga cha halya ha ipalyipalyi lya Mediteranea. 11Kyaindi, maṟumbuchu hakeri ipfo mbarinyi ya ipalyipalyi hechiwada mṟinga mchapfo, kyamba mṟingafo nyi fochihenda iwada monyo. 12 Ipfo mbai ya meda nyi kochioṟapfo mashidi ha shelya. Maṟa ha mashidiho hechiumapfo indi mashidi ho nyi hechikumbia ndunda kiheri kyose. Ambuya nyi hechiṟaa ndunda orio meri kyamba nyi hakeri iongia mṟinga fuwukie mbenyi ya Mndumii-Ruwa. Ndunda tsaho nyi tsechiwa shelya, na maṟa hayo nyi hechiwa mdi fochiṟa ndaṟe.

Mṟasa ya oruka

13Mndumii-Ruwa kahamba, “Ii nyiyo mṟasa ya oruka chandu mochihawia njoshari tso ikumi na tsiwi tsa wana wa Israeli. Kyaindi oshari lo Yosefu nyi mochiluhawia kawi. 14Ambuya nyi mochihawana shiṟinganyi kyamba inyi njilelya nyamu ke nyi njechiinenga waku wanu oruka lu, nalo nyi lochiwa lonu. 15Ora lo mtsudu mṟasa nyi fochiida wokia ipalyipalyi lya Mediteranea, fochiidia mṟi fo Hethloni fuhendeshika Hethloni mṟasa fushike Hamathi na Zedadi. 16Fukomewuka oo nyi fochihenda Berotha na Sibraimu, fuhende ishika mṟi fo Haser-hatikoni fuṟasanyi na Haurani. 17Kii kidi mṟasa fu nyi fochiwuka ipalyipalyi lya Mediteranea fochihenda ora lo ngamenyi mṟasa mṟi fo Hasar-enoni fochiṟasana na Damesko na Hamathi ko ora lo mtsudu. 18Ko ora lo ngamenyi mṟasa nyi fochiwa meda fo Yordani fuhendie kiidi kya Haurani na Damasko, Gileadi na oruka lo Israeli. Mṟasa fu nyi fochiida ora lo ngamenyi lo ipalyipalyi lya Monyo itane Tamari. 19Ko ora lo nuka mṟasa fu nyi fochiida kuwokia Tamari mṟasa soka ya Meriba-kadeshi. Iwuka Meriba-kadeshi mṟasafu nyi fochihenda ora lo nuka na ora lo kyukanyi mṟasa ipalyipalyi lya Mediteranea ora lo ngamenyi lo oruka lo Misri. 20Ora lo kyukanyi itane ipalyipalyi lya Mediteranea na ora lo huye nyi itane handu heida Hamathi.

21“Koikyo nyi mochihawana orukalu sumhana na shishari sho sha Israeli. 22Ambuya nyi mochihawana oruka luwe lonu. Kokoya kukeripfo wahenu ipfo kiidi kyanu nawo nyi wafeye wana, iwo nyi mochiwahawia oruka kiheri kyo mochihawa. Iwo nyi wechiwutio cha wana wa Israeli, nawo nyi wawode momu fokapa kuṟu kuhya waidime iwona oruka hamu na shishari sha Waisraeli. 23Wahenu wo nyi wechihawio ohawi lowo hamu na oshari lo Israeli wakeri kiidi kyawo. Nyi Inyi Mndumii-Ruwa ngahamba.”

Currently Selected:

EZEKIELI 47: KIM2

Highlight

Compare

Copy