Matewuji 4
4
Xixiwa wa Yesu
Markuji 1:12-13; Lukaji 4:1-13
1Evale Yesu ohosogolrelriwa na Munemba Otchena fiyeda muisalesaleni ira axixiwe na Diyabo.#4:1 Amusogolrelra Yesu ira axixiwe na Diyabo ali Munemba Otchena. Xixiwa waye wafuna ulabe ira ioneye ira Yesu uhiyana na Adawu. Tchoira Adawu axixiwaga, ohogwa. Eto fwanyeya ira Yesu uhiyana na aIzarayeli kaxixiwaga muisalesaleni. Tchoira na aliwene kohogwa. Xixiwa wa Yesu walaba ira nikayena ibaribari ira Yesu gu mutu okwakwanela, ohokana yotega, ofwanela kala mutu owanda piwela jotega jehu nnga mabila a malambo a mundulrimu. Nione Juwawu 1:29; Eberewu 4:15. Xixiwa wa Yesu eto unonifundjiha ira niiziwe makalelo anafuna hiyo irana naxixiwa na jotega. Tchoira Yesu muwari moxixiwa, liye alabilena mazu a Mulugu ira ahagwena yotega. Na hiyene muwari moimela mMazuni, nnowanda imela muwari moxixiwa. 2Agadowile muisalesaleni, ohojejuwari malambo 40 ahadjaga yengo, ntana na mahiyu. Evale Yesu ohokagana ndala. 3Mwa enne, namaxixa#4:3 namaxixa owu hehi Diyabo nari Satana. ohomuzelaga, amuwongagana eraga: <<Akala weyo uli Mwana Mulugu, urume mabwala kasanduwe, kakale pawu.>> 4Yesu mbwenye ohomuwakulaga eraga: <<MMazuni muhulrembiwa ira:
<Kahi pawu ve bahi inamukalihawo mutu. Mbwenye mazu matene anakuma vamulomoni va Mulugu banamukalihawo mutu.> >> #
Detoronomiyo 8:3
5Evale Diyabo ohomudowagana Yesu sidadi yotchena ya Jeruzalemu. Liye muhela vazulu va Nyumba ya Yehova, nimburo notama bure.#4:5 Nyumba ya Yehova tchali nyumba yolobelamo nne tchali nyumba yoimbamo nnga vigereja da mano. Nyumba ya Yehova yalingana na makalelo a Musasa wa Yehova. Nyumba ya Yehova yohokana sala mbinli. Sala yoroma yali Nimburo Notchena. Afiya Nimburo Notchena nne akala anamakuta bahi. Namakuta adowa ahele pawu vameza, atumeye jonukela eto ahindihe panti. Sala yanembinli yali Nimburo Notchenetchetcha. Yohokana kurtina ilukulu vari va Nimburo Notchena na Nimburo Notchenetchetcha. Kurtinele yanna mabasa ogawa Nimburo Notchena na Nimburo Notchenetchetcha. Nimburo Notchenetchetcha kwaafiya anamakuta a burebure. Mbwenye afiyawo akala mundimuwa wa anamakuta bahi. Eto afiyawo va yaka fendo imohi bahi ira avelele mukuto wa mwanainyama zela jotega jaye na ja atu atene. (Eberewu 9:1-7) AJudewu kagumanetcha vatando va Nyumba ya Yehova ira kalobele no kuta mikuto da anavinyama. Mbwenye atu ohokala aJudewu tchafiyawo. 6Evale ohomuwongagana eraga: <<Akala weyo uli Mwana Mulugu, uvivoke vazulu va nyumba va, umorele vati. Mwasiwa ihilrembiwa mMazuni ira:
<Mulugu unoaruma angelro aye ira kauing'anele. Aliwa anouhidedela na mandiwa ira manyalo awo kahaporeye na mabwe.> >> #
Salmu 91:11-12
7Yesu mbwenye ohomuwakulaga eraga: <<MMazuni eto muhulrembiwa ira: <Kumuxixe Nabwiya Mulugu wawo.> >>#4:7 Mazu awongile Satana ali mazu kafwanyeya mBibiliyani. (Salmu 91:11-12) Mbwenye Yesu ohoiziwa ira: <<Satana unaviringaniha tapulela wa mazwala. Ira dilupe va, dimorele vati, nnamuxixa Nabwiya Mulugu waga. Kondi, kannairana.>>#Detoronomiyo 6:16
8Evale Diyabo ohomutukula akoka, mudowana mwango olapetchetcha, muoniha maumwene matene a ilambo ya vati na jorayela jiwa. 9Evale ohomuwandelaga eraga: <<Warumela dikokorela miyo vano, uditamalela, miyo nnouvaha jatene jinaona we ji, jikale jawo.>> 10Yesu mbwenye ohomuwakulaga eraga: <<Kavenyavo, we Satana! Tchoira mMazuni muhulrembiwa ira: <Umutamalelege Nabwiya Mulugu wawo eto umulabege liyene bahi.> >>#Detoronomiyo 6:13 11Evale Diyabo ohovenyagavo. Agavenyilevo, mobaranya angelro kohoza, aliwa kala na Yesu kamukamihedaga.
Yesu ohoroma hinda mabasaye ilambo ya Galileya
Markuji 1:14-15; Lukaji 4:14-15
12Mwa tempu yenne Yesu agavwile ira: <<Juwawu uhufungeliwa mukadeya>>,#4:12 Juwawu uhufungeliwa mukadeya. Zela muselu wa Juwawu afungeliwaga mukadeya eto apiwaga, nione Markuji 6:17-29. ohovenyagavo vali liye, liye welela porovinsiya ya Galileya. 13Muwari modowa Galileya ule, ohovira tatamo ya Nazareti, mbwenye kadibeliwilewo. Liye kwaranya, dowa kalaga sidadi ya Kafaranamu, yenno ili wandamelana ntiya na Galileya, mmadilreni mwa ilambo ya Zebuloni na Nafitali.#4:13 Muwari mwa malogo kumi na menli a Izarayeli, kada nlogo nohokana ilambo yavahiwa atu, hiya nlogo nimohi na Levi. Zebuloni na Nafitali ba mazina menli a malogo a Izarayeli. Ku wonga ira Yesu adowile garati madilre a ilambo yavahiwe malogo a Zebuloni na Nafitali. 14Ali ira jiwande kwakwanela nnga mwemo mwawongele namafiyiheda Izaiya ira:
15 <<Ilambo ya Zebuloni na ilambo ya Nafitali, ndila ya ntiya, kombela ya Jordawu, Galileya wewo unakala atu ohokala aJudewu, 16atu anno kawendetcha muisini, kohoona moneya ulukulu. Na ibaribari wareya uhamoneya atu anne kafwanyeya munfulrini mwa ukwa!>>#Izaiya 9:1-2
17Roma tempu yenno Yesu ohoromaga laleya eraga: <<Twaruwani mwasiwa Umwene wa zulu uhuwandamela!>>
Yesu ohaitana anamagodomula annayi ira kakale anamamuharaye
Markuji 1:16-20; Lukaji 5:1-11
18Siku nimohi Yesu awendaga mmambalo mwa ntiya na Galileya, ohomuonaga Simawu wenno aitaniwa Peduru agali vamohi na mbalaye Andire kavokelaga mataviwa mwiko mwasiwa kali anamagodomula. 19Evale Yesu agaaonne, ohawongagana eraga: <<Kadiharegeni miyo. Mwadihara, miyo nnousakanyani ira nyo mukale aliba agodomula atu!>> 20Aliwa kagavwile enne, mobaranya kohiyaga mataviwa evale, aliwa roma muharaga Yesu.
21Eto kadowagave sogolro Yesu ohafwanyaga atu ambinli, mulombwana Tiyagu na mbalaye Juwawu anno kali ana Zebedewu. Aliwa kaligi mmwadeyani vamohi na babiwa Zebedewu katchapelraga mataviwa. Evale Yesu ohaitanaga. 22Na aliwene kagavwile itaniwa ule, mobaranya komuhiyaga babiwa na mwadeya wenne, aliwa roma muhara Yesu.
Yesu ohafundjiha atu eto ohavulumutcha arenda
Lukaji 6:17-19
23Evale kohodowaga sogolro, kawendawendaga porovinsiya ya Galileya yatene, Yesu aafundjihaga atu munyumbani mwiwa mwemo mwafundja atu mazu,#4:23 munyumbani mwiwa mwemo mwafundja atu mazu: Yali nyumba aJudewu mwafundja atu mazu a Mulugu. Mazu a Mulugu kanna atu tempu yenno ali Jenesesi ante Malakiya bahi, tchoira malivuru a Matewuji ante Jowandeliwa kali kahanalrembiwe. Kada vatatamoni kohokana nyumba yewa yofundjamo mazu nnga vinaireya na maigereja malambwala. So mbwenye Nyumba ya Yehova yali imohive ilambo yatene ya vati. Yesu agali mwilamboni ya vati, ovolowetcha nyumba dofundjamo Mazu dile. alaleyaga Muselu Wapama wa Umwene wa Mulugu eto avulumutchaga maurenda matene eto amalihaga jopa jatene jafwanyeyana atu. 24Mwa enne Yesu ohoromaga vweya mwilamboni mwatene mwa Siriya. Eto kohoromaga azana wa liye atu anne kafwanyeyana maurenda madjindji na jopa johiyana hiyana, aliba zuzumihiwa na minemba dabure, aliba gwa vindjilendjile na aliba hawenda. Evale Yesu oavulumutcha. 25Mwa enne atu adjindji romela akuda Galileya, akuda Dekapoliji, akuda Jeruzalemu, akuda Judeya, na atu a kombela ya muhindje Jordawu, kohomuhara.
Currently Selected:
Matewuji 4: iLolo
Highlight
Share
Copy
Want to have your highlights saved across all your devices? Sign up or sign in
© 2018 Visão Integral