2 WAKORINTO 9
9
1Imṟehia nyo kya kitarama kilya kyetarama waele walya lyo liwewa ikapa lya kawi. 2Kyamba njichi mteseheṟye fonu fo chila njifukushelia njemhamba nyo ipfo ko Wamakedonyia, ke Akaya nyi iwekuṟeheṟye wokia mta fo wukowu na nyashi yanu ilemwamtsa wafoi kya mwengeṟia. 3Indi ngamduma wanawawama iwa kundu ipfo kundo luwekushelye kipfa kyanu lulahoyo-ho sonu, kundu mukae-ho mukuṟeheṟye chando njilehamba. 4Kundu manya Wamakedonyia wakacha warianyi na inyi wawemkoya mulakuṟeheṟye lulashike ipfia sonu so njikuringe ihamba muwechipfia sonu nyo kya mkusihie fu lufurie. 5Nkyo kilenjinenga ihamba ke na kikaki na njitutume wanawawama iwa wasonguo ishike konu walawe ilaṟa necha mwaano fulya fonu mwoone fuwei mteṟye nyo kui kyasa wuka kacha, kundu fukae-ho fochiwedya ihenda dambiko fuwe mwaano mwoone fulawone fochiwa cha ishido lya wuikeremi.
6Nyi kikeri kiile, ke ichu mowaya wotonokwo echisambuo wotonokwo, na ichu owaya wosaṟia echisambuo wosaṟia. 7Orio mndu nalekie chando akudumbuya ipfo mdonyi kilawe nyi lya mnung'u ng'u kya mkoṟomu, kyamba Ruwa akundi mleki molekya na kyamu kilyi. 8Nao Ruwa ai na pfinya yemfeṟya shanu sha mweena kya orio kindo mkonu yose mochihelukya orio ngata njicha yose. 9 Chando kii-kiṟehye, Nyi atomoke kainenga wakiwa, wucha woke wokaa mlungana. 10 Na ichu moinenga ichu mowaya mbeu moinengya mkate fuwe shelya echimuinenga mbeu na itsipfumbutsa na ifoeṟa echifeṟa maalutso ha wuhoṟotsu wonu. 11Mochisuṟisho mudo kya shindo shose muwute-ho ilekya na mawoko hawi kyewonya Ruwa mwaano mwoone kui mweke fodu. 12Cha kipfa wupfuṟukanyi wu wo odambiko ilu loindya Ruwa wo wulaiheluya waele sheluya moo isho washiwuṟye tupu, kya indi wufeṟye na Ruwa mfeṟa fo shyaano shifoi echiwikyo, 13ipfo kundo wupfuṟukanyi wukeri wudi womshika imanyika wawuta-ho iṟumisha Ruwa kya wuhendeli wonu wohamba ndumi ya sia ya Kristo na kya mlungano fu mukuwodye nawo na wandu wose fuhoṟoki fudo. 14Na iterewa wechimterewya wamuwodyo m maacha kya wutonga wo Ruwa wumpfumbukye nyo. 15Ruwa nahende wikyo mwaano kya kisumbo kyake king'anye mdedye yose yekihamba.
Currently Selected:
2 WAKORINTO 9: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
