AMOSI 6

Ihoṟoyo kipfa ke kuidikisha

1Ochia lowo iwo wakeri ikyeseka na ichihiyo kiidi kya Sioni na iwa wakeri olelenyi ipfo fumvunyi lya Samaria, wandu wang'anyi kiidi kya oshari lo wandu wa mbooko iwo mba ya Israeli yekewahendia. 2Idenyi itane Kalne, muwone; hendenyise Hamati ing'anyi, sokenyi itane Gati ya Wafilisti; ngesa nyo mui wecha kota mangi tsi? Ang'u mṟasa fowo fung'anyi kota mṟasa fonu? 3Nyo muwikie mkonu fo fung'anyi mbicho haleshe, na ikuruo hafui kidembo kya wutahachi; 4ochia lonu nyo mukelaa shitaṟenyi shishiwike membe na ikuhoṟoya shitaṟenyi shelaho semadari; nyo mokelya huṟuwi na mahache ha mfiṟihenyi; 5nyo mokeimba shiimbo sha wutondo hamu na maṟu ha shinanda, na isungusia shinanda sha mbaṟi tsiingi cha shinanda sha Dawidi; 6nyo mokenyo mpfinyo na mamboṟiko, na ikushia mafuda ha opfaamo lui lucha; indi walasokyo mfowa kipfa kya matuuro ha Yosefu? 7Wulalu kipfa kya isho wulalu wechihenda wusingenyi hamu na walya wa kuwooka wechihenda wusingenyi, na kifahiyo kya temo kya iwo walekuhoṟwo kechitsitsa.

8Mndumii nyalelya nyamu yake, so Ruwa Menyi Matorito; Ngamina kiṟumi kya Yakobo, ngasuiṟo nyi mamba hake; kipfa kya ikyo, njechiwutaho mṟi fo hamu na wose waipfo. 9Na kyo kokoya kotsuhaa ho wasoṟo ikumi kiidi kya mba imu wechipfa. 10Na washidiye o mndu ili echimiira, ulya akoṟie modo, kundu nawute mafuo hake, kanyi, na ulya ili echiwia ichu ai ora lo kya mba, “Ngesa na kui mndu oose oo?” Na kamhaluo wai ote; nlyong'u echihamba, Tsia sau; kipfa luwode momu fosenda rina lya Mndumii-pfo. 11Kipfa ambuya, Mndumii nawuta iwawaso; mba ing'anyi yechikapo na iwunduyo na mba ntutu yechikapo ipaṟikye mahinga. 12Alewo! Frasi wewikya mteeṟa huya iṟaṟa Alewo! Mndu nechiidima idema na ikumbi lyekekuruo nyi mbe mṟingenyi? Wulalu mohaluo kilya kisumhanyi kipfuṟi na ndunda tsa wulohi tsikawawa. 13Nyo mokechihiṟo nyi mbonyi tsa maai, mokehamba, Ngesa chi lulekuwonyia membe kui pfinya tsadu so luwenyi? 14Kipfa, ambuya, njechiamtsa wandu wa mkambo huye yapfo iyo mba ya Israeli, Mndumii-Ruwa menyi matorito ahamba, wo wechimlisa wukiwa wokia kichumi keida na Hamati mṟasa kimeda kya Araba.

Currently Selected:

AMOSI 6: KIM2

Highlight

Compare

Copy