AMOSI 7

Kiwonesio kya mwanduye

Kiwonesio kya kuwoka: Nzihe

1Ishi nsho Mndumii-Ruwa alenjiloṟa, ambuya, nalewika nzihe mawookyonyi ha ialuka lya kilimu kiheri kya fuli; ambuya iwekeri kilimu kiheri kya fuli mangi amemaa isambuo. 2Kikawa, kiheri nzihe tsamemarisa ilya mara halya mawishi ha orukenyi ngahamba, Hoi Mndumii-Ruwa hooṟia, ngakuterewa; Yakobo nechihoṟoka ada? Kipfa nai mtutu. 3Mndumii kailacha mahiyo ha kindo kilya awerie iwuta kahamba njechiwutasepfo nyi Mndumii ahamba.

Kiwonesio kya kawi: Modo

4Ishi nsho Mndumii-Ruwa alenjiloṟa; ambuya Mndumii-Ruwa nalelaha kundu nalimbane na modo; nafo fukakomba mṟinga fui mapichinyi ha mapalyipalyi kufui furumatse handu hahadutsu. 5Nalyo ngahamba, Hoi Mndumii-Ruwa leka, ngakuterewa; Yakobo nechihoṟoka ada? Kipfa nai mtutu. 6Mndumii kaweda-se na ilyi kahamba mbonyi tsi njechiwutasepfo, nyi Mndumii ahamba.

Kiwonesyo kya kaṟaṟu: Orusu lomasa iho litutu (Timazi)

(Amo 7:7,8)

7Ishi nsho Mndumii alenjiloṟa, ambuya, Mndumii nahoṟoki kufui na omombo lo mba luiwiko nawode orusu na kindo kii cha kipiṟinyi kya menya kehoṟotsa mba owokonyi loke. 8Mndumii kanjiwia, Amosi, kiki kuwonyi? Ngahamba, Njiwonyi kipiṟinyi. Nlyo Mndumii kahamba, Ambuya njechiwika kipiṟinyi na orusu kiidi kya wandu wa, njechiwada-se manyalepfo; 9na handu hakuirie ha ko Isaki hechiwa ngafu; na handu haele ha Israeli hechinyamaṟika; na inyi njechikure njilimbane na mba ya Yeroboamu kui oshu.

Amosi na Amazia

10Nalyo Amazia, mkohanyi o Beteli, aledikya Yeroboamu mangi ya Israeli ndumi kehamba, Amosi nalekuṟiingia iyo na mba yapfo na Israeli yose; orukalu loidima ikarishiya madedo hake hose-pfo. 11Kipfa Amosi nahamba adi, Yeroboamu nechipfa ko oshu, nankya lohi Israeli nechidao ampfunge lang'u, nawuto orukenyi loke. 12Na Amazia kawia Amosi, O iyo malya wona, kure aa, dichia oruka lo Yuda, ulyiiepfo mkate, uhende iduopfo wuikimbi; 13ulakooyo ochihamba kisuku kunu Beteli; kipfa nyi handu haele ha mangi nayo nyi mba ya wumangi. 14Nalyo Amosi kahaluo kawia Amazia, “Inyi njilemewe mwikimbipfo, manya mbei mana o mwikimbipfo; mbei mlisi o shuuma na moambuya mkuyu. 15Nao Mndumii kanjilaha ngaidikya ndaho yake kanjiwia, “Henda ikimbia wandu wako Israeli. 16Wulalu adanyia idedo lya Mndumii. Iyo nohamba, Ulaikimbe kya Israeli, ang'u ulawute idedo kiidi kya mba ya Isaki; 17Ko ikyo Mndumii nyi ahamba adi, Mka opfo nyechiwa mmeluki na mṟuhui mṟinyi, wana wapfo wa kika na wa kiumi wechiwooho nyi oshu, na dema lyapfo lyechihawo kui shiwoho-kyahu kui kyahu; na iyo kumonyi nyi ochipfa orukenyi lo ngafu; na kya lohi Israeli nyechidao kuleshe ai mpfungo awuka orukenyi loke.”

Currently Selected:

AMOSI 7: KIM2

Highlight

Compare

Copy