2 WAKORINTO 5
5
1Kyamba luichi ke mba ya tengo lyadu lya wanda ii ikasanjo luwode wiko liwukye ko Ruwa, mba ilanjiwike na mawoko ii ya mlungana ipfo ruwehu. 2Kyamba nakyo kyatewa luisumukya ili lueṟeṟukye iṟiko ṟao lingi nyilyo kikaya kyadu kiwukye ruwehu. 3Kombona lomeṟiko lulechikiwoneka-se li kitaṟe. 4Kyamba naso ilindi lukeri kunu tengonyi ili nyi lusumukya luiwalemye, cha kipfa lulakunda iheda yatuo kya indi likunda ishikyo ṟao lingi kundu kilya kii kyepfa kihende imeṟo nyi kilya kii mo. 5Na ichu aluteseheṟye iki iki nyio Ruwa amelusumba Mumuyo chu aluwiia mriteke.
6Nkyo kitewe lukarya hando hose na imanya ke mandi lui na mbihu fu kikaya kyadu lukeri aleshe na kanyi ka Mndumii. 7Kyamba kiluhendeshye nyi wuidiki chi iwonapfo. 8Indi lukarya na ikundya kya ngoseṟa isama mbihunyi fu na isamya ko Mndumii. 9Nkyo kimaduma imchihiṟa o ma lui na kikaya ma lulai na kikaya lyo lulikutanya kiṟumi. 10 Kyamba so lose pyu nyi kiluwaṟi ihoṟotso na pata ipfo mengenyi injidose nyi Kristo kundu orio mndu ose naambye kiheo kyake chando awetana kui mbihu shiwe nyi shicha a shiwe nyi shiwicho.
11Kyasia ili luichi wowu wo yowuo Mndumii nyi lokeisima wandu indi Ruwa nyio luimtambahalukya na kamu; indi njikusihye ke nyi lutambahalukye na konu mrimenyi ipfo kundo ngo tsa mrimenyi tsi njiilikishe. 12Lulawuya ikumanyisha luwenyi ipfo konu, kya indi nyi lomnenga mweke fokuṟumisha kyadu so kundumuwute-ho ikukaya nafo sumuhana na walya wekekushela na kiṟumi kya oshangu tupu kiladoye ngoonyi. 13Kyamba kiwe luleṟango nyi kya Ruwa kiwe luisango mhie nyi kipfa kyanu. 14Kyamba kilya kilusanza lomba kimu nyi makunda ha Kristo hakaluinenga ihamba iki, ke kwipfo ichu umu alepfia wose; mpfo kundo wamepfa wose. 15Nao nyi alepfia wose kundu iwo wai na moo walawone wechikukaya na moo kipfa kyawo wawenyi, kya indi wawe wechikaya nafo ichu alewapfia kashika iṟutso.
16Nkyo kyanenga wokia wulalu lukiichi mndu kui nyama tsake ma kawa upfo. Ma kikawa so luweichi Kristo kui nyama tsake, kya indi wulalu lulakimwichise ludi. 17Nkyo kyaenenga kokoya mndu ai Kristo-hu nyi amba mbika njihya; sha kacha shamesia, ate shose shamhenda ilawuka. 18Indi ishi shose shiwukye ko Ruwa ichu alusanzye so nao amonyi kui Kristo nao aluinengye wupfuṟukanyi wo kisanza-ki. 19Nyi kipfa Ruwa awei na Kristo kechisanza wuyana nao amonyi, nalawaitaya kisanza ki.
20Nkyo kyaenenga so lui wasu waende ndumi ya Kristo, na Ruwa nyi aimututuma ipfo kundu luideda, lomuterewa lui-wadume nyi Kristo, ke kundenyi isanzo na Ruwa. 21Ichu alaweichi wunyamaṟi nyio alemtana wunyamaṟi kimaduma kyadu so, kundu so luwe wenyi-wuhoṟotsu wo Ruwa lui mbihu-hu foke.
Currently Selected:
2 WAKORINTO 5: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
