Anamasogolrelra 12
12
Mulombwana Jefite na akuda Jileyadi kohowana na akuda Efarayimi
1Noira eno, alombwana a Efarayimi kohogumanelaga ira kawane, aliwa venyihana, dowa pandi ya Zafoni, aliwa dowa muwandela Jefite keraga: <<Kodi mwasiwa gwa nni we dowa wana na akuda Amoni wekave, we haniitana ira nidowe vamohi na weyo? Na mwasa wenno hiyo nnafuna nuutumeyele mmba mwawo na munlo.>> 2Evale Jefite ohawakulaga, liye ira: <<Miyo vamohi na atwaga nohokana kangana ulukulu na akuda Amoni. Miyo dohouitanani eto nyo kamwazile divunela mmandani mwewa. 3Mwa enne miyo dagaonne ira kamwadivunela, dohofiyeda lramwisa ingumi yaga, miyo vira dowa wana na akuda Amoni. Eto Yehova ohodivaheda aliwa mmandani mwaga. Nnga kodi mwasiwa gwa nni nyo peno zaga ira muwane na miyo?>>
4Noira enne Jefite ohagumanihaga alombwana atene a Jileyadi, aliwa dowa wana na akuda Efarayimi mwasiwa aEfarayimi kera aruwana aJileyadi keraga: <<Nyo akuda Jileyadi muli atu otawa eto munakala mwilamboni mwa Efarayimi na Manasesi.>> Kagawanne, akuda Jileyadi kohomala atolotcha akuda Efarayimi. 5Evale akuda Jileyadi ale kohodowaga, aliwa funga vevo valambuwa atu muhindje Jordawu ira akuda Efarayimi kahawande lambuwa dowa waniwa. Mwa enne kamuona nkuda Efarayimi uli watene afuna jotawa, awonga ira: <<Nnauvepani mudihiye ira dilambuwe>>, alombwana a Jileyadi ale konfuka ira: <<Kodi weyo uli nkuda Efarayimi?>> Evale liye awakula ira: <<Nari>>, 6aliwa komuwakula ira: <<Kawonga wire: <Xiboleti.> >> Evale liye ahawande wonga pama, wonga uwa aira: <<Siboleti>>, aliwa komuhinda, aliwa mpa nimburo nenne nalambuwela atu muhindje Jordawu nne. Tempu yenne kohopiwa akuda Efarayimi okwakwana 42.000.
7Mulombwana Jefite aasogolrenlre aIzarayeli yaka tanu na imohi. Mwa enne Jefite nkuda Jileyadi ohokwa, aliwa mukoya sidadi imohi muwari mwa ilambo ya Jileyadi mwemo mwabaliwe liye.
Anamasogolrelra amohiwa kaasogolrenlre aIzarayeli Jefite agakwile
8Nomala eno, mulombwana Ibisani nkuda Beleme gwahanle vamalroni va Jefite, liye asogolrelraga aIzarayeli. 9Liye anna ahima a anapongwe 30 vamohi na anavihiyana 30. Ahimaye a anavihiyana 30 ale aatelihile na alombwana a malogo amohiwa.#12:9 aatelihile na alombwana a malogo amohiwa. Kaniziwile akala malogo anawongiwa va ba malogo amohiwa a aIzarayeli owu akala ba malogo amohiwa a unde. Eto noira eno ohatukula ahiyana 30 a malogo amohiwa, ahimaye a anapongwe 30 ale, aliwa atela. Liye aasogolrenlre aIzarayeli yaka tanu na mbinli. 10Noira eno, Ibisani ohokwa, liye koyiwa Beleme.
11Nomala eno, mulombwana Eloni nkuda Zebuloni gwahanle vamalroni vaye, liye asogolrelraga aIzarayeli. Eto liye aasogolrenlre aIzarayeli yaka kumi. 12Noira eno, Eloni ohokwa, liye koyiwa sidadi ya Ayijaloni mwilamboni mwa Zebuloni.
13Nomala eno, mulombwana Abidoni mwana Hileli nkuda Piratoni gwahanle vamalroni vaye, liye asogolrelraga aIzarayeli. 14Abidoni anna ahima 40, eto ohokana vizulu 30 kawendetcha na aburu 70. Liye aasogolrenlre aIzarayeli yaka tanu na taru. 15Noira eno, Abidoni mwana Hileli nkuda Piratoni ohokwa, liye koyiwa sidadi ya Piratoni, ilambo ya Efarayimi mmwangoni mwa akuda Amaleki.
Currently Selected:
Anamasogolrelra 12: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
