Matewuji 6
6
Makalelo ovaha mivaho
1<<Inafwanela muing'ane pama zela makalelo anafuna nyo hinda mabasa a Mulugu. Kamuiregena japama vatando mofuna ira atu kauteteleni. Mwairana eno, kamunna yotambilra yokumela wa Babinyu zulu. 2Nona, nyo mwafunaga nvaha yengo mutu osimela, kamulaleyege mundila nnga vini angongomwa.#6:2 angongomwa anawongiwa va ba atu anne kahanairana jejile jinakokomeza atu. Aliwa kakala munyumbani dofundjamo mazu nari mundila, anolaleya joira jewa japama ira katitimihiwege na atu. Na ibaribari nnouwandelani ira aliwa kohomala watchela yotambilra yewa.
3<<Zela nyo mbwenye, mwafunaga nvaha yengo mutu osimela, kammuonihe muwono wenyu oromana mabasa munalaba nyo na muwono wenyu odjana. 4Muiregena eno ira jovaha jenyu jikale jokoyeya. Mwaira eno Babinyu wenno unaona jinaireya mokoyeya, liye gunautambilrihani.
Ibaribari zela muselu olobela
Lukaji 11:2-4
5<<Eto mwalobelaga kamukale nnga angongomwa jinera atu. Tchoira aliwa kafunaga lobela, anoziveliwa lobela oimelene munyumbani dofundjamo mazu, nari mmakakanoni mwa marampa ira kaoniwege na atu. Na ibaribari nnouwandelani ira aliwa kohomala watchela yotambilra yewa. 6Nyo mbwenye ifwanele mutu afunaga lobela, avolowe mmba, afunge musuwo, anvepe Babinyu wenno ahanaoneya. Evale Babinyu wenno unaona jokoyeya jatene gunafuna mutambilriha.#6:6 mutu afunaga lobela, avolowe mmba: Mazwala kinakameliha lobela vatando owu lobela vamohi na afwawo na mavande. Inakamelihiwa ku venya vatando weka, roma lobelaga mofuna ira atu kauone. So yapamiwa mutu afunaga lobela eka alobele mmba mwaye. Mbwenye atu omuroromela Yesu kagumana, ili yapama kakayena lobela vatando. Nione Joira ja Anamarumiwa 2:42, 4:24-30, 12:5,12, 20:36, 21:5.
7<<Eto mwalobelaga, kamuwelelege wonga yengo imohive fendo didjindji dene nnga vini atu a unde, moumbuwela ira jovepa jiwa jinovweya na mwasa olapiha lobela. 8Kamukale nnga aliwa mwasiwa Babinyu umala iziwa makatamiho munna nyo mwahananvepe.
Yesu ohafundjiha anamamuharaye makalelo olobela
9<<Lobela uwa inafwanela mulobelege na makalelo ala:#6:9 mulobelege na makalelo ala: Muwari mowonga eno, kahi ira Yesu unafuna nikale atu ododobela mazwala. So nilobelege na makalelo oira nzina na Mulugu nititimihiwege eto umwene waye uze, hiya umwene wehu. Tchoira muwari mwa vs 7, Yesu umala wonga ira: kamuwelelege lobela yengo imohive fendo didjindji dene.
Baba wehu muli zulu, nzina nenyu nititimihiwe.
10Umwene wenyu uze, funa wenyu uireye mwilamboni ya vati nnga funa wenyu unaireya atu ilambo ya zulu.
11Munivahe peno udja wehu wa siku na siku.
12Munilevelele jotega jehu nnga nnaaleveleletcha hiyo ale ananitegela.
13Kamunihiye ira nixixiwe, mbwenye munivunele mwa jotakala. Tchoira umwene watene, kopolo datene, undimuwa watene jatene ejo ti jenyu kala no kala. Ame.#6:13 Ame ku wonga jiireye.
14<<Mwasiwa nyo mwaakurumuwela atu joviringaniha jiwa, Babinyu wa zulu na liyene unoukurumuwelani. 15Mbwenye nyo mwahakurumuwelege joviringaniha ja afwinyu, Babinyu na liyene kanaukurumuwelani joviringaniha jenyu.#6:15 nyo mwahakurumuwelege joviringaniha ja afwinyu: Mazwala ananiwandela ira wenno unafuna nvepa Mulugu ira Mulugu akurumuwele jotega jaye, anvepe muwari moviyeviha. Tchoira Mulugu kanamulevelela maliba vitukulela masiki anvepa. Eto fwanyeya ira wenno unafuna leveleliwa jotega jaye eto ahafunaga mulevelela nfwaye gu mutu ovitukulela eto Mulugu kanamulevelela jotega jaye masiki anvepege na ntindi. Nione Lukaji 18:9-14 ira nione lobela Mulugu unavwa liye eto lobela ahanavwa liye.
Zela muselu ojejuwari
16<<Eto mwajejuwarigi, kamukalege sisee nnga jinera angongomwa. Mwasiwa aliwa kajejuwarigi, anosandutcha kove diwa ira atu kaaone ira peno atwale anajejuwari. Na ibaribari nnouwandelani ira aliwa kohomala watchela yotambilra yewa. 17Nyo mbwenye mwajejuwarigi, ifwanele muvihuwe kovinyu pama, muvizolihe murwinyu makura 18ira mwahaoneye na atu ira munajejuwari mbwenye muoneye na Babinyu ahanaoneya. Mwaira eno, Babinyu wenno ahanaoneya gunafuna utambilrihani.#6:18 Nkani ojejuwari unakala nnga nkani olobela. Mazwala kinaakameliha atu omuroromela Yesu jejuwari vamohi. Tchoira atu omuroromela Yesu oroma kojejuwari vamohi. (Joira ja Anamarumiwa 13:2-3, 14:23) So mbwenye mutu afunaga jejuwari eka vande vaye, inafwanela airena ira Mulugu amuone hiya ira aoniwe na atu amohiwa.
Jorayela ja ilambo ya zulu
Lukaji 12:33-34
19<<Kamukoye jorayela jenyu ilambo ya vati.#6:19 Kamukoye jorayela jenyu ilambo ya vati. Koya jorayela ilambo ya vati ku laba ira ukayena jengo ja mwilamboni ya vati. Mwasiwa mwilamboni ya vati mukala anantumbwa anatakuna jengo, mukala kwiti nnanonga jengo eto mukala ambava anagudjula, kabaga jengo. 20Mbwenye mukoye jorayela jenyu ilambo ya zulu#6:20 mukoye jorayela jenyu ilambo ya zulu: Koya jorayela ilambo ya zulu ku wonga mutu agavulusiwe, alabaga mabasaye matene momuova Mulugu. (Efezo 2:8-10) Evale vasogolro Mulugu unomutambilriha zela mabasaye. (Matewuji 10:42; 2 Korinto 5:10) Eto va mazwala kinawonga zela vulusiwa, nari. Vulusiwa no tambilra zela joira jawo vihikala hiyana. wewo wahali anantumbwa, wahali kwiti eto wewo ambava wahanawanda atu gudjula nne ba. 21Tchoira wewo unafuna kala jorayela jawo, murimawo eto unakala wewo.
Wareya wa maningo
Lukaji 11:34-36
22<<Meso tchi panti ya maningo. Meso awo kakala apamene, maningo matene anakala owareya.#6:22 Meso awo kakala apamene, maningo matene anakala owareya. Mazwala anonikokomeza ira nikayena yengo imohi inaing'ana hiyo, Mulugu na jofuna jaye. Akala inasuruma we tchapama, kalawo wawo watene unokala wapama. 23Mbwenye meso awo kahakale pama, maningo awo anakala isive. Akala moneya wewo unafwanyeya muwari mwa weyo tchi isi, isiwa inokala isi yohokala ya masika.
Mulugu na jorayela
Lukaji 16:13, 12:22-31
24<<Kalivo mutu unawanda alaba ambwiye ambinli. Mmohi unerege muvwelela, muziveliwaga. Eto mmohiwole unerege muida, mpetaga. Kavali jowandeya eto ira mutu awande muhara Mulugu na ja kobiri tempu imohive. 25Nona nnouwandelani ira nyo kamukale okukumuwela ingumi yenyu muiraga: <Kodi hiyo nnadje nni?> Nne kamukukumuwele ira: <Nnang'we nni?> Nne kamukukumuwele maningo enyu ira: <Nnaware nni?> Kodi ingumi na udja, ilukulu yofuneya kwaranya kahi ingumi? Eto kodi maningo na yowara, ilukulu yofuneya kwaranya kahi maningo? 26Muone mbalrame dovava zulu. Kannazala, kannahanda, kannahelela musandjani. Mbwenye Babinyu wa zulu gunavaha poso. Kodi nyo kamuli ofuneya vamentoni va Mulugu kwaranya mbalrame dedo? 27Eto mutu guvi unawanda indjiviha kalawo waye ora imohi movikukumuwela?
28<<Kodi munakalela nni okukumuwene zela jowara? Kaing'anani makalelo anaulukula folori. Folori kannalaba yengo, kannavisakanyela jowara jiwa. 29Mbwenye miyo nnouwandelani ira nne Salomawu no rayela waye watene, kawandile wara afiyeda nnga jinaira riya wa folori. 30Tchoira akala Mulugu unowanda wariha mpinda wa mukokolani, wenno unakalawo peno bahi eto metchelo adowa atatileliwa vanikusani, kodi liye kanauwarihani nyo? Nyo eto muli atu okana nroromelo noyeva. 31Nona, nyo kamuwendege okukumuwene muiraga: <Kodi nnadje nni? Eto nnang'we nni? Eto nnaware nni?> 32Mwasiwa atu a unde anozuzumela jengo jeji. Mbwenye nyo Babinyu wa zulu uhuiziwa ira nyo munofuna jengo jeji. 33Nyo mbwenye mubabihe zuzumela Umwene wa Mulugu vamohi no irana upama unafuna liye. Mwairana eno, jatene ejo munowendjediwa.#6:33 jatene ejo munowendjediwa: Mazwala ananiwandela ira mutu omuroromela Yesu akukumuwela ja Mulugu, Mulugu unokukumuwela jaye. Eto asuruma irana ja Mulugu, liye unonvaha ja ilambo ya vati jinafuneya ira akalewo. Ku wonga ira wenno unakukumuwela ja Mulugu hiya ja ilambo ya vati kanakwa ndala. Mwasiwa ukala unafuna mposaga jodja na makalelo nnga nnaposiwa mbalrame.
34<<Nona, kamuzuzumelege ja metchelo.#6:34 kamuzuzumelege ja metchelo: Zuzumela ja metchelo ku umbuwela ira: <<Dire avi ira dikayena jodja na jowara ja metchelo?>> Yeniyo mbwenye kifwanenle. So yapamiwa kada siku, inafwanela mutu aumbuwele ira: <<Mulugu unafuna liye ira miyo diiregena tchivi?>> Akala muwari moirana ja Mulugu peno, weyo kuiziwile inafuna we dja metchelo, kukukumuwe mwasiwa ja metchelo jinosambawulreya metchelo evo. Mulugu gunafuna iziwa jofuneya ja metchelo. Tchoira ja metchelo jinosambawulreya metchelo evo. So mbwenye ifwanele muzuzumelege makatamiho anaufwanyani siku na peno.>>
Currently Selected:
Matewuji 6: iLolo
Highlight
Share
Copy
Want to have your highlights saved across all your devices? Sign up or sign in
© 2018 Visão Integral