DANIELI 9
9
Danieli aterewia wandu wake
1Kiidi kya maka fo kuwoka fo Dario, mana o Ahasuero, o oshari lo Waamedi, ulya walemshimbuo nawe mangi o Wakalidayo; 2 maka fulya foke fo kuwoka fo wuchili woke inyi Danieli, kui isoma shitapu, njilemanya itala lya maka kiheri idedo lya Mndumii-Ruwa lilechea Yeremia muikimbi, lyeinutsia kiwi kya Yerusalemu, nyi yo maka makumi mfungade (70). 3Ngaindutsia Mndumii-Ruwa kyamu kyako, kundu njiidime iterewa, na ikuotoya na iṟaa nguo tsa masaṟa na ikaa ifunyi. 4Ngaterewa Mndumii-Ruwa oko, ngatocha wunyamaṟi, ngahamba:
“Iyo Mndumii-Ruwa, Ruwa ung'anyi, nooweshie, okewada mkundana na osaṟio ko walya wakukundi na iringa mawawaso hapfo. 5Lulenyamaṟa, lukawewada ngoo njiumu, lukatana mawicho, lukakuda iyo, ee da, lukaweda mawawaso hapfo na chile tsapfo. 6Manya luleadanyia waṟundi walya wapfo-pfo, waikimbi walededa kui rina lyapfo wechiikimba wamangi wadu, na wanene wadu, na wandeadu, na wandu wa oruka lodu. 7Hoi Mndumii-Ruwa wokia mlungana wukiilohi wui na iyo, kyaindi kodu kuwode iṟeenze itane inu; wandu wa Yuda, na wenyi Yerusalemu na ko Waisraeli wose, wai kufui na kuleshe, kiidi kya njoruka tsose ulewafuna, kipfa kya madeko hawo walekudekio. 8Hoi Mndumii-Ruwa kuiṟeenze so na wamangi wadu, wanene wadu, wandeadu kipfa kya wunyamaṟi. 9Osaṟio na ihoṟio lyii ko Mndumii-Ruwa odu ma chandu lulemdekio; 10manya luleidikia ṟu lya Mndumii-Ruwa, Ruwa odu pfo, ma iosha mawawaso hake, alelulosha kui waikimbi wai waṟundi wake-pfo. 11Ee da, Waisraeli wose watahacha wuwawaso wopfo, na ikaa kihadi, walaadanyie ṟu lyapfo; ko ikyo oseso lulecha huye yadu, na nyamu iya injiṟehie wuwawasonyi wo Mose, mṟundi o Ruwa; kipfa lulewuta wunyamaṟi. 12Nao nainutsia madedo hake, halya awehambie kyadu, na walya waleluletsa wakaluendie mawicho hang'anyi; kipfa kunu shi ya ruwehu kuwode kindo kilemeutika cha iki kilewutika Yerusalemu pfo. 13Chandu kii kiṟehie ipfo wuwawasonyi wo Mose mawichoha hose haluhoya; ma kudo luleterewa Mndumii-Ruwa, Ruwa odu nalusaṟie pfo, kundu luhaluke na ida mawicho hadu na imanya lohi yake. 14Kyasia Mndumii-Ruwa, Ruwa kaludikia ngapo i; kipfa Mndumii-Ruwa, Ruwa odu nyi ai mhoṟotsu kiidi kya maṟunda hake hose; naso lulaindie ṟu lyake.
15“Na wulalu hoi Mndumii-Ruwa, Ruwa odu, ulewuta wandu wapfo wusingenyi wulya wo Misri kui owoko lopfo lwapfinya, kowona kiṟumi itane inu, lomewuta wunyamaṟi, lukawuta mawicho. 16Hoi Mndumii-Ruwa, ngakuterewa chandu kirianyi na wukiilohi wopfo, nyashi yapfo ukunde ihooṟa, na ida mṟi fu fo Yerusalemu fumvu lyapfo lyele; kipfa kya wunyamaṟi wodu na wuwicho wo wandeadu, mṟi fu fo Yerusalemu foisalucho nyi wandu wose waluṟingichie. 17Na wulalu, hoi Ruwa odu, adanyia wo shiterewo sha isinga lyapfo na kiterewo kyake, uwaṟe kyamu kyapfo ipfo kundu kwele kulehaluka mrapu kipfa kya Mndumii-Ruwa. 18Hoi Ruwa oko, deha kudu kopfo, uadanyie; tambaṟuo meso hapfo noambuye nowone wo wukiwa wodu, na mṟi fulya fui fulahe kui rina lyapfo, kipfa chi luikuterewa kui wucha wodupfo, kyaindi nyi kipfa kya osaṟio lopfo lung'anyi. 19Hoi Mndumii-Ruwa uadanyie, hoi Mndumii-Ruwa, uhooṟie; hoi Mndumii-Ruwa uicho, uwute, kulakeleo, kipfa kyapfo iyo, Hoi Ruwa oko; kipfa kya mṟi fopfo na wandu wapfo wailaho kui rina lyapfo.
Msu Gabrieli atambahaluo wuikimbi
20Kyasia ilyi njiwekeri ideda na iterewa, na itocha njonyamaṟo tsako na tsa wandu wako wa Israeli, na iterewa mnu Mndumii-Ruwa, Ruwa oko kipfa kya fumvu lyele lya Ruwa oko; 21 Kiheri mbededa na iterewa, mndu ulya Gabrieli ulya njilemmbona ndodonyi ilyi mawookionyi, kechirundutso owinyi, kanjipaya kiheri kedasa ilyi kyukanyi. 22Kanjiwawasa, kadeda na inyi kahamba, “lyo Danieli, ngakuchea wulalu njikunenge wuṟango uidime imanya. 23Mawokioonyi ha shiterewo shapfo kulewuto iwawaso, na inyi ngacha njikuinenge mbonyi; kipfa iyo nyi ui mkunde mnu, wulalu kusaṟe mbonyii na imanya kiwonesio ki.
24“Ambuya chandu ki kiteṟie, maka mfungade ka makumi mfungade (490) kya wandu wako, na kya mṟi foko mwele, kundu njechitirimisha wunyamaṟi na iwika ho mhoṟie njechiwutaho wukika wose na iende wukiilohi mlungana, na iwikaho ofano lo kiwonesio kya wuikimbi na ishimbuo na mafuda ichu ai mwele. 25Kyasia wulalu umanye, wokia wuwawaso wo isungusia na iṟeheṟa wuhya Yerusalemu mtano kiheri kya icha lya ichu amshie mafuda ang'anyi; kochiwa mfungade mfungade. Ko mfungade makumi haṟandaṟu na iwi (62), mṟi fo Yerusalemu fochiwiko se ko wuhya na fochiwada mtandaṟa mnene na mṟeshi kyaindi kiheri kyo kochiwada wukiwa. 26Numa ya mfungade iya makumi haṟandaṟu na iwi (62), ulya amshie mafuda nyi echidetso, ma echiwada kindopfo; na wandu wa ulya asonguo wechirumatsa mṟi, na halya haele; ifurumia ho kochiwada mfu, na shida; kipfa kiwi kiikiteṟie. 27 Nao nyi echiwikaho mkundana mhoṟotsu na wandu wafoi kiheri kya mfungade fumu; na kyenga kya mfungadefo nyi echiima shiano shedasa; na o kiidi kochihoṟokaho kiwi kya orumatso; nahong'u mtsitsionyi, na nyashi iya iwenjiteseheṟe ihende hoya ichu monyamaṟa.”
Currently Selected:
DANIELI 9: KIM2
Highlight
Share
Compare
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
