MAWUTO HA WASU 20
20
1Kitohyo kilya kekiida Paulo kalaha wa kiloshyonyi kawasanza kyewakapya owanzo kasamana nawo kawuka-ho kehenda Makedonyia. 2Na kekimaa iida shihongo shilya na iwawihiṟya moo kechihamba mbonyi kafoi kashika Ugriki. 3Kekimarisa-pfo meri iṟaṟu Wayuda wakamwida kiṟoṟowa ilindi awerie ihenda Siria na njia ya ipalyipalyi naho kawuya na njia yelenga kya Makedonyia. 4Wandu waleduana nao shika Asia nyi Sopateri, mana o Puro mndu Mberoya, na Aristariko na Sekundo wai Watesalonyikye, na Gayo awukye Deribe na Timoteo na Tikiko na Tirofimo wai wa Asia. 5Iwa wawemsongwo wakaluweda Troa. 6Natso lukaira kyaṟo kya ipalyipalyi, mkonu iya ya Pasaka ilemsia, lukawuka Filipi lukawakoya Troa kyaṟo kya mkonu itanu lukakaa-pfo mkonu mfungade.
Paulo akoyana na Waidikie Troa lyaifurumia
7Kikashika mfiri fo kuwoka fo mfungade ili luwei wasanze kyefunja mkate Paulo kawawia mbonyi akundi iira kyaṟo nahende ili lya ngama kaitika madedo hake itane koshika kio madumbwo hawi. 8Napfo kuwepfo taa sa tsifoi kulya kai kundo luwesanzi. 9Nahong'u manake umu elaho nyi Eutiko adamye itiṟishenyi kahombya mnu kipfa Paulo elunga mnu ideda kaoloka awuka kai-hu lya kaṟaṟu kahenda iiro-ho ampfa. 10Paulo kasoka kamhoya kamchunguṟya kahamba, “Kutsienyi mulatohye kyamba moo foke nawo fui nao.” 11Kyasia kawuya ido na kai kafunja mkate kalya, kaengeṟa ideda nawo shifoi itane koshika kilawo, nalyo kakure ihenda. 12Nawo wakahenda yende manake ulya ai na moo wakakaa wai wawihiṟye moo.
Paulo ahenda Mileto awuka Troa
13So lukasonguo iida na ngalawenyi lukahenda lukashika Aso lukundi yambya Paulo hando ho, kipfa nao nyi wudo awewawasye o amonyi kakunda ihenda kyaṟo kya madende. 14Kekilukoya kulya Aso lukamwambya lukashika Mitilene. 15Lukaawukapfo lukaida ngalawenyi ili lya ngama lukashika hando haambatsanyi na Kio. Ili lingi lukaafukia Samo na ili lya ngama lukashika Mileto. 16Nyi ili indi aweteṟye keida Efeso ai ngalawenyi nalashike ikeleo kulya Asia, kyamba aweidimadima akundi ishika Yerusalemu Pentekoste kokoya kyaidimika.
Paulo asamana na wameku wa Siṟi ya Efeso
17Paulo ai Mileto kaduma mndu nahende Efeso kalaha-pfo wameku wa siṟi. 18Wekicha yafukya koke kawawia, “Nawo muichi wokia mkonu fulya ndewoka ipfuṟukanya Asia njiwei msanze nanyo kiheri kyo kyose. 19Chando njiweisingya Mndumii kui ikunyiṟa lose na itonyitsya mchenyeṟe na shihesho shilya shilenjihoya kitewe nyi okuchu lo Wayuda walya. 20Nyi mwichi ke njilemṟika nyo idedo ma limu lii kiiṟa kyanupfo. Kya indi njiweimwongoya na imulosha ma njiwei patehu ma njiwewa ipfo mba. 21Njechiṟingishya Wayuda na Wagriki kya mdumbuye wakucheye nafo Ruwa na kya mwidikye wakuihetse na Mndumii odu Yesu. 22Kyasia ambuyenyi wulalu ngawada njia ihenda Yerusalemu njii mpfunge nyi Mumuyo ndamanye ma kindo kyekaa kintowoke-pfo. 23Shile nyi Mumuyo Mwele awa mombia mṟinyi kui mṟi kehamba ke nyi shiwoho shikeri injiweda-pfo na shiwira. 24 Kya indi njiiringa moo foko fuwembiia mlodopfo. Kilya njiiringa nyi kingi, nyi kundu njekaa njikumarisye ohendo loko lo kipfuṟukanyo kilya njii mdambikye nyi Mndumii Yesu kyeṟingishya ndumi njicha ya wutonga wo Ruwa.”
25“Na inyi njimonyi wulalu ngamanya ke nyo mose njilemwongoya wumangi njechiida ipfo na ipfo nyi mochikiwonana-se na kyamu kyakopfo. 26Nkyo kimaduma ngamṟingishya nyo mose mkonu fu fo inu, ke inyi njiwode mti fo samu ya mndu ma wu ma wupfo; njii mharami. 27Kyamba njilekushowa nde ndamwongoya kya chila ya Ruwa yosepfo. 28Kekuṟisenying'u nyo muwenyi, mbelisa na ipoo lyose ilyo Mumuyo Mwele ambikye kiidi kyalyo wakaṟa kundu mochilisa wuarya siṟi ii ya Ruwa alekuwonya kui samu ya Mana oke amonyi. 29Inyi na njiichi ke ngammaa ihenda mashite ha ngeṟenyi malang'a hechicha na konu halechiwado nyi sonu kya ipoo lipfo. 30Ma ipfo kiidi kyanu muweny kochiamka-pfo weṟdeda kya mkika wechikuruya wa kiloshyonyi ora lo kowo. 31Nkyo kimaduma kelaenying'u dembo na itamwo mbekutamuya chando njileikimba orio mndu chandu mukeri ose njechimutonyitsya mchenyeṟe ngamaa maka iṟaṟu kio na mfiri njilalekane-ho.
32“Kyasiang'u wulalu le ngamudambikyang'u Ruwa mukae wawanze nyi idedo lyo lya wutonga woke. Nyio Ruwa aidima imupfunga muwe mba na imwenenga kyoṟa kimu ipfo kundo wailishe wake wose walṟe. 33Na inyi njilepfula-ho ma fesa ma sahabu ma mṟae ya mndupfo. 34Nyo mbeichi muwenyi ke mawoko ho hako nyiho halenjitambahanya shindo shako shinshikye na sha wodoya wako. 35Na ishi shose njiwei mupfungya nasho mtaato kundu nanyo mukuwinyishe ipfuṟukanya wafafa mochikumbwo kilya Mndumii Yesu ahambye ke, ‘Nanga iinenga kota yambya.’” 36Kekiidima ihamba ado kapfira ndi katerewa nawo wose hando hamu. 37Wakafuha mnu wose wakahoya Paulo ipfo nzingony wakamhekya momu. 38Na kyeinenga wakahoyo mnu nyi fowa nyi kidedo kilya awawia ke nyi wechikaa wawonane-se nao kyamu kyakepfo. Wakahenda imwimia wakamshitsa ngalawenyi.
Paulo ahenda Yerusalemu
Currently Selected:
MAWUTO HA WASU 20: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
