DANIELI 8

Ndodo huya machondi na mburu

1“Maka fo kaṟaṟu fo mangi Belshaza, mawonesio hakanjichea inyi Danieli, numa ya halya ha kuwoka. 2Inyi njilewona njidi, njiwekeri ipfo Shushanyi mfiṟihenyi kidembo kya Elamu; ngawona mawonesio njikeri hafui na meda Ulai. 3Ngairia meso hako ngawona mbelya ya meda kuhoṟoki ho isuwa, liwode membe tsiwi; membe tso tsinjileshe, indi imu injileshe kota ingi, iya iwenjileshe ngoseṟa yo iledo ifurumia. 4Ngawona isuwa lyo lyechitsindika ora lo kiukanyi na ora lo mtsudu, na ora lo nuka; na kuwode indo lii na moo lyekaria ihoṟoka sumuhana nalyo pfo ma kuwode indo lyekaria iiṟiwana nalyo ilisoka ma kindopfo, indi lilewuta chandu lilewona lyo lienyi tupu, likakuirinyisha mnu.

5“Na inyi kiheri mbei ikusaṟa ambuya, kyoṟo kikacha ora lo kiukanyi keitola kikashika ruwehu kilashike wanda; na kyoṟo kyo kiwewode membe ntumhari makidi hawi ha meso hakyo. 6Kikahendia isuwa lyo liwode membe tsiwi lilya ndeliwona lihoṟoki afui na meda, kikasembelia na nyashi ing'anyi. 7Ngawona kechihenda na nyashi kikasahia isuwa lilya kikalikapa kikafunja membe tsilya tsa isuwa lilya, likalehela likahowanda, kyoṟo kilya kikalifunja funja na kikachuma chuma; kulawoneke mowuta isuwa lilya mawokonyi hakyo. 8Kyoṟo kilya kikakuichika mnu, kiheri kilewada pfinya, ombe lulya lumu lukafunjika lulya luweng'anyi, oweṟe kitutu kukado membe tsingi njiapfinya tsiina kui njohawi tsiina tsa ruwehu.

9“Kiidi kya membe tso kukadoho ombe lututu lukang'ana mnu, ora lo nuka, na ora lo kiukanyi, na ora lo oruka lucha. 10 Lukaang'ana handu loshikia matorito ha ruwehu, ikaolotsa wanda kyenga kyaho na kya nyenyeri lukatsichumachuma. 11Ikakuichika ikakunda ielewetsa menyi matorito, ikawewutaho shiano na shidaso shemaya modonyi na handu halya haele hakaolotso wanda. 12Mamiingi fo ruwehu fukadambiko mawokonyi hake hamu na shidaso shemaya modonyi orio mkonu ko njia ilawaṟi. Na wukilohi wukoolotso wanda. Ombe lo lukoilamia wuindi wo lohi. Kohuyo kiidi ko orio kindo ulekitana.

13Ngaicho umu o waele echideda na mwele ungi kechimmbesa, “Mṟasa indi shindo shi shawono kunu mawonesionyi shechitsitsa? Mṟasa indi wunyamaṟi wung'anyi wochiwa shidaso? Mṟasa indi mbahanyi ya ruwehu na ihekalu shechichumochumo? 14Nao kamhaluo, mṟasa shiheri sha kiukanyi na ngamenyi shiku shiwi na mahana haṟaṟu (2,300) nyilyo handu ha haele hechihaluyo haele.”

Msu Gabrieli atambahaluo ndodo

15Kikashika o inyi Danieli, kiheri njilewona shiwonesio shi, njeshiha ishimanya, oweṟe ngawona msa ahoṟoki ofano lo mndu oshangunyi loko. 16 Ngaicho ṟu lya mndu kiidi kya meda Ulai; likalaha lyehamba, “Gabrieli, manyisha mnduchu mawonesio ha.” 17Kyasia kasembelia alyando mbehoṟoki; na inyi ngaowuo lilya alecha na afui ngaho wanda na kyamu, kyaindi o kanjiwia, “Manya iyo mndu o wandu mawonesio ha nyi ha kiheri kya ifurumia.”

18Kiheri kilya awededa na inyi ngawado mado malemeri na kyamu kyako kikaambuya wanda, kyaindi kanjipaaya kanjihoṟotsa chimu. 19Kanjiwia, “Ambuya, njikumanyishia mbonyi tsechikaa tsiwutike alya masiionyi ha maheri ho hai mateṟie; kipfa nyi wudo kechiwa kui nyashi ya Mndumii. 20Suwa iya ulewona, iwode membe tsiwi, nyi wamangi wa Umedi na Uajemi. 21Na kyoṟo kilya kiwode mafufuta hafoi nyi mangi o Uyunani, na ombe lulya lung'anyi lui kiidi kya meso hayo nyi mangi o kuwoka. 22Kya ombe lulya lulefunjika, tsikadoso ho membe tsiina, mangi tsiina tsechihoṟoka kiidi kya mkambo fo wandu walya walya, indi pfinya yawo yechianguo. 23Mtsitsionyi fo wumangi wowo, walya wedeko ili mandi wechishika, mangi awode kyamu kilang'a aichi shiṟike nechihoṟoka. 24Pfinya tsake tsechiwa tsing'anyi mnu, indi chi kui wuidimi woke amonyi pfo; nechinyamaṟa kiṟihishie wandu wose, nawetaramo necha, na iwuta chando akunda; nechirumatsa iwo waṟango na wandu waele. 25Na kui chila yake nechiṟunda kui mtambo na ikuichika amonyi ipfo mrimenyi foke nawerumatsa walya wakukerie na wuhoo; nao nechihoṟoka wahodane nao ichu ai mnene o wanene; kyaindi nechifunja kulawode mawoko heṟunda. 26Na mawonesio ho ha kiheri kedasa kya kyiukanyi na ngamenyi shahambo nyi lohi; indi iyo shikia shiwonesio shi kipfa kya maka iicha mkonu sa ifoi ikeri icha.”

27Na inyi Danieli ngauma, ngaluo mfiri maata; kiidima ngakure, ngaṟunda maṟunda hako ha mangi; ngaṟihisho nyi mawonesio halya kyaindi kuwode msa alemanya pfo.

Currently Selected:

DANIELI 8: KIM2

Highlight

Compare

Copy