1WATESALONYIKYE 4
4
1Iki kyamsia, wanawawama, luimterewa na imwikimba kui Mndumii Yesu kundu muitike ichumia mochihenda mbele chando muleambya kiwewukye kodu kiimtutumya mchumie ichihianyi na Ruwa, nanyo na muichumia mudo. 2Nanyo muichi mawawaso lulemwenenga na mweke fo Mndumii Yesu nyi maki. 3Kipfa kilya Ruwa akundi nyi wuilishi wonu, mudiche wuṟuhui. 4Orio mndu onu namanye ikuwonya iṟahembe lyake kui wuilishi na wuindi. 5Lilawe lya kya nyashi ya waaka. 6Cha kya mkambo ya kihenu ilaichi Ruwa. Ma mndu nalawone echieera manomae mbuchenyi ma imlemba, kipfa Mndumii ai mdeheli modehelya kya ishi shose chando lulemsonguo imbia na iṟingishia. 7Kyamba Ruwa alelulahia ngafupfo kya indi kawelulaha kui wuilishi. 8Nkyo kimaduma mndu aleha iki aileha mndu o wandupfo indi Ruwa chu alemwinenga nyo Mumuyo oke mwele. 9Indi kilya mulawuṟie muhende iṟehio kyakyo nyi kikundana, cha kipfa nyo muwenyi mui wapfunde nyi Ruwa kya ikundana muwenyi na wenyi. 10Mukawewutya ikyo na wanawawama wose wakeri ifo Makedonyia kose. Indi lomtutuma muwike-ho mwengeṟia. 11Muwe mowinya-ho kiṟumi kyanu mochipfirilia na ipfuṟukanya shilya shanu na iṟunda na mawoko hanu hamenyi, chando lulembawasya. 12Kundu muchumie ohendo lulawa idedyo nyi walya wai ora lo nja mulawuṟie mweke fowo hando.
Mndumii nyi akeri icha
13Nyo wanawawama, lokunda imdeya mulaichi kii kiteṟye kya walya walemaa iinutsopfo, kundu mulakae mochikuinadia cha walya wengi walawode kyekuwedya. 14Kipfa kokoya lokusirya ke Yesu alempfa kaweṟuka, na wudo Ruwa echiduo walya wai wainutsye njia imu nao iisume nyi Yesu. 15 Na iki lurie imbia lombia kii kidedo kya Mndumii nakyo kikeri kiile, ke so ili lochikoyo luitsuhaa lui na moo kiheri kilya kya iwuya lya Mndumii, manya lochisongoṟyo wai wainutsiepfo. 16Kipfa matika halya koichio iwawaso lyeamtsa ṟu lya msu mwele mchili na ombe lo Ruwa lochideda, Mndumii kachesoka ruwehu, oweṟe na lulya wapfie wa Kristo wechiṟuka wasonguo. 17Ikyo kilemba naso ili lui-se na moo luitsuhaa lochidao handu hamu na walya lui mapuchinyi lushike kumbuhanana na Mndumii ipfo mumuyohu. Na wudo lochikaa lui hamu na Mndumii maheri hose. 18Wihiṟianenyi moo nyo muwenyi na wenyi mochiongoyana oloho lu.
Ilaa dembo na iwedia Mndumii
Currently Selected:
1WATESALONYIKYE 4: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
