Anamasogolrelra 17
17
Mulombwana Mika na mmaye kosakanya vikwamutu dosema
1Ohokalawo mulombwana mmohi akaletcha ilambo ya mmwangoni ya Efarayimi, nzina naye aitaniwa Mika. 2Liye ohomuwandela mmaye ira: <<Mmani, kobiri da parata 1.100 dedo dibiwile, noira eno nyo muroma mutembelrelra mbava ubile miyo divuruwanaga na baruni waga, kobiriwa ili na miyo. Miyo gubile.>> Evale mmaye ule ohomuwakulaga eraga: <<Mwanaga Yehova aurelihe.>> 3Mwa enne Mika ohomuweliheda mmaye kobiri da parata 1.100 dile. Mbwenye mmaye ohomuwandelaga, liye ira: <<Mwanaga miyo kobirila nnavelela wa Yehova, duvahede mmandani mwawo ira usakanyede nlandaniho nosemiwa vamohi na nlandaniho nimohi niwa nonyungulrutcha. Nona kobirila nnouvaheda weyo mmandani mwawo.>> 4Mbwenye Mika agamuwelihedile kobirile mmaye, mmaye ohotukulaga kobiri da parata 200, liye dowa nvaha mesilri osakanya jonyungulrutcha. Evale mesilri ule ohosakanya nlandaniho nosemiwa vamohi na nlandaniho nonyungulrutcha. Evale nlandaniho nosemiwa nne nohokala vande va mulombwana Mika. 5Eto Mika ohokana nimburo notamalela amilugu. Evale ohosakanya kuleti ya unamakuta vamohi na vikwamutu josema ja vande vaye, nomala eno liye muhambiha mwanaye mmohi wa mwanapongwe ira akale namakuta. 6Fwanyeya malambo anne, mwilamboni mwa Izarayeli kamwali mwene. Kada mutu airana yenno yaona liye kala yofwanelela vamentoni vaye.
MuLevi mmohi odowa kala namakuta vande va Mika
7Eto ohokalawo muzombwe mmohi wa Beleme, mwilamboni mwa Juda wa nlogo na Levi wenno abalriwa nnga muJudewu.#17:7 wa nlogo na Levi wenno abalriwa nnga muJudewu. Ku wonga zela baliwa waye, ali muLevi. Mbwenye zela ilambo yabaliwe liye, ali muJudewu. Agali makolo aye tchali atu a nlogo na aJudewu. 8Liye ohomaruwaga kuma sidadi ya Beleme, ilambo ya Juda, liye dowaga ira asakege ilambo ili yatene yafuna liye fwanya nimburo napama nofwanela kala. Mwa enne liye agafiyile ilambo ya mmwangoni ya Efarayimi, ohofiya vande va Mika. 9Agafiyile vande vale, mulombwana Mika ohonfukaga, liye ira: <<Kodi weyo unakumela uvi?>> Liye ohowakulaga eraga: <<Miyo dili muLevi wa Beleme, mwilamboni mwa Juda. Eni nnavenda vokala.>> 10Evale Mika ohomuwandelaga muzombole, liye ira: <<Kakalaga na miyo evano. Nnafuna ukale babaga na namakuta waga. Va kada yaka nnerege uvaha kobiri da parata kumi vamohi na jowara eto nnerege uvaha jodja na vokala.>> Mwa enne muLevi ule ohorumelaga. 11Evale liye ohorumela kala vande va Mika vale eto ohokala nnga mwana wa vande evale. 12Mika ohomuhambiha muzombole wenno ali muLevi, liye kala namakuta, kalagave vande vaye evale. 13Noira eno, mulombwana Mika ohowongaga eraga: <<Peno mbwenye dihiiziwa ira Yehova unerege diirela upama, tchoira dihimukana muLevi mmohi unafwanyeya agali namakuta waga.>>
Currently Selected:
Anamasogolrelra 17: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
