2 WAKORINTO 10
10
1Nao inyi Paulo ili njiimhambe wai ke ipfo oshangunyi njimkerye mmamiri indi ngamuwia ngolohoda ngamshika aleshe, nyi njikuwode na wuhoo na wuwongoya wo Kristo njemtutuma. 2Indi ngaterewa kundu njilawone njechiwa mkahari njii ipfo oshangunyi kui mkusihie fonjinenga ihamba njechiwikya tumbe iwa weluhamba so cha ili luwei wandu wehendekya mbaṟi ya kimbihu. 3Kyamba ichumia luichumia na mbihu indi lulakapana shida ya mbaṟi ya mbihu. 4Kyamba shisha sha ngapano yadu shilakeri sha kiwandu, kya indi shii-shiwikye pfinya nyi Ruwa yewunduo mṟi mikare lochiwunduo mloshye ya kiwandu. 5Luwewunduo na orio tunja yekuirya wuṟango wo Ruwa, lochilaṟa na mhie yose iwe yechihendelya Kristo. 6Natso lurie mteseheṟye fohoṟuo orio wulemi wose, shika nyo momekutoṟikya wuhendeli wonu.
7Shilya shii ipfo oshangunyi mushitukuye. Kokoya mndu akusirye koke amonyi ke o nyi ai mndu o Kristo, nawekusaṟa adi da ipfo koke amonyi ke chando o ai mndu o Kristo na wudo naso luwei wandu wa Kristo. 8Kyamba kokoya ngaengeṟa ihamba kyeṟumisha wuheki wodu Mndumii aleluinenga wuwe womlunga wulawe womuwunduo njechipfia sonupfo. 9Ndashike iwono cha nyi njikundi imwowesha kui paruo tsako. 10Cha kipfa kwipfo wehamba, hoo paruo tsilamye, mnu na yapfinya, indi kiheri aiho o amonyi afafaa adi kui mbihu na mdedye foke nyi fomina. 11Mndu modeda adi nakuteseheṟye ipfo koke mrimenyi iki, ke mkae iya lui nayo kui madedo ha paruo-hu lulamcha luwenyi nayo nyiyo iwe yadu ya kui mawuto lomcha so luwenyi.
12Ma lulakwaamye ikuitala kimu na iwo wekumanyisha wawenyi ma ikulinganyisha nawo; kya indi ipfo kundo wakuheṟa wawenyi na ikulinganyisha wawenyi mpfondo waashye imanya hando wai. 13Indi so lulakunda ikushela na kiṟumi kilawa ihesho, kya indi liwe lyechisumhanya kihesho kya kilya Ruwa alelupfungya kitane kyamelushitsa na ipfo konu. 14Kyamba so lulakuengeṟeṟa cha wandu walashika mṟasa konu cha kipfa lulemshika na mṟasa konu lochionguo ndumi ya-sia ya okiio ya Kristo. 15Manya lulakushela na kiṟumi kilawa ihesho ili kiwewiko na mweke fo mawina ha wengi indi lukushye ke mwidikye fonu fukang'ana lushike ilandaṟishyo mwaanya ipfo konu fuhianyi na kila kyadu kifeṟikye. 16Luwute-ho yongoya ndumi ya sia ya okiio ipfo kundo kukeri kuleshe na konu, lulawone lochikuṟumisha kui kila kii-kipfungye ungi kyekuihetsa na shindo shilemmaa isungusio.
17 Indi mndu mokuṟumisha nakuṟumishe ai Mndumii-hu. 18Kyamba chi ichu akuhamba amonyi awa mtechipfo shila nyi ichu aihambo nyi Mndumii.
Paulo na wasu wa wongo
Currently Selected:
2 WAKORINTO 10: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
