2 WAKORINTO 8
8
1 Indi lomwongoya le, nyo wanawawama, kya mwaano foana Ruwa fui-mdambike ipfo siṟinyi tsilya tsikeri ipfo Makedonyia. 2Cha kipfa msiha fowo fuwekuingikye fudi ipfo kundo wafoyo shihesho sha shiwira na wukiwa wowo mawowo shikafeṟa mfeṟa fulya fo wuleki wowo. 3Ngawaṟingishya ke waweṟamkye ilekya kiidikyanyi na wuidimi wowo na kiwuidye. 4Wakaitika iluterewa isanganyo mwaano fulya na kyaando kilya kepfurukanya waele. 5Ma walawelekia njia iya luwekusihye, kya indi walesonguo ikudambikya Mndumii wo wawenyi na ikudambikya so kui chila ya Ruwa. 6Nakyo kikaluenenga lomhenda itutuma Tito ke na mwaano fulya namarise ifusana na ipfo konu chando aweasye kyafo. 7Na chando mukeri mdonyi kya shindo shose kiwe kya wuidiki kiwe kya wuongoyi kiwe kya wutichi kiwe kya wuidimi wucha wose kiwe kya wukundi wuwukye kodu shika konu, na wudo mukuwike mdonyi kya mwaano fo.
8Chi ngadeda njidi njembikya iwawasopfo kya indi mtambahanye fulya fo walya wengi fukanenga lango tsehesha na onu lo mkundye fonu. 9Kyamba muichi ngata ya Mndumii odu Yesu Kristo irie wutonga woke, nyi ili awei msuṟi adi kahenda haluka mkiwa, kundu nyo ipfo wukiwenyi woke mukuwutie-ho iwa wasuṟi. 10Nyi ngatonga nakyo, kyamba iki kimwendye kiira nyo muwesonguo ikure mta fo wukowu chi kui iwuta tupupfo indi na kui ideda chila. 11Indi wulalu mumarise na iwuta lilya, na chando mteseheṟye fo chila iya fuweidikyanyi na shiya muwode, na imarisa lilya nalyo. 12Kyamba mteseheṟye fo chila kokoya fuiho nyi fuchihiṟye ipfo kundo kuwode kindo chi ipfo kundo kulawode. 13Kihendeke kido chi kundu wengi wahende yanguyo nanyo muhende irohyo, kya indi nyi kipfa kya mng'ang'ana. 14Oweṟe ilu lo wulalu mfoeṟa fonu fuire mbuṟye fowo kundu na mfoeṟa fowo fushike ihoya mwaanya foira mbuṟye fonu kundu mng'ang'ana fuwefo. 15 Na wudo ku-kuṟehye, Msa asanye shifoi naengeṟekyenyi, nao msa asanye shyangu nawuṟyenyi.
Tito na wodoe
16Indi Ruwa nawikyo mwaano kipfa kya wuidimi wulya wulya alemwamtsya nyo ipfo ngoonyi ya Tito. 17Ma awewedye nahede ai mbawasye, indi wuidimi wulya wumbodye kyanyo womwitika kawi kaira kyaṟo kyecha na konu awodo m macha. 18Indi handu hamu nao nyi lukaduma manowama ulya msa ai mwichike siṟinyi tsose kehamba ndumi ya sia ya okiio. 19Manya chi ikyo tupupfo, kya ind alesambuṟo nyi siṟi tso naduane naso kya mwaano fu fuipfuṟukanyo fudo nyiso kyewikya Mndumii mng'ano na imanyisha mkuteseheṟye fodu. 20Nyi wudo lukuringa ihenda iro wongo nyi mndu ma u kya osano lu luitambanyo nyiso lufo ludi. 21 Kyamba lokeitika ikumbuo kilya kisumuhana chi ipfo oshangunyi lo Mndumii tupu indi na ipfo oshangunyi lo wandu.
22Indi monowama chu odu lomduma hamu nawo, nyio lulemkoya kafoi mndu mtambanyi kya shindo shifoi, indi wulalu awa mtambahanyi kawi akusirye nanyo adi. 23Kyasia kiwe kya Tito, nyio mokyaṟo oko na mokyando onu; kiwe kya wanawawama wadu wo nyi wadume wa siṟi tso wariyo nyi mng'ano fo Kristo. 24Kikashika oo mumanyishe mkundie fonu oshangunyi lo siṟi tso fuwe fochisumhanana kiṟumi kilya luweimhamba nakyo kowo.
Kitarama ko Wakristo
Currently Selected:
2 WAKORINTO 8: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
