Matewuji 5
5
Yesu ohowonga zela atu orelihiwa
Lukaji 6:20-23
1Mwa enne Yesu agaaonne atu oindjiva kamuharaga enne, ohodowaga gwela mwangoni, liye garati. Evale anamamuharaye kohoza vali liye. 2Noira eno, liye ohotapula mulomo waye, liye roma afundjihaga eraga:
3Orelihiwa ba atu osimela mmirimani mwewa, mwasiwa Umwene wa zulu gwewa.
4Orelihiwa ba atu anne ananla, mwasiwa aliwa anoza kadidilihiwe murima.
5Orelihiwa ba atu oviyeviha, mwasiwa aliwa anoza kavahiwe ilambo ya vati.
6Orelihiwa ba atu anne anafwanyeyana ndala vamohi na ntona zela funa wewa ira kakayena upama, mwasiwa anoza karumbale.
7Orelihiwa ba atu anne anaawendela afwiwa tangaranga, mwasiwa na aliwene anoza kawendeliwe tangaranga.
8Orelihiwa ba atu anne anafwanyeyana mirima dotchena, mwasiwa aliwa anoza kamuone Mulugu.
9Orelihiwa ba atu anne anaawandaniha afwiwa ira kawende vamohi mwa murendele, mwasiwa aliwa anoza kaitaniwege ana Mulugu.
10Orelihiwa ba atu anne anaharahariwa na mwasa oirana upama, mwasiwa Umwene wa zulu gwewa.
11Mwaruwaniwa, mwaharahariwa, mwawongeliwa mazu abure ounukedani zela nyo kala anamadiharaga, munokala orelihiwa. 12Kauirelani jabure jatene ejo inafwanela muhagalale eto muziveliwe,#5:12 Kauirelani jabure jatene ejo inafwanela muhagalale eto muziveliwe: Ku wonga maliba laleya aalaleyaga atu, unowanda kana ziveliwa zela twaruwa wewa eto alramwisiwa nari aruwaniwa, unowanda kana ziveliwa ira: <<Dihikana yoing'anela ilukulu zulu.>> (Joira ja Anamarumiwa 5:41) mwasiwa muhukana yotambilra ilukulu ilambo ya zulu. Tchoira anamafiyiheda a malambo a mundulri na aliwene koharahariwa na makalelo amohive.
Mwinnyu no wareya wa ilambo
Markuji 9:50; Lukaji 14:34-35
13<<Nyo muli mwinnyu wa ilambo ya vati.#5:13 Nyo muli mwinnyu wa ilambo ya vati. Mwinnyu tchi yengo yoziviha udja eto tchi yengo yokaliha pama jengo nnga somba nari nyama ira jahavunde. Yesu afuna anamamuharaye kazena ziva eto kalabe ira ilambo ya vati yahavunde. Mbwenye mwinnyu yozivele yamalamo, kanawelela kana yoziva ya mwinnyu akoka. Kanakana mabasa para yengo ili yatene. So unatatiliwa bahi ira anyingaliwege na atu.
14<<Nyo muli wareya wa ilambo.#5:14 Nyo muli wareya wa ilambo. Mulugu apandutchaga ilambo ya vati, liye aavahile atu ira kakale anno kafuna sogolrelra na matongelo aye mwilamboni ya vati. Na vanove mabasa a Mulugu anadowave sogolro muwari mwa atu omuroromela Mulugu. Atu a mwilamboni ya vati anawenda pipiri pipiri kahaiziwile yengo tchivi. Atu omuroromela Yesu banawanda kala wareya para anno anakala muisini. Sidadi imangiwe vazulu va mwango, kinakoyeya, inooneya na atu atene. 15Eto nne kalivo mutu unatukula panti, ahindiha, agudumeya na ngogoda. Mbwenye mutu ahindiha panti, unahiya vazulu vapama ira yaamoneyege atu atene anakala mmba mule. 16Sawasawa nnga nyo, inafwanela muhindihege wareya wenyu vamentoni va atu ira kaona mabasa apama analaba nyo, kamutamalelege Babinyu uli zulu.
Yesu ohowonga zela malamulo
17<<Kamuumbuwele ira miyo dizele kwiha malamulo na jengo jilrembile anamafiyiheda, nari. Miyo kadizele kwiha, mbwenye dizele kwakwaneliheda. 18Tchoira na ibaribari nnouwandelani ira zulu na ilambo ya vati jagaliwove, kilivo ponto ikitikiti nne yolremba ing'onong'ono inafuna kumamo mmalamuloni, jatene jahanakwakwanele.#5:18 kilivo ponto ikitikiti nne yolremba ing'onong'ono inafuna kumamo mmalamuloni: Tempu yawenda Yesu mwilamboni ya vati, ahanakwe, yalive tempu yowenda na malamulo. (Galasiya 4:4-5) Mazwale Yesu awongile ahanakwe. Yesu ohokwakwaneliheda malamulo nnga mwawongele liye. Yesu eto okwakwaneliheda mazu kalrembile anamafiyiheda mokala Nvulusi kamuwonga atu. Nona akwaga vamuradini, mazu ogomiheda awongile liye ali oira: Jatene jihikwakwanela! (Juwawu 19:30) Eto mazu anowonga ira Yopangana ya Wanle ihivira, nihivolowa tempu ixa eto nnawenda na malamulo maxa. (Eberewu 7:12, 8:6,7,13) Ku wonga mazwala kinatapulela ira inafwanela niwendegeve na malamulo matene a wanle. So anatapulela ira Yesu uhuwanda kunga tempu ixa muwari mokwakwaneliheda jatene jilrembiwe wanle. Ku wonga Yesu katatinle malamulo na mazu a anamafiyiheda. Liye mbwenye ohokwakwaneliheda. Nona tempu ili hiyo ila hiyo kannapa mabila nnga mwarumiwele atu wanle. (Levitiku 1:1-5) Tapulela ira inafwanela atu omuroromela Yesu kawendege na mawendelo maxa ozela mazu kalrembiwe Yesu agakwile, agavennye mokwani, hiya wendaga na makalelo kavahiwe aIzarayeli wanle.
19<<Nona, akala ukala mutu mmohi unavungula mmalamuloni mule nlamulo nimohi ning'ining'ini, aawandelaga afwaye ira kamusazihege, mutu wenno unakala ogomiheda muwari mwa Umwene wa zulu. Mbwenye mutu wenno unaharihamo malamulo ale, aawandelaga afwaye ira kaharege, liye gunafuna za kala mundimuwa muwari mwa Umwene wa zulu.#5:19 unavungula mmalamuloni mule nlamulo nimohi ning'ining'ini: Mazwala kinatapulela ira Yesu agakwile, ilive yofuneya ira atu kawendegeve na malamulo a wanle. Tchoira muwari mwa malamulo a wanle, atu kapa mabila na mbuzi na ng'ombe zela jotega jiwa. Eto Yesu agakwile, atu omuroromela Yesu oroma kohogaratela, aliwa ona ira kinafwanela aruma atu ohokala aJudewu ira kairegena sanganiko nnafwanyeya mmalamuloni. (Joira ja Anamarumiwa 15:1-31) Mazwala eto anatapulela zela tempu yehu ila ira kalivo unafuna vungula mangano Mulugu aavahile liye atu omuroromela Yesu ira kawendegena. 20Tchoira nnouwandelani ira upama wenyu wahakwaranye upama wa anamafundjiha malamulo na aFarizewu, kamuza muvolowa Umwene wa zulu.#5:20 upama wenyu wahakwaranye upama wa anamafundjiha malamulo na aFarizewu: Fwanyeya ira ora yenno anamafundjiha malamulo na aFarizewu kafwanyeya kagali annya oiziwa eto ofundjiha mazu a Mulugu. Ora yenno aJudewu kaoniwa nnga annya ofuna vulusiwa. Mbwenye nafwanya Matewuji 23:1-35 nari Lukaji 18:9-14, nnofwanya ira aliwa kohokana uyesa hiyaniha no kana upama ovahiwa na Mulugu muwari moleveleliwa jotega momuroromela Yesu Kiristu. Aliwa kohokana upama kakungile atu oka hiya kana upama wenno Mulugu unanivaha liye. Nione Roma 9:31-32, 10:1-4.
Ibaribari zela nlamulo noira kupe
21<<Nyo muhuvwa mazu kawongiwe wanle na makolo a mundulri ira: <Kumpe mutu. Ule unampa mutu, unotongiwa.> 22Miyo mbwenye nnauwandelani ira ule unatakaleliwa na mbalaye unotongiwa. Ule unampeta mbalaye unotongiwa na andimuwa. Ule unawonga na nfwaye eraga: <We zimora we>, ukana mulandu owanda mudowana munloni ohokana goma uwa.#5:22 ule unatakaleliwa na mbalaye unotongiwa: Ku wonga Mulugu kanatonga joirave mbwenye unotonga joira jehu vamohi na joumbuwela jehu. AJudewu kaumbuwela ira ruwana no petana kahi yengo, malringana kahampa mutu. Yesu mbwenye ohafundjiha ira muwari mwa nlamulo noira kumpe mutu, ule unamuruwana mutu nari unampeta mutu gu mpanga mmirimani mwaye mwasiwa unafuna amuirele ubure.
Zelru para wenno umutegenle nfwaye
23<<Mwa eno, we wadowa uvelelaga ibuwani mukuto wa Mulugu, waumbuwela wewule ira: <Ukala mbalaga unna makani na miyo>, 24inafwanela uhiye mukuto wawo ule wewule sogolro wa ibuwa, udowe wababihe teyihana na mbalawo ule ira jejile jimale. Amala we podi wela dowa velela mukutole pama wa Mulugu.#5:24 mukuto wawo: Wanle aIzarayeli kohokana mikuto davelela atu. Mbwenye vakwile Yesu vamuradini, ja mikuto johogoma evale. (Eberewu 9:24-28) Tempu ili hiyo ila, mikuto dihanle ku mutamalela Yesu Kiristu no irana jengo japama no vahana. (Eberewu 13:15-16) Mazwala anatapulela ira wafunaga mutamalela Mulugu, waumbuwela ira uhukana makani na nfwawo, inafwanela ubabihe tamangela wa liye, wasakanyedewo. Wamala ulabe mabasawo omutamalela Mulugu. Eto fwanyeya ira Pawulo ohakokomeza aKorinto ira karome viing'ana kahanadje seya. (1 Korinto 11:28-31)
25<<Mutu akana mulandu na weyo, wamuona ira unafuna afiyena wa anamatonga, inafwanela unfwanye mundila mwahanafiye matongelo, uvayele rumela jiirile we. Tawiha ira nfwawole liye podi dowa usumela vamentoni va namatonga. Evale namatonga unouvaheda mmandani mwa gwarda, liye ufungela mukadeya. 26Nnafuna duwandeleni ibaribari. Weyo kuza ukumamo mukadeya mule wahanapagalri kobiri yatenene.
Ibaribari zela nlamulo noira kuraruwe
27<<Nyo muhuvwa mazu kawongiwe wanle ira: <Kuraruwe.> 28Miyo mbwenye nnauwandelani ira mutu uli watene unamuing'ane muhiyana amusilrilraga, masiki ahamugonnena, uhumala murarutcha mmirimani mwaye.#5:28 unamuing'ane muhiyana amusilrilraga: Mazwala tapulela ira inafwanela mulombwana amuona muhiyana oriya azaga, awande tatilela meso aye vati hiya muing'ana gagara muwari monfuna.
29<<Akala niso nawo na muwononi odjana nnoutegiha, yali yapama ukumihemo utatile. Mwasiwa ili pama we puzeya yano imohi ya maningwawo, hiyanihana maningo matene aliwa dowa munloni ohokana goma uwa. 30Eto akala ndanda nawo na muwononi odjana nnoutegiha, yali yofwanela ugwadewo utatile. Tchoira ili yapama puzeya yano imohi ya maningwawo, hiyanihana maningo matene aliwa dowa munloni ohokana goma uwa.#5:30 akala ndanda nawo… nnoutegiha, yali yofwanela ugwadewo: Yokokomeza ilukulu ili eva kahi ira nigwadege jano jehu owu nivipe. Tchoira masiki mutu adula niso naye nimohi, unowanda tega na nimohi niwa nihanle. So mbwenye Yesu unanikokomeza ira nigwadewo yengo ili yatene inanitegiha inaziveliwa hiyo nnga nnaziveliwa hiyo jano jehu. Akala weyo unoziveliwa ona mavidiyo a ahiyana kahawarile pama, inafwanela utimihe jatene ejo jinafwanyeya muwari mwa telefoni yawo. Eto akala katchaso inoutegiha, inafwanela wahavire evo vinatega we. Akala kunawanda wendiha pama jifuwo jawo, inafwanela ugulihe datene, uvume vande vawo, hiyaniha no kangana malambo matene na afwawo. Ku wonga inafwanela niwanege kondo ira nahatege. Ayo ba makalelo ogwadawo ejo jinanitegiha.
Ibaribari zela nkani omwalana
Matewuji 19:1-9; Markuji 10:1-12; Lukaji 16:18
31<<Eto wanle yohowongiwa ira: <Mutu wenne unamulanye muhiyanaye inafwanela alrembe karta nowonga zela mwalana wewa, anvahede muhiyanaye ule.>#Detoronomiyo 24:1 32Miyo mbwenye nnouwandelani ira mutu uli watene unamulanye muhiyanaye ahali na nkani oraruwa, unamuraruwiha.#5:32 mutu uli watene unamulanye muhiyanaye ahali na nkani oraruwa, unamuraruwiha. Ku wonga mulombwana amulanya muhiyanaye ahali na mwasa oraruwa, muhiyanole adowa ateliwa na mulombwana mmohiwa, liye enne unararuwa. Mbwenye muwari moraruwa mule, mazu ananiwandela ira mulombwana wenno umuhiyile uhukana mulandu, mwasiwa gu liyene usakanyile ira muhiyanaye ule araruwe. Na mwasa wenno mulombwana amuhiyaga muhiyanaye vahali mwasa, inafwanela aiziwe ira muhiyanole adowa ateliwa na mulombwana mmohiwa, uhukana yotega yoira unamuraruwiha muhiyanaye. Ku wonga liye gunaziha yotega para muhiyanaye ule. (Matewuji 18:7) Eto ule unavenya adowa amutela muhiyana omwalana na mamunaye, na liyene unararuwa.
Ibaribari zela muselu olumbela
33<<Nyo muhuvwa mazu kawongiwe wanle na makolo a mundulri ira: <Kulumbele zela yengo yohokala ya ibaribari. Mbwenye inafwanela ukwakwanelihede inalumbela we vamentoni va Nabwiya!>#Levitiku 19:12; Numero 30:2 34Miyo mbwenye nnauwandelani ira kamukayena makalelo olumbelela yengo ili yatene. Nne kamulumbelele zulu. Mwasiwa zulu ku wewo unafwanyeya mpando wa Umwene wa Mulugu. 35Nne kulumbelele ilambo ya vati, mwasiwa ilambo ya vati ili nnga yengo yonyingalihavo manyalo aye. Nne kulumbelele Jeruzalemu, mwasiwa tchi sidadi ya Mwene mundimuwa!#5:35 Jeruzalemu, mwasiwa tchi sidadi ya Mwene mundimuwa: Mwene unawongiwa gu Mulugu. Nione 2 Koronika 6:4-6. 36Nne kulumbelele muru wawo, mwasiwa weyo kuza usandutcha nne nsisi nimohi na mmuruni mwawo ira nikale notchena, owu hehi nikale nodiba. 37Mbwenye akala he, muwongege he. Akala hehi, hehi. Wonga wenyu wakwaranya evo, wonga wewo ukumenle ubureni.
Ibaribari zela muselu owelihedana kunyakunya
Lukaji 6:29-30
38<<Nyo muhuvwa mazu kawongiwe wanle ira: <Mutu amudula nfwaye niso, na liyene aduliwe niso naye. Mutu amudula nfwaye nino, na liyene aduliwe nino naye.>#Ezodu 21:24; Levitiku 24:20; Detoronomiyo 19:21 39Miyo mbwenye nnauwandelani ira kammulimbegena mutu wabure. Mbwenye mutu wenne unauvahe nikofi ntama na muwononi odjana inafwanela urungunutche ntama nimohi niwa na muwononi oromana ira auvahe nikofi nimohi niwa. 40Eto mutu ausumela mofuna uwaka kamizawo, umuhiyede na kapene ira atukule. 41Eto wamuona mutu aza autukuliha mitolro ira uwendena kilometuru imohi,#5:41 wamuona mutu aza autukuliha mitolro ira uwendena kilometuru imohi: Malambo a mundulrimu, kohokalawo atu kavahiwe utongi na guverno oasoka atu ira katukulege jengo ja guverno. Malringana kamugumanana mutu awendaga mundila, konvaheda mitolro dile ira awendegena kilometuru imohi. inafwanela uwendena kilometuru mbinli. 42Unvahege mutu wenne unauvepa eto mutu aza afunaga uboliha yengo, kumukondihe.
Ibaribari zela muselu oazivela amwidani
Lukaji 6:27-28,32-36
43<<Nyo muhuvwa mazu kawongiwe wanle ira: <Umuziveliwege mutu uli watene eto umuidege mwidanawo!>#Levitiku 19:18 44Miyo mbwenye nnauwandelani ira mwaaziveliwege amwidani enyu eto mwaalobelelege atu anne anauharaharani 45ira muwande kala ahima a Babinyu wenno unafwanyeya zulu. Mwasiwa liye gunawanda zihawo nzuwa naamoneyelaga atu abure na apama. Eto arumbwihaga muzongwe kanasakulra. Unaarumbwihela atu abure na atu apama. 46Kodi mwaaziveliwa atu anne anauziveliwani bahi, era eno, munafuna mukayena yotambilra nni?#5:46 mwaaziveliwa atu anne anauziveliwani bahi, era eno, munafuna mukayena yotambilra nni? Va Yesu uli vari vokokomeza jengo jahanaziveliwa atu irana. Yesu unanikokomeza ira nikale atu oaziveliwa ale ananiida eto naalobelelege ale ananiharahara, mwasiwa nihikana ibaribari ira Mulugu unomutambilriha mutu zela joira jaye. Ku wonga akala uli mutu omuroromela Yesu, wamuhiya mutu aukoma wahamuweliheda, Mulugu gunafuna utambilriha upama. Akala ukala uudjenlre, Mulugu gunafuna uweliheda yenno idjelriwe we. Akala wire kapatchihiwa mitolro, wawendana kilometuru mbinli hiya imohi, unafuna utambilriha gu Mulugu. Ku wonga Yesu unaniwandela ira muwari moaziveliwa ale ananiida, hiyo kannapuzeya mwasiwa unafuna nitambilriha gu Mulugu. Mazwala kinawonga ira leveleliwa jotega unazela muwari mwa mabasa analaba hiyo. Tchoira Matewuji ulremba ira leveleliwa jotega unazela muwari mwa Yesu nikwela, hiya joira jehu. (Matewuji 1:21, 26:27-28) So mbwenye mutu agamanle muroromela Yesu, unadediha tambilra zela mabasa alabile liye. Tchoira Yesu unanvulusa mutu ira akale olaba hiya kala mutu ogarati. (Nione Efezo 2:8-10; Titu 2:11-14) Evale mutule agavulusiwe, agalabile, agakwile, siku noza Yesu Kiristu nafiya, unokana yotambilra yaye zela joira jaye jatene japama. (Matewuji 10:42; Jowandeliwa 22:12) Tchoira masiki anamasokiha misoko, na aliwene anoiretchana makalelo anno. 47Kodi mwaalondjelaga abalinyu bahi muhusakanyavo yengo ilukulu yoakwaranya atu amohiwa? Nne vang'ono kamuirilevo yengo. Mwasiwa atu a unde na aliwene anolondjelana mukalele atu. 48Sawasawa nnga Babinyu wa zulu gokwakwanela, na nyenne inafwanela mukale atu okwakwanela nnga liye!>>
Currently Selected:
Matewuji 5: iLolo
Highlight
Share
Copy
Want to have your highlights saved across all your devices? Sign up or sign in
© 2018 Visão Integral