AMOSI 5

Kifihiṟo kya Amosi

1Adanyienyi idedo lyi njikeri ilihamba liwe kifuhiyo na imsotsia fowa, nyo mba ya Israeli,

2Mkeha o Israeli naomboka;

echiidima ikure-sepfo;

Naombotso kiidi kya oruka loke;

kuwode mndu momiiriapfo.

3Kipfa Mndumii-Ruwa nahamba adi; Mṟi fuwode wandu kiku, fochitsuhaṟio wandu ihana limu, na mṟi fuwode wandu ihana, fochitsuhaṟio wandu ikumi, wa mba ya Israeli. 4Kipfa Mndumii nawia adi wandu wa Israeli, Njishihenyi inyi, nanyo mochikaa na moo; 5manya mlashihe Betheli; ma mulaide Giligali manya mlaide Beeri-sheba, kipfa Giligali kii lohi yechidao wusingenyi, na Beteli yechiwa wulya. 6Shihenyi Mndumii nanyo mochikaa na moo; nalawone kechiaka cha modo ipfo kanyi ko Yosefu, modo fukarumatsa, kulechikaapfo mndu echiidima ifurumisha ipfo Beteli. 7Nyo mokehaluo njowingo tsikawa njiwawo, na iembeṟutsa wukiilohi, 8 shihenyi ulya awikie Kilimia na Orioni, na ihalutsa kiṟinje kya opfu iwa ngamenyi, na ihaluo mfiri fuwe meema fuwe kio; ichu aidima ilaha mṟinga fo ipalyipalyi, na ifuletsia wanda terinyi; Mndumii nlyo rina lyake; 9ichu aidima iende orumatso peṟeseng'u kiidi kya wandu waapfinya; itane orumatso loolotsa omombo lo mba. 10Wo wasuo ulya modedia ai mongonyi, nawo-da weketoromisha modeda ki kicha. 11Kyasia kipfa kya ili mokewonyia mkiwa, na imsoka ngano yake; nyo muwikie mba tsa maho matsane, indi mochikaapfo-pfo; mudemiye madema mecha ha msabibu, indi mochinyo mvinyo fo fopfo. 12Kipfa njiichi chando mawicho hanu hafoi, na chando wunyamaṟi wonu wung'anyi; nyo mokewonyia wenyi wusumhanyi, mokeambya shetsutsuma, na ihaluo walya wahuṟi oo mongonyi walawone kilya kiwasumhanyi. 13Kipfa kya ikyo mndu ulya mṟango nechitsia sau akeri cha iho, kipfa nyi kiheri kiwicho. 14Shihenyi mecha, manya chi mawicho pfo, mukae na moo; kundu Mndumii-Ruwa menyi matorito nakae kiidi kyanu chando muihamba. 15Suonyi mawicho; kundenyi mecha; ukiilohi wuwe kyooṟa mongonyi, kulako Mndumii-Ruwa menyi matorito, kyechiwutia mecha walya watsuhaa wa Yosefu. 16Kipfa kya isho, Mndumii-Ruwa menyi matorito ahamba ichu ai Mndumii; Kochiwada kifuhiyo kiidi kya njia tsing'anyi tsose, nawo wehenda wechihamba, Ochia! Ochia! Wechilaha mndu mdemi nache nakape kilio, na iwo waichi ifuha wakape kilio. 17Kingise Ipfo mademenyi hose ha msabibu kochikaapfo ifuha, kipfa inyi njechiida makidi hawi hapfo-nyi wudo Mndumii ahamba.

18Ochia lonu! Nyo muilanga mfiri fo Mndumii nkili muilanga mfiri fo Mndumii? Nyi meema chi sapfo. 19Nyi cha mndu aledichia miiso, kakoyana na ngaṟe, ang'u mndu aleida na mba kawika owoko loke mawandenyi, kaimado nyi njoka. 20Ngesa mfiri fo Mndumii fochiwa meema, ma chi saapfo? Ee, fuwode mema puti, ma kuwode ngeela-pfo. 21 Inyi njisuo mkonu yanu inene, njiiminyie, njimchihiṟe nyi shisanzyo sho shanu sha wuindipfo. 22Ee, ma chando muinjiwutia mwaano yanu yemaya modonyi na ya mso yanu, njechiiambyapfo; ma njechiambya mwaano yanu ya ofoṟo na ya shuuma shinorupfo. 23Irenyi iya kifahyo kya shiimbo shanu; njilakundi iicho ṟu lya shinanda shanu. 24Indi mwanduye fusoke cha mṟinga, na ukiilohi cha mṟinga fufoi. 25 Ngesa namlenjiendie mwaano na shidaso kulya nuka maaka iya makumi haana, nyo mba ya Israeli? 26Ee, mochiduo Sikuthi mangi yanu na Kiuni Sanamu yanu, nyenyeri ya ruwa onu, mulemsungusia muwenyi. 27Kui kipfa ikyo njechimsamiṟa mui wapfungo, muhende kuleshi muide Damesiki, Mndumii ahamba, ichu elaho nyi Ruwa menyi matorito.

Currently Selected:

AMOSI 5: KIM2

Highlight

Compare

Copy