MAWUTO HA WASU 21
21
1Kikashika loikimaa ilekana nawo na iira kyaṟo kyadu kya ngalawenyi lukashika Kosi na mteṟa fumu na ili lya ngama lukashika Rodo na wukapfo lukashika Patara. 2Lukaawona ngalawa yechiambada ishike Foenike lukadoya-pfo lukaira kyaṟo. 3Na loikiwona Kipro lukaida kya ora lo kumoso, lukahenda lukashika Siria lukasokya Tiro. Kyamba mpfondo ngalawa iya yadu iwesotsya mhanda yayo. 4Lokiwona wa kiloshyonyi lukakaa-pfo mkonu mfungade, nawo wakawia Paulo kui mweke fo Mumuyo Mwele ke nalado na Yerusalemu. 5Loikimaa iinutsya mafiri halya lukakure lukahenda. Na wandu wose handu hamu na waka na wana wawo wakaluimya lukatana loshika mbele ya mṟi lukapfiria ndi alya mbai ya ipalyipalyi lochiterewa. 6Lomemaa isamana lukadoya ngalawenyi, nawo wakawuya na kowo. 7Kyasia loikimarisa kyaṟo kyadu wuka Tiro lukashika Pitolemai, lukaiṟikiṟa wana wawama lukakaa kowo mkonu fumu. 8 Kukye ngamenyi lukahenda lukawuka-pfo lukashika Kaisaria, lukahenda ko Filipo moongwo ndumi ii ya sia awei umu o walya mfungade lukakaa koke. 9Mndu chu awewoṟde wana wake wawaka waana wechihamba shisuku. 10 Kyasia lokikaa-pfo mfiri sa ifoi mwikimbi kacha ewio rina lyake nyi Agabo kasoka awuka Yudaya. 11Kaluchea so kawada ngometa ya Paulo kakupfunga nayo amonyi madende ho na mawoko ho kahamba, “Mumuyo Mwele ahamba adi, mndu menyi ngometa ii Wayuda nyi wudong'u wechimpfunga ipfo Yerusalemu na imdambika mawokonyi ha wandu wa mbaṟi njihenu.” 12Luicho ishi so na wandu wa hando halya lukaterewa Paulo nalado nahende Yerusalemu. 13Paulo kahaluo, “Muiwika muda, ifuha na injifunya ngoo? Kyamba inyi njikuteseheṟye kya ipfungo na njiwekuṟeheṟye ma ihenda iwoho kyewikya rina lya Mndumii Yesu wuindi.” 14Nahong'u amleha kilya lombia lukakutsia lukahamba, “Kilya Mndumii amdumbuya kyake naakyo kiwutike.” 15Mafiri halya hekiida lukaira shindo shadu lukado luhende Yerusalemu. 16Wa kiloshyonyi wa kulya Kaisaria maata-ho wakaduana naso ihenda napfo, wakaluduo ko mndu ewio rina lyake nyi Mnason luleṟye ndichi ipfo kanyi koke, ei mndu o Kipro mwidiki o kuwoka.
Paulo ahenda iṟikiṟa Yakobo
17Loikishika Yerusalemu wanawawama wakaluambya na sia. 18Kukashika ili lya ngama Paulo kaida na ko Yakobo kimu naso na wameku wasongoru wose mpfondo wawei. 19Kekimaa iwaiṟikiṟa kawaongoya shilya shose kimu kimu isho Ruwa awetanye ko wandu wa mbaṟi njihenu kui kipfuṟukanyo kyake. 20Waicho wado wakaṟumisha Ruwa wakambia, “Monowama odu na uwonyi Wayuda wo waidikye chando washikye shiku nawo wose wawodo nyi nyashi yekapanya wuwawaso. 21Nawo walewio kyapfo ke nyi uilosha Wayuda wose iwo wai ipfo kiidi kya wa mbaṟi nyihenu wuṟingi woṟingya Mose kochiwawia waladine wana wawo manya walahendelye shido shi. 22Nyi luwike luda ngesa nyi ili wechiicho wose ke omcha. 23 Kyasiang'u keidikyawo iki luikuwia, Kunu kodu kwipfo wandu waana waa wapfunge nyi kyasa wawikye Ruwa. 24Duo wandu wo nokuilishe kimu nawo, nowainenge fesa waidime iwuta njui tsawo. Mpfondo wandu wose wechiwuta-ho imanya ke mbonyi tsilya walewio tsapfo tsose, ke chi kindopfo, kya indi iyo kumonyi okechumia kyomboho ochiringa necha wuwawaso wu. 25 Kya waidiki walya wawukye mkambonyi ya wahenu lulememaa idumbwo na iṟehya paruo ke wakae wechikuṟisa kya shindo shi shidasye mfanano na kya samu na kindo kiotswo na kya wuṟuhui.” 26Nalyo ili lya ngama Paulo kakusanza na wasoṟo walya kechikuilisha kimu nawo. Kilemba kido kahenda hekalunyi kehamba-ho imarisya lilya lya mkonu iya ya kiilishyo, kushike iwiko-ho kidaso kimaduma kya orio umu owo.
Paulo awodo
27Kyasia mfiri iya mfungade yekishika kufui na iinutsyo Wayuda wakambona walya wacheye kulya Asia wakambona kulya hekalunyi wakahaya wandu wose wakambada wakafihiṟa. 28“Lanye wasoṟo wa Israeli, kenjonyi muche wikya ngaya! A ichu mndu aanga molosha orio mndu ose kundo kose kya isutsa mkambo fu na wuwawaso wu na kundo ku kwele. Na kinene ya isho nyio aitsye Wagriki na hekalunyi kafanyitsa ado kundo ku kwele.” 29 Nyi ilindi wawembona Tirofimo Mwefeso ulya ai kimu nao kulya mṟinyi, wakakumbwo kulako Paulo nyi amemwitsa na hekalunyi. 30Mṟi fose fukawa kipfulupfulu wandu wakakambya ikusanza handu hamu wakawada Paulo wakamkuruo na ipfo nja wambuta hekalunyi. Oweṟe lo mongo ikashingo. 31Waiho wadi warie imbaha mbonyi tsikashikya mchili mnene o siṟi yose ya wasikari ke mṟi fose fo Yerusalemu fomba kipfulupfulu rambatanyi. 32Oweṟe naalo kaira wasikari na wachili wawo kasoka ihenda iwaosha echikambya. Nawo wekiwona mchili chu mnene na wasikari wakada walakikape Paulo. 33Mchili mnene katikiria afui kambada kawawasa ke napfungo na mshe iwi. Kawesa mbeo wu na kindo atanye mbekyo kiki. 34Na ipfo mamwinginyi wakafihiṟa wehamba wadi na wengi wakahamba wadi. Kekiwona alaidima imanya lohi ke nyi mbonyi tsa iki kipfa kya kifahyo kilya kawawasa nahende idao kulya otiriwenyi lo wasikari. 35Kekishika shiteṟenyi nado na huye wasikari wakamwira womwira kipfa kya wuapfinya wo mamwingi fulya. 36Cha kipfa kamba sa inene lya wandu walemwiwata wefihiṟa, “Wuta-ho mndu chu!”
Paulo adeda kyekuringa
37Nao Paulo kechiitso na kulya otiṟiwenyi kawia mchili chu mnene, “Njikuwodye momu njikuwie idedo?” Nao kahamba, “A uichi Kigriki? 38Akawo iyo chi Mmisiri ulya aleamtsa wuṟingi na wandu walya shiku shiina mkonu ii, walya welaho wawahi kawaduo kulya nuka?” 39Paulo kahamba, “Inyi nyi mndu Myuda njiwukye Tarso mṟi fo Kilikia, njii menyi kidembo kya ipfo mṟinyi fulai mfari. Ngakuterewa umbikie momu njikudedye na wandu wa.” 40Kyasia kekimbikya momu Paulo kahoṟoka alya shiterenyi kakemya wandu walya na owoko. Komtsia sau kadeda nawo kui kishomo kya Kiebri kehamba.
Currently Selected:
MAWUTO HA WASU 21: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
