Anamasogolrelra 11
11
Mulombwana Jefite ohavunela aIzarayeli
1Ohokalawo mulombwana mmohi nkuda Jileyadi aitaniwa Jefite. Liye ali munyakondo wa kopolo. Babaye ali mulombwana Jileyadi. Mbwenye ambanle na puta mmohi eni. 2Eto Jileyadi ohabala ahima a anapongwe amohiwa na muhiyanaye amutenle liye. Mwa enne ahima a muhiyanaye ule kagaulukunle, kohomutamangiha Jefite vande vale, aliwa ira: <<Kavinakala jowandeya ira weyo uwande gaweliwa pandi ya jorayela vande va babihu, mwasiwa weyo uli mwana wa muhiyana mmohiwene.>> 3Evale Jefite ohatawaga abalaye ale, liye dowa kalaga ilambo ya Tobe. Agali wewule, kohokalawo alombwana abure kamuharile, aliwa roma wenda vamohi na liye.
4Mwa enne vagavirile malambo, akuda Amoni kohotatamula kondo na aIzarayeli, aliwa roma wana. 5Mwa enne akuda Amoni ale kawanaga na aIzarayeli, andimuwa a Jileyadi kohomudowelaga mulombwana Jefite mwilamboni mwa Tobe mwemo mwakala liye. 6Kaganfwanyile Jefite, kohomuwongana, aliwa ira: <<Nnavepa mudowe mwakale musogolrelri wehu wa anyakondo ira niwane na akuda Amoni.>> 7Mbwenye Jefite ohafukaga andimuwa a Jileyadi ale, eraga: <<Kodi nyo kamudiidile mufiyeda ditamangiha vande va babaga? Nnga mwasiwa gwa nni peno mwagafwanyiwile makatamiho nyo zaga wa miyo?>> 8Evale andimuwa a Jileyadi ale, kohomuwakulaga Jefite keraga: <<He, nnafwanyeyana makatamiho. Nona peno nizaga wa nyo ira mudowe mwanikamihede wana na akuda Amoni eto ira mukale musogolrelri wa akuda Jileyadi atene.>> 9Evale mulombwana Jefite ohawandelaga andimuwa a Jileyadi ale, liye ira: <<Kodi nyo mwadiweliheda mundulri ira didowe dawane na akuda Amoni, eto dadowa wewule Yehova afiyeda divaheda aliwa atene mmandani mwaga, kodi na ibaribari miyo nnokala musogolrelri wenyu?>> 10Evale andimuwa a Jileyadi ale kohowakulaga, aliwa ira: <<He, na ibaribari weyo unokala musogolrelri wehu. Yehova gunafuna kala mboni vari vehu eto hiyo nnokwakwaneliheda nnga muwongele nyo.>> 11Evale Jefite ohodowaga vamohi na andimuwa a Jileyadi ale eto agafiyile wewule anamwindji atene kohomuhambiha, liye kala mundimuwa wewa vamohi na musogolrelri wewa. Eto kagalive ilambo ya Mizipa, mulombwana Jefite ohowonga vamentoni va Yehova mazu matene awongile liye na andimuwale ahanaze.
12Noira eno, Jefite ohorumihaga milanyo wa mwene wa akuda Amoni, liye ira: <<Kodi yabure nni ilivo zela weyo na hiyo, we fiyeda zaga mwilamboni mwehu ira uwane na hiyo?>> 13Evale mwene wa akuda Amoni ule, ohawakulaga aliba milanyo anno karumiwe na Jefite, liye ira: <<Miyo nnafunela jowana na nyo mwasiwa aIzarayeli kakumaga Ijipitu kohotukula ilambo yaga romela muhindje Arinoni dowa muhindje Jaboke fiyeda muhindje Jordawu. Akala kamunafuna kondo, mudiwelihede mwa murendele.>>
14Mbwenye Jefite ohowelelave rumiha milanyo akoka wa mwene wa akuda Amoni, 15liye ira: <<AIzarayeli kitukunle nne ilambo ya akuda Mowabe, nne ilambo ya akuda Amoni. 16Mwasiwa aIzarayeli kakumaga Ijipitu kavirile muisalesaleni ante aliwa fiya Bara Yofila, ante aliwa dowa fiya Kadeji. 17Noira eno, aIzarayeli kohorumiha milanyo wa mwene wa akuda Edomu ira: <Nnauvepani ira munihiye nivire mwa murendele mwilamboni mwenyu.> Mbwenye mwene wa akuda Edomu kafunne vwa yovepa yewa. Noira eno, aIzarayeli kohorumiha milanyo dimohive wa mwene wa akuda Mowabe. Na liyene eto kafunne vwa. Mwa enne aIzarayeli kohokala ilambo ya Kadeji. 18Noira eno, kohoroma wenda muisalesaleni eto kohowerewera ilambo yatene ya akuda Edomu na ilambo ya akuda Mowabe, ante aliwa fiya pandi ya makumelo wa nzuwa wa ilambo yewa, aliwa dowa garati kombela ya muhindje wa Arinoni. Nona aliwa tchavolowile mwilamboni mwa akuda Mowabe, mwasiwa muhindje wa Arinoni gu madilre a akuda Mowabe. 19Eto noira eno aIzarayeli kohorumiha milanyo wa mulombwana Seyoni mwene wa aAmore, wenno akala Ejiboni, aliwa ira: <Nnauvepani ira munihiye nivire mwa murendele mwilamboni mwenyu para nifiye mwilamboni mwehu.> 20Mbwenye Seyoni kaaroromenle aIzarayeli ira aliwa kafuna kere vira bahi mmadilreni mwa ilambo yaye. Eto mofutukula ohagumaniha atwaye atene ira kawane kondo, aliwa maruwa dowa kunga misasa diwa sidadi ya Jaza, aliwa roma wana na aIzarayeli. 21Eto Yehova Mulugu wa Izarayeli ohomutukula Seyoni vamohi na atwaye atene, liye avaheda mmandani mwa aIzarayeli, aliwa atolotcha. Evale aIzarayeli kohotukula ilambo yatene ya aAmore kakaletcha wewule, aliwa kala yewa. 22Eto kohotukula ilambo ya aAmore yatene, romela muhindje Arinoni ante Jaboke eto romela muisalesaleni ante dowa fiya muhindje Jordawu. 23Mwa eno, Yehova Mulugu wa Izarayeli ohatamangiha aAmore vasogolro va mulogo waye wa Izarayeli. Nnga peno nyo munafuna muniwake? 24Nyo mukale ilambo yenno inauvahani mulugu wenyu Kemuji. Mbwenye hiyo nnakala muwari mwa vilambo dedo Yehova Mulugu wehu aawakile liye atu anno aatamangihile liye vasogolro vehu. 25Kodi weyo uli wa kopolo mukwaranya Balaki mwana Zipori mwene wa akuda Mowabe? Kodi liye owanda kangana na aIzarayeli? Kodi liye ohowanda wana fendo imohi na aliwa? 26Kodi akala weyo na makolo awo mohofuna wombola ilambo yenyu, mwasiwa gwa nni nyo hairana tempu aIzarayeli kamanle atu yaka 300 kakalaga Ejiboni na tatamo dewa, vamohi na Aroweri na tatamo dewa, vamohi na sidadi datene diwerewerile muhindje Arinoni? Ahakale mufuna jowana, yaka dedo dogokwakwana ira muwombole ilambo ile. 27Miyo kaduirele weyo yabure nne vang'ono. Mbwenye weyo unaditegela ufunaga ira uwane na miyo. Nona Yehova wenno unafwanyeya agali namatonga, akale wenno unafuna tonga peno vari va Ana Izarayeli na akuda Amoni.>> 28Mbwenye mwene wa akuda Amoni agavwile mazu matene anne, kafunne vwa milanyo da mulombwana Jefite dedo damurumihede liye.
29Evale Munemba wa Yehova ohomuzela mulombwana Jefite. Mwa enne liye ohoviraga ilambo ya Jileyadi na ilambo ya Manasesi, ante dowa fiya Mizipa muwari mwa ilambo ya Jileyadi, liye dowa fiya wa akuda Amoni. 30Eto Jefite ohosakanya yolumbela na Yehova, liye ira: <<Yehova nyo mwadivaheda akuda Amoni mmandani mwaga, 31eto difiyeda welawo kondoni mwa murendele, miyo peno nnolumbela ira dafiyaga vande vaga, yengo inakale irandji kumela va mulango izaga ira igumane na miyo, yenno inokala yenyu eto nnoivelela ira ikale mukuto otumeya wa nyo Yehova.>> 32Mwa enne Jefite ohodowaga wa akuda Amoni ira adowe awane na aliwa. Eto Yehova ohavaheda aliwa mmandani mwaye. 33Mwa enne liye ohaporotchaga aliwa fiyeda kwa atu ohokala a masika. Mwa enne ohogondjiha sidadi makumenli, romela Aroweri ante dowa fiya Minite, ante dowa sidadi ya Abeli-Keramini. Mwa enne akuda Amoni kohogondjihiwa na Ana Izarayeli.
34Evale mulombwana Jefite afiyaga vande vaye Mizipa, againg'anne, ohomuonaga mwanaye wa muhiyana azaga wa liye, aimbaga makotcho eto ainaga. Fwanyeya eto ira liye anna mwana mmohive wenne. Kaanna mwana mmohiwa nne wa mwanapongwe nari wa mwanamuhiyana. 35Evale Jefite agamuonne mwanaye ule, ohokawulaga jowara jaye eraga: <<Dihikwa miyo, mwanaga, uhudipa! Kodi mwasiwa gwa nni mwanaga unafunela we kala maliba dizuzumiha? Tchoira miyo dihimala sakanya yolumbela wa Yehova Mulugu eto kavili jowandeya ira diwelihede mundulri yenno ilumbenle miyo!>> 36Evale mwanaye ule ohomuwandelaga eraga: <<Babani, nyo muhumala lumbela wa Yehova. Diirenani nnga mwemo muwongele nyo wa liye, mwasiwa Yehova uhusakanya ira nyo mwaagondjihe amwidaninyu akuda Amoni.>> 37Eto ohowongagave na babaye ule eraga: <<So babani nnouvepani yengo imohi. Mubabihe dihiya medi minli ira divire mmwangoni vamohi na anamwali afwaga ira ninle zela miyo mwasiwa kadiza diteliwa.>> 38Evale Jefite ohomurumelaga eraga: <<Tiye.>> Mwa enne ohomuhiya, liye dowa ira amale medi minli. Evale namwali ule ohodowaga mmwangoni vamohi na afwaye, aliwa roma nla na mwasa oira liye kaza ateliwa. 39Noira eno, vagamanle medi minli, liye ohowelela wa babaye. Evale babaye ule ohomutukula mwanaye ule, liye kwakwaneliheda yolumbela yasakanyile liye. Mwa enne namwali ule ohokwa ahamuiziwile mulombwana. Kuma evo pazile ilemelelo muwari mwa Izarayeli ira 40va kada yaka anamwali a Izarayeli kadowe kamunlelege mwana Jefite nkuda Jileyadi malambo mannayi.
Currently Selected:
Anamasogolrelra 11: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
