DANIELI 11

1“Kyaindi ko ora loko, kiidi kya maka fo kuwoka fo Mangi Dario, Mmedi, inyi njilehoṟoka, njimṟingishie na imbika pfinya. 2Na wulalu njikuwia wulohi wo mbonyi tso.”

Wumangi wo Misri na Syria

Ambuya, wechihoṟoka wamangi waṟaṟu kiidi kya Persia; na mangi ya kaana nyechiwa msuṟi kota iwo wose; nao ili echiwada pfinya kipfa kya wusuṟi woke, nechiwoka ikapa wumangi wo Wuyunani. 3Numa kochihoṟoka Mangi mkahari, nechihoṟokia na ichilia oruka lung'anyi na ikuwutia chandu akunda. 4Ma kudo kiheri wumangi woke wochiṟuṟuma, wochifunjika, na ihawukana njora tsiina; kochiwono ma oshari lokepfo, ma ochiidima iidikia ke kulemewada mangi ipfo kisharinyi pfo; kipfa wochikuṟuyo na ihadimo kipfa kya wengi-se.

5“Na mangi ya ora lo nuka nechiwada pfinya, na umu o wanene wake; o nechiwada pfinya kota o, nao nechiwada wuchili, wuchili woke wochiwa wunene. 6Kukameidaho maka njiliwe wechiwuya se itarama, kipfa mana o waka o mangi ya nuka nechicha isahiya mangi ya mtsudu, kundu waidime iidikiana; indi echiwada pfinya ipfo mawokonyi hake mfiri yosepfo, ma mangi iya yechihoṟokapfo, ma owoko loke; indi mana ulya o waka nechiwuto, na walya walemwende, na ulya momfee, na ulya alemneenga pfinya ilyi mbooko.

7“Kyaindi kiidi kya njana ya mri yake nechihoṟoka umu ora loke sa echiduo ichekeṟo lya wandu wa mbahanyi, nao nechiida kiidi kya omombo lo mangi ya mtsudu, na iwakapa na iwawinza; 8maruwa hawo ha wongo, na sanamu tsawo, na shombo shawo shicha sha fesa na sahabu nechishiduo mṟasa Misri; numa natirime maaka njiliwe alehendia mangi ya mtsudu. 9Na icho nechiida na wumang'inyi wo mangi ya nuka, kyaindi nawewuya na orukenyi loke amonyi.

10“Wana wake wechiamtsa shida, na isanya wandu wa mbahanyi wanene; wechicha wafoi mnu na iida kiidi wawewuya na iamtsa shida mṟasa washike omombonyi loke. 11Mangi ya nuka yechiichuo nyashi, na mangi ya mtsudu wakapane kiṟinganyi; ngapano itewe mangi ya nuka isanyie wandu wa mbahanyi; ma kudo mangi ya mtsudu iwingo. 12Kameduo wandu walya, mrima foke fochikurinyisha mnu; naweidima iombotsa wandu shiku ikumi (10,000) kyaindi echiengeṟio pfinya pfo. 13Kipfa mangi ya mtsudu nechiwuya nawike chekeṟo ling'anyi lya shida kota lilya lya kuwoka; na kya lohi nechicha kiheri kya ifurumia, komeidaho maka njiliwe hamu na wandu na masaa hafoi.

14“Mandi ho wandu wafoi wechihoṟoka wakapane na mangi ya nuka; kake, wawode orikiki kiidi kya wandu wapfo wechikuiria waṟingishie mawonesio; kyaindi wechioloka. 15Kyasia, mangi ya mtsudu nechicha, nawike sohu, nakape mṟi fuwode omombo; shisha sha nuka shilechiidima imkapa, ma wandu wake wasambuṟe, ma kulechiwada pfinya yemkapa. 16Kipfa orio ose echicha ikapana nao nechikuwutia chando akunda, kuwode ma echihoṟoka oshangunyi loke pfo; nao nahoṟoke orukenyi sa lui lucha, na orumatso lochiwa owokonyi loke. 17Nao nechiwanza oshangu loke nache na pfinya tsa wumangi woke, na nechiwika mkundana nao; na nechiwuta chandu akukundia, nao nechimnengia mana o waka o wandu kundu nanyamaṟo. Kyaindi ikyo kechitewa nahoṟoke ma kimtaramepfo. 18Naindutsie oshangu loke kundu kuwode oruka kiidi kya mṟinga, nawekapa njoruka tsa mbaṟi ii tsifoi; indi mnene umu nechimtirimisha hamu na sonu tsilya tsileendo nyio; 19Na sonu tso naindutse kyamu kyake kiidi kya oruka loke amonyi luwode omombo; indi nechikapa tulia naomboke, ma echikaa nawonosepfo.

20“Handu hake kuhoṟoke ho umu mosuhuṟa, ang'u msanyi o okamba kiidi kya wumangi woke; indi kiidi kya mkonu njiangu nechirumatso, chi ko nyashi, ma chi ko shidapfo.”

Mangi mnesi o ora lo mtsudu

21Handu hake kochihoṟoka mndu, awaṟi imino, walalemnengie wumangi ma kiṟumi; o nechicha kiheri kuwode ofoṟo, nao nechiwona wumangi kui ikulopa. 22Walya wawode shisha sha ngapano shifoi wechidicha oshangu loke, na ifunjika; yee da na mnene o mkundana. 23Mkundana fukamewiko nawute na mtambo; kipfa nechido nao nawade pfinya ma chandu echiitoṟia isanga litutu. 24Kiheri kya ofoṟo nechiida handu hawei hecha mnu kiidi kya kioruka kyo; nao nechiwuta shindo wandie walalewuta, ma wasahuye; nechinanatsa kiidi kyawo nyama nlase, na wawade shidenyi, na masaa; nawike mtambo huye ya njomombo tsake mṟasa kiheri kii kiteṟie.

25Nao nakuichuṟe pfinya tsake na wukari woke ko mangi yo ya nuka na mamiingi fung'anyi; na mangi ya nuka naamtse shida njiwawo awode siṟi ing'anyi ya wandu wa shida; indi alechiidima iwuta kindo; kipfa kya mtambo. 26Ee da, walya welya kelya nao wechimrumatsa, na wandu wake wa shida wechidicha kipfa kya wuowu, wafoi wechioloka wai wawahe. 27Na kui mbonyi tsa wamangi wo wa wawi, mrima yawo wechikusaṟa itana mawicho, wechideda wongo ilyi wadamie shelyenyi; indi ikyo kechitarama pfo; kipfa ifurumia na lihoye kiheri kii kiteṟie. 28Nlyong'u echiwuya na orukenyi loke arie wusuṟi wung'anyi; mrima foke fochiwa kiwungi na mkundana fulya mwele; nao nechiwuta chandu akundi, na iwuya mṟasa orukenyi loke.

29“Kui kiheri kii kiteṟie nechiwuya, na ihenda kya nuka, kyaindi kiheri kyo shindo shechiwa chandu shiwei ili mbooko pfo. 30Kipfa magari ha mṟingenyi ha Kitimu, helaho nyi, ‘Merikebu’ hechicha ikapana nao; nao nechipfa mrima, nao nechiwuya na isukio nyi mkundana mwele; na iwuta chando akundi, nechiwuya naadanyie iwo waleda mkundana mwele. 31 Walya wawode shisha wechihoṟoka ora loke, nawo wechifanyitsa nyi orio mfiri, hando naapfo kochiwoneka kiwi kya orumatso. 32Na iwo wewuta mawicho huye ya mkundana wechidetsa madedo hekukundisha; indi wandu walya waichi Ruwa owo wechiwa wakahari, na iwuta maṟiho. 33Na iwo wai walaanyi kiidi kya wandu wechilosha wafoi, ma kudo wechioloka kui oshu, na kui modo, na kui ipfungo na kui idao wapfungo mfiri ifoi. 34Kyasia ili wechioloka wechitaramo kui ndarama ntutu; indi 35Na kiidi kya walya walaanyi wechioloka, kundu wakuilishe, wailisho na isanjo na iila peṟu, mṟasa ifurumia; kipfa nyi kikiteṟie nakyo kyameshikepfo.

36 “Na mangi nyi echiwuta chandu akundi. Nao nyi echikung'anyisha, na ikuṟumisha huye ya maruwa hose, nao nyi echideda madedo ha mbaṟi heisalucha Ruwa o maruwa. Nao nyi echiengeṟa ihuyo mṟasa nyashi ya Ruwa iawukie; kipfa shilya shishiteṟie shiwaṟi shiwutike. 37Ma echiowuo maruwa halya ha ndee pfo, ma walya wai walange nyi waka. Nechimina maruwa hengi hose, kipfa nechikuiria huye nawe mnene kota orio umu o maruwa ho. 38Indi handu hake nechiindia ruwa handu haikare; na ruwa wandee walawemwichi nechiwaindia, kui sahabu, na fesa, na okisa lo shindo sha wuhuru wung'anyi na shindo shichihiṟie. 39Nao nyi echiwada shindo shose sha handu haikare kui pfinya ya ruwa mhenu; na icho echimiidikia nyi echimwengeṟia wunene; nyi echiwainengia iitoṟia wafoi, nao nyi echihawa oruka kui itsutsumo.

40“Na kiheri kya ifurumia mangi ya nuka nyi echihodana nao; na mangi ya mtsudu nyi yechimkapa na otanu lo kiwiriwiri, hamu na magari ha shida, na wandu wa frasi, na merikebu tsifoi; nao nyi echiida kiidi kya njorukatso kui pfinya na iida kiidi. 41Nao nyi echiida kiidi kya oruka lo lucha na njoruka tsifoi tsechihalutso, kyaindi njoruka tsi tsechikiṟo kui owoko lo Edomu na Moabu, na wanene wa wandu wa Amoni. 42Nao nyi echihoṟotsa owoko loke huye ya njoruka tso, ma oruka lo Misri lochikiapfo. 43Kyaindi nyi echiwada pfinya kiidi kya kisa kya sahabu na fesa na huye ya shindo shose sha Misri shiwode wuhuru wung'anyi; na Walibia, na Wakushi wechiosha njayo tsake. 44Indi mbonyi tsechiwuka ora lo ngamenyi na mtsudu tsechimwowesha na ieṟewe mnu; kimtewe nakure na nyashi kundu nanyamaṟe na iwaha wandu wafoi. 45Nechihoṟotsa mahema hake ha wumangi kiidi kya ipalyipalyi na fumvu yele lya wucha; kyaindi nechishika mtsitsionyi foke, ma kulawode mo momtarama.”

Currently Selected:

DANIELI 11: KIM2

Highlight

Compare

Copy