DANIELI 2

Ndodo ya mangi Nebukadneza

1Kikashika maka fo kawi fo mangi iya, Nebukadneza kalodia ndodo kio alee; kaeweṟo mnu nakamu, mado hakamdekia. 2Nalyo mangi kaduma kulaho wandu waṟango kiidi kya Wakalidayo wai wahanga, walashi, wenyi wulaanyi wodambuya wandu ndodo na wengi wafoi kundu wadambuye mangi ndodo iya. Wakaanga mba ya mangi wakahoṟoka sumuhana nao.

3Mangi kawawia, ngalodia ndodo, ngaeweṟo mnu nakamu, njikundi imanya otambahaluo loyo. 4Kyasia walya washikiepfo wakambia kui kishomo kya Kiaramu Mangi nakae na moo mlungana; luongoye so waṟundi wapfo ndodo iya naso luidambuo.

5Mangi kawahaluo kawawia, “Nyo Wakalidayo, idedo lyo lyanjidekia manya ndodo iya naawo mulamenjiwia ndodo iya na mdambuye foyo nyi lohi njechimuwaha, mumanyomanyo shiteenoteno; nyi hamu na walya wa kanyi konu, mba tsanu tsiwe mbosha. 6Kyaindi mkanjiwia ndodo iya na iidambuo, njechimwinenga kisa na kiṟumi king'anyi mnu - wulalu njiwienyi ndodo iya na mdambuye.” 7Wakamhaluo se lya kawi, “Mangi o nakuluwie ndodo naso lumdambuye.” 8Mangi kahaluo kawawia, “Njiichi na pata ke muishiha meeke folemeka kyamba muichi ke idedo li lyanjidekia. 9Indi mulamenjiwia, kindo kimuwaṟi nyi kimu tupu; nyi opfu kipfa muichiwie injiwia mbonyi tsa wongo na madedo ha wulembi njiwienyi ndodo numa mdambuye na inyi njiwuteho imanyake mui waṟango.” 10Naalyo Wakalidayo walya wakawia Mangi, “Kuipfo mndu o wuyana echiidima idedo li ma kawa mangi, ma mndu ma mchili, ma mhanga, ma msawi ma Mkalidayo pfo. 11Nyi idedo lyiṟihishie mnu ili mangi akundi imanya. Kuwode mndu sa echiidima ikutambahaluya pfo sile na maruwa hamenyi halawode mbihu ya kiwandu.” 12Kudi mangi ulya kaichuo nyashi ing'anyi kawuta iwawaso ke waṟango wose wa Babeli warumatso. 13Iwawaso likadung'ana na wandu wakashiha Danieli na wana wamae kundu wawoho.

Ruwa atambahaluya Danieli ndodo

14Kyasia Danieli kui wuṟango na ikuṟiisa ling'anyi kahaluo Arioko, mnene o waringi wa Mangi amdume nawahe waṟango wa Babeli; 15Kahaluo kawesa, “Arioko; nkili iwawaso li lya mangi lii iwawo lidi?” Arioko kawia Danieli mbonyi iya yose. 16Kyasia Danieli katerewa Mangi namnenge mwaanya sa mtutu naloṟe mangi mdambuye.

17Kyasia Danieli kahenda iongoya wanawamae kanyi koke Hanania, Mishaeli na Azaria mbonyi iya; 18kundu waterewe osaṟio ko Ruwa o ruwehu kya kiṟike ki kundu Danieli na wanawamae walawone wechiarisika kimu na waṟango wa Wakalidayo. 19Nalyo Danieli kaloṟo ndodo iya yose na mdambuye foyo. Danieli kaidapfuma Ruwa. 20Danieli kaidapfuma Ruwa kahamba:

“Rina lya Ruwa liadapfumo Ruwehu mlungana kipfa wuṟango na wuidimi nyi woke.

21O nyi ekeilacha maheri na chila yake;

nekewuta wamangi, kawewika-ho,

Wamangi na iwainenga wuṟango na wulaanyi,

kainenga waṟango wusalari.

22Nekedambuo shiṟike;

kawemanya shii meemenyi,

kipfa koke kuwode ngeela.

23Ngakuana na ikuadapfuma,

Iyo o waku wadu, ulenjiinenga wuidimi na wuṟango,

konjiloṟa shilya luwekundi kopfo,

kipfa kyakuchihiya injiloṟa idedo lilya lya mangi.”

Danieli atambahaluya mangi ndodo

24Nahong'u Danieli kahenda kulya ko Arioko ulya awembike nyi mangi narumatse waṟango wose wa Babeli, kahenda imbia adi, “Ularumatse waṟango wa Babeli, njinenga momu njiwonane na mangi na inyi njechiloṟa mangi idedo lilya na itambahaluo ndodo yake.”

25Kyasia Arioko kaitsa Danieli oshangunyi lo mangi owinyi faṟa, kambia adi, “Ngawona mndu o wana wa Yuda iwo walesamiṟo echiidima iongoya mangi ndodo iya na imdambuya.” 26Mangi kahaluo kawesa Danieli ichu awemlahie Belteshaza, “Ngesa iyo nochiidima injiwia ndodo iya njileiwona na itambahaluo?” 27Danieli kahaluo mangi kambia, “Kiṟike kilya mangi alekiwesa, wenyi wuṟango wechiidima itambahaluo-pfo ma wasawi, ma wahanga na wenyi wuṟango. 28Kyaindi kuwode Ruwa o Ruwehu echiidima itambahaluo shindo sha shiṟika, nao nyi aloṟa Mangi Nebukadneza mbonyi tsechikaa tsihoye mkonu ya ifurumia. Ndodo yapfo na mahio ya mdo fopfo ulewona lilyandi uwelee nyi kikeri kiile; 29Iyo mangi mahio hapfo haleida mrimenyi fopfo koloṟo mbonyi tsechikaa tsiwutike ilyi numa; na ichu ekeloṟa shiṟike nyi anjiwia na injiloṟa chando kii. 30Kyaindi inyi njileloṟo kindo ki kui wuṟango wo mbaṟi yosepfo, ma njiwode wuṟango wueṟie wandu wengipfo; indi nyi kundu mangi naidime imanya na iloṟo shiṟike na njikuongoye mdambuye, naawo umanye kii mahiyonyi hapfo.

31“Iyo Mangi nulewona sanamu ing'anyi mnu. Sanamu i iweng'anyi idi iwewode ngeela ing'anyi ikahoṟoka oshangunyi lopfo; chando iwenjiumbe iweṟihishie. 32Sanamu i mdo foyo fuwei fo sahabu njicha; kipeeta na mawoko hawei ha fesa; ndeu na kitsi shiwei sha aṟeṟa njiili; 33Madende hawei ha menya tsa mnganya; njayo tsa madende tsiwei kyenga menya tsa mnganya na kyenga teri. 34Kochiitukuya, kowona iho ling'anyi lilalipaṟe, manya isumo nyi mndu lyikakuṟuka likakapa sanamu iya madende hayo; halya hawei kyenga menya na keenga teri, likaifunjafunja shiteno-teno. 35Naalyo menya, teri, aṟeṟa, fesa na sahabu iya shikapaṟopaṟo shikaseo itane shawa cha muulu fulee wanda kiheri kya mrike; otanu lukashiwiwita manya shilakiwono handu shiwei, na iho lilya lilewuta lido likawa fumvu ling'anyi itane lyaichuṟa wuyana wose.

36“Ii nyiyo ndodo yapfo na wulalu njikuneenga mdambuye foyo. 37Iyo Mangi, nyi Mangi ya wamangi, na Mndumii-Ruwa o ruwehu nakuinengie wumangi, na pfinya na wuṟango na wuitoṟi! 38Na orio handu kui wandu, na mando hewikia na ha ngeṟa, malehe ha kundu ko pichinyi na malehe herunduka nginehu, kodambikio, kakudeeya isho shose shikae shia wuitoṟi wopfo. Iyo nyi mdo fulya fo sahabu. 39Numa yapfo kochiwada wumangi wungi, wumangi wo wochiwa wufafa. Numa wochicha wumangi wungi, wo kaṟaṟu wui ofano lo aṟeṟa, nyiwo wochiitoṟia wuyana wose. 40Wumangi wo kana wochifanana na menya ya mnganya; kipfa menya yekefunja-funja shindo shose na ishiwinza; chando yekewinza na wudo kechiwutika. 41Chando kulewona njayo tsa madende na shimnyo shilonganyi teri na menya, wumangi wo wochihawukana, indi kochiwadapfo pfinya ya menya, chando kulewona menya isanganyi na teri ii odoko. 42Chando shimnyo shilya na njayo tsake tsiwelonganyi menya na teri, na wudo wumangiwo wochiwa kyenga wuwade pfinya na kyenga wulawode pfinya. 43Chandu kulewona menya iya iwelonganyi na teri na odoko wechilongalonga mbihu yawo na mbeu tsa wandu ma kikawa kido shechisanganapfo; chando menya ilechiwa isanza na teri. 44Maheri ho ha wamangi wo wose hakamsia Ruwa o ruwehu nechihoṟotsa wumangi wungi wulechimanda mlungana wochiwa isembelia pfo, na kuwode wandu wechiwudeeyo-pfo, kipfa wochifunja-funja mangi tsingi tsose nawo wuitoṟie mlungana. 45Na chando kulewewona iho lilya lilekapa na ifunja-funja menya, aṟeṟa, teri, fesa na sahabu iya le mangi; Ruwa chu ang'anyi nyi akunda iloṟa mangi mbonyi tsechikaa tsiwutike ilyi numa; na ndodo i nyi ya kiilohi na mtambahaluye fu nyi fo lohi piu.

Mangi ainenga Danieli kiṟimiṟa

46Kyasia Nebukadneza ulya mangi, kaho wanda na kyaamu kapfiria Danieli ndi, kawawasa ke nainengo shiano na uvumba. 47Mangi kahaluo Danieli kambia, “Nyi kya lohi Ruwa chu onu nyi Ruwa kota maruwa hengi, nyi Mndumii-Ruwa o Wamangi aichi iloṟa shiṟike na ishihaluo pata - kipfa iyo noleidima iloṟa kiṟike ki.” 48Kyasia mangi kaṟumisha mnu Danieli, kamneenga shindo sha nnga shifoi, kamhaluo msongoru o wachili wose wa Babeli, kawewa na mchili o waṟango wose wa Babeli. 49Kake Danieli katerewa mangi ke Shadraki, Meshaki na Abednego wo wawe wachili wa Babeli; nao Danieli kakudamia o mongo fo mba ya Mangi.

Currently Selected:

DANIELI 2: KIM2

Highlight

Compare

Copy