1 WAKORINTO 4
4
1Na wudo so orio mndu nalutane waṟundi wa Kristo na waheki wa kyama ki-koome kya Ruwa. 2Kikawa kido kitsuhae kyeringa waheki nyi nashike iwono ai mteechi. 3Kokoya ngahenda idumbuyo n-nyo mdumbuye mliwe ang'u nyi ngadumbuyo nyi menge ya kiwandu kiwe lyo likerye inyi kindo sa kitutu. Ma inyi ngakudumbuya mdumbuye njimonyipfo. 4Kyamba njilaichi kitewe. Kya indi ki kyansumhantsakyo, modumbuo kyako nyi Mndumii. 5Nkyo kimaduma mulahende idumbuo kiheri kilandewiṟa itane Mndumii ache ichu echiendie senyi shindo shii-shiṟikishe meemenyi na itambaṟuya necha patehu chila tsikuwode ngoonyi Mandi na halya orio mndu ose kiṟumi kilya kimsumhanye nyi echiwikyo nyi Ruwa. 6Nasho wanawawama, ngameshihalutsya ora lo kodu so na Apolo kimaduma kyanu, kundu mukuwutye kodu imanya ke kulatole shilya shii-shiṟehye, kundu ichu umu nalakushelye-ho kya ichu umu kechilehana na wengi kya ichu ungi. 7Kyamba nyi o ku akuwika iyo mdonyi. Nyi kiki ukiwode ulakiambye? Na kiwe nyi ukiambye nyi kyaki ukushela cha nyi kulakiambye? 8Mulemmaa ihuda mulemmaa ikusuṟia mulemmaa iwada wumangi tare so? Na kiwechiwa nanga mukawewona wumangi wu kundu naso lukae wumanginyi wu handu hamu nanyo. 9Kyamba ngahamba ke Ruwa alutanye so wasu luwe wandu wakinga numa luwe wepfa lukamewiia wuyana ṟiho lyeṟihisha wamalaika na wandu. 10So lui matondo kimaduma kya Kristo, indi nyo mui waṟango kui Kristo. So nyi wafafa indi nyo nyi wawanzi. Nyo mui na kiṟumi kicha so lui na wusutsu. 11Luwodo nyi njaa na nyoda shika saa ii lui nayo wulalu tichi lu wakuye maṟao lukapo ngapo lulawode kanyi kokaa. 12 Luiwina lochiluya moo kui maṟunda ha mawoko hadu luwenyi. Hando lohenda irumo nyi lowika-ho ona, hando lohenda iterengyo nyi lokutirisia. 13Hando lohenda iiryo kui wongo nyi lokededa kya wucha. Lui-watane maseheṟo ha wuyana luwembiia wose kindo kya manyeena shika inu. 14Ishi chi ngashiṟehya kundu njimhutsye sonupfo, kya indi kundu njimtutume nasho mui wana wako wakunde. 15Ma muwei na waichi wemwichia Kristo shiku na shiku chi muwode mudi na wemfee wafoipfo, kyamba nyio inyi njilemfee njii Kristo-hu kui ndumi ya sia ya okiio. 16 Nkyo kyantewa ngamtutuma ke muwe mokuwakisha na inyi. 17Nkyo kimaduma ndeduma Timoteo ipfo konu ai mana oko mkunde ai na mhendeli o Mndumii-hu, nyio echimkumbuṟa mhendeshye yako ya Kristo-hu iya njekeilosha orio siṟinyi hando hose. 18Kwipfo wakuṟumbashie cha ili ndaicha na konu. 19Indi njechicha na konu owinyi Mndumii kamkunda njechikaa njitichie kilya wakuidimye chi kilya wakudedye. 20Kyamba wumangi wo Ruwa wukukerye kundo kudedopfo kya indi nyi ipfo kundo kuwuto. 21Kilya mukundi nyi kiki? Njiche konu njirie iṟiiga ang'u njiche njirio nyi mkundye na mumuyo mwoloṟu?
Wuhendelyi wo Siṟi na chile shawuṟika siṟinyi
Currently Selected:
1 WAKORINTO 4: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
