Anamasogolrelra 18
18
Akuda Dani kohovenda ilambo ira ikale yewa
1Muwari mwa malambo anne, mwilamboni mwa Izarayeli kamwali mwene. Eto muwari mwa malambo anne atu a nlogo na Dani kali muwari movenda ilambo yafuna kala yewa, tchoira aliwa kali kahanagondjihe ilambo kavahiwe atu muwari mwa abaliwa aIzarayeli. 2Evale atu a nlogo na Dani koharuma alombwana atanu a nlogo newa, alombwana a kopolo a sidadi ya Zora na Estayoli, ira kadowe kawendawende vamohi no wendelela ilambo. Aliwa kaarumaga kohawandelaga keraga: <<Mudowe mwawendawende ilambo yatene.>> Mwa enne alombwanale kagarumiwe, kohofiya ilambo ya mmwangoni ya Efarayimi fiyeda vande va Mika, aliwa haya evale mahiyu anne. 3Mwa enne aliwa kagali vande va Mika vale, kagavwile mawongelo a muzombwe wenno ali muLevi ule, kohoiziwa ira kahi wa wewule. Evale kohodowa wafwanyeya liye, aliwa nfuka keraga: <<Kodi weyo uuzilena uno bani? Nnga uno unahindawo nni? Nnga mwasiwa gwa nni we kalaga vande vano?>> 4Evale ohawakula, liye ira: <<Miyo divwananne na Mika maliba vande vano ira dikalege evano, dimulabelege mabasa a unamakuta, liye aditambilrihege kobiri.>> 5Evale aliwa kohoiraga: <<Nnavepa ira unfuke Mulugu akala hiyo nnowenda pama muwari mwa ulrendo wehu.>> 6Mwa enne namakuta ule ohawandelaga eraga: <<Dowani mwa murendele! Ulrendo wenyu Yehova unousogolrelrani.>>
7Evale alombwana atanu ale kohomaruwaga, aliwa fiya sidadi ya Layiji. Kagafiyile wewule, kafwanyile ira atu a wewule kafwanyeya muwari mwa murendele nnga akuda Sidoni. Aliwa kali atu ofwaseya eto atu ohokayikela yengo ili yatene. Aliwa tchasauwela yengo ili yatene inafwanyeya mwilamboni ya vati eto kohokana jorayela pwi. Kakaletcha olapela wene na akuda Sidoni eto tchanna afwiwa kawandannena atu. 8Noira enne alombwanale kohowelela wa abaliwa sidadi ya Zora na Estayoli. Evale kagafiyile, abaliwale kohafuka keraga: <<Muwendile avi ulrendo wenyu?>> 9Aliwa kohowakulaga keraga: <<Nionne ira inafwanela nivenye, nidowe nawane na sidadi ya Layiji. Tchoira nagamanle ing'ana ilambwele, nionne ira ilambwele inafwanyeya yagali yapama kwaranya. Nyo mukalele nni ofwaseyene? Kamudodome dowa wewule ira natukule ilambwele. 10Nafiya wewule, nnoafwanya atu ohokayikela yengo ili yatene eto ilambwiwa inafwanyeya yagali yorambalala. Eto Mulugu uhumala nivaheda aliwa mmandani mwihu. Tchi ilambo yahanasauweleya yengo ili yatene inafwanyeya mwilamboni ya vati.>>
11Mwa enne kohomaruwaga alombwana okwakwana 600 a nlogo na Dani, aliwa kuma sidadi ya Zora na Estayoli wafwanyeya atu ule, kagamanle vikunga na jowanana jiwa ja kondoni. 12Evale kohodowaga, aliwa kunga misasa diwa Kiriyati-Jeyarimi, mwilamboni mwa Juda. Nona nimburo nenne ante peno nnaitaniwa Mahane-Dani, [ku wonga Vamisasani va Dani]. Nimburo neno nnafwanyeya unduli wa sidadi ya Kiriyati-Jeyarimi. 13Nokuma evale, kohoviraga ilambo ya mmwangoni ya Efarayimi, ante aliwa dowa fiya vande va Mika.
Alombwana a nlogo na Dani kohomutukula muLevi vamohi na vikwamutu josema ja Mika
14Evale alombwana atanu kadowile wendelela ilambo ya Layiji kohawandelaga abaliwale, aliwa ira: <<Kavuruwanani! Vande va vihikala kuleti ya unamakuta vamohi na vikwamutu josema ja vande vamohi na nlandaniho nosemiwa na nlandaniho nimohi niwa nonyungulrutchiwa. Inafwanela muumbuwele pama inafuna nyo iranavo.>> 15Mwa enne aliwa kohodowaga wewule, fiya vande va Mika, vevo vakala muzombwe wenno ali muLevi, aliwa mutchelutcha. 16Tempu yenno alombwana 600 a Dani anno kanna jowanana ja kondoni ale kafwanyeya va mulango ovolowela vatando va Mika vale. 17Evale alombwana atanu anno kadowile wendelela ilambo, kohovolowaga, aliwa tukula nlandaniho nosemiwa nne na kuleti ya unamakuta ile vamohi na vikwamutu josema jile, vamohi na nlandaniho nonyungulrutchiwa nne. Namakuta muLevi ule aimenlege va mulango ovolowela vatando va Mika vale vamohi na alombwana 600 a Dani anno kanna jowanana ja kondoni ale. 18Alombwanale kagavolowile mmba mwa mulombwana Mika, katukulaga nlandaniho nosemiwa nne na kuleti ya unamakuta ile vamohi na vikwamutu josema jile, vamohi na nlandaniho nonyungulrutchiwa nne, namakuta ule ohafukaga, liye ira: <<Kodi jinera nyo ji nni?>> 19Aliwa kohowakulaga keraga: <<Kamiyala, kuwonge yengo ili yatene, uniharege. Hiyo nnafuna ukale babihu na namakuta wehu. Kodi para weyo yapamiwa ku kala namakuta wa vande va mutu mmohi bahi owu ku kala namakuta wa nlogo nompumbula na Izarayeli?>> 20Namakuta ule agavwile enne, ohokagana hagalala mmirimani mwaye, liye tukula kuleti ya unamakuta ile na vikwamutu josema jile vamohi na nlandaniho nosemiwa nne, liye volowa vari va anamwindji ale, roma aharaga.
21Noira enne kohasogolrihaga ahimiwa na jifuwo jiwa vamohi na mitolro diwa, aliwa maruwa, dowaga. 22Evale kagali olapela wene na vande va Mika vale, Mika ule ohagumanihaga atu atene a mavande kawandamenle na vande vaye vale, roma atamangelaga alombwana a Dani ale, aliwa afwanya. 23Mwa enne kohoroma akuwela akuda Dani ale. Evale aliwa kohorungunuwaga, aliwa wonga na mulombwana Mika keraga: <<Kodi weyo unafuna nni na atu atene anno waagumanihile we?>> 24Liye ohowakula, liye ira: <<Nyo mudiwakile amilugu aga daasakanyile miyo vamohi na namakuta waga, nyo adowagana. Nnga miyo nnafuna dihalena yengo nni? Kodi vinawandeya avi nyo difukaga ira: <Unafuna nni?> >> 25Mbwenye akuda Dani ale kohomuwakulaga, aliwa ira: <<Kavayela miyalawo tawiha ira alombwana ohorutcha takaleliwa anafwanyeya muwari mwa hiyo anauzele tchineneva, upuzeye ingumi yawo vamohi na vingumi da atu a vande vawo.>> 26Mwa enne akuda Dani ale kohodowaga muulrendoni mwewa eto mulombwana Mika agaonne ira aliwa kafwanyeya kagali a kopolo mukwaranya liye, ohowelaga, liye dowaga vande vaye.
27Fwanyeya ira aliwa kohotukulaga jengo jejo jasakanyile mulombwana Mika eto kohomutukulaga namakuta waye, aliwa dowa ilambo ya Layiji wewo wali atu ofwaseya eto ohowanganyeda yengo ili yatene. Kagafiyile wewule, kohapaga na masupada atu a wewule eto kohotumeyaga sidadile na munlo. 28Eto kalivo nne mutu mmohi awandile za akamiheda, tchoira aliwa kafwanyeya olapela wene na akuda Sidoni eto nne tchanna afwiwa kawandannena atu. Sidadile yafwanyeya ndabo nali wandamelana sidadi ya Bete-Reyobe. Noira enne akuda Dani kohoivenyiheda sidadile akoka, aliwa kalagamo. 29Evale agali wanle sidadile yaitaniwetcha Layiji, aliwa kohovaha nzina na Dani molingana na nzina na nikolo newa wenno aitaniwa Dani, mwana Izarayeli. 30Noira enne akuda Dani ale kohoimetcha nlandaniho nosemiwa nne ira nikale mulugu wewa eto kohomuhambiha mulombwana Jonata mwana Jeresoni muzula wa Mozeji,#18:30 muzula wa Mozeji: MaBibiliya amohiwa anawonga ira: muzula wa Manasesi. liye vamohi na ahimaye aliwa kala anamakuta a nlogo na Dani fiyeda tempu yatukuliwa atu kadowiwagana ilambo imohiwene.#18:30 fiyeda tempu yatukuliwa atu kadowiwagana ilambo imohiwene. Ku wonga yaka didjindji, nione 2 Amwene 24:7. 31Aliwa kohokalave na nlandaniho nosemiwa nasakanyile mulombwana Mika nne, aliwa labaganave tempu yatene Musasa wa Mulugu ali liye sidadi ya Silo.
Currently Selected:
Anamasogolrelra 18: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
