Izaiya 5
5
Bwanyuliwa wa munda wa Yehova
1Nnafuna dimuimbele nyumbo nfwaga unamuziveliwa miyo, diimbe nyumbo zela munda wa uva wa wenno unamuziveliwa miyo.#5:1 Muwari mwa mazwala, maliba imba wenno unaviitana miyo gu namafiyiheda Izaiya. Eto nfwaga unamuziveliwa miyo gu Mulugu. Eto munda wa uva wa wenno unamuziveliwa miyo ba aIzarayeli. Nfwaga unamuziveliwa miyo ohokana mundaye wa uva wenno amulimile liye vateyani yapama mutchindo mwa mwango. 2Liye ohomala tipulra pama, liye kumihamo mabwe matene kafwanyeya emule, liye zalela miratchi da uva dapama dosakulrelreya. Ohomanga eto nyumba yolapa ya gwarda vari va munda viwa, eto ohosakanya tanki ira kanyingalelegemo uva ira akume vinyu. Yodediha yaye yali yoira: <<Mmundani mu munovaha uva wapama.>> Mbwenye mundole jovaha jiwa jali uva owawa ohokana mabasa.
3Yehova unawonga ira: <<Nyo atene munakala Jeruzalemu, na nyenne alombwana atene munakala Juda, nnauvepani ira munitonge vari va miyo na munda waga wa uva uyo. 4Kodi kohokalavo makalelo amohiwa afuna miyo nnga diirena, anno dahairilena miyo? Miyo dadediheda ira mmundani mu munovaha uva wapama. Nnga jiwandeyile avi vahaga uva ohokana mabasa? 5Eto nnafuna duwandeleni, ejo jinafuna miyo iranavo na munda wa uva uyo. Nnafuna digumulevo tchinga niwa ira anavinyama kamale djamo. Nnafuna digumulemo muruwa ira anavinyama kamale nyingalelamo. 6Era eno nnosandutcha munda uyo ira akale matala, miratchi diwa kadiza dikaseliwa nne kadiza ditawuleliwa. Makaruwe na minga nnerege melamo. Miyo eto nnowonga na mirambo ira mmundani mule mwaharumbweliwe muzongwe.>>
7Tchoira munda wa uva wa Yehova wa Makuru Matene nnamuwonga miyo ula, ba akuda Izarayeli. Eto alombwana a Juda, aliwa ti miratchi dapama dazala liye. Liye adediheda ira munokuma tonga wa ibaribari. Mbwenye aonnemo tatiliwa wa sangiri bahi. Adediheda upama, mbwenye avwa kuto bahi.
Atu otembelrelreya
8Udilu wa atu anne anakalela indjiviha nyumba na ale anakalela wendjedaga minda, fiyeda wakiha mamburo matene.#5:8 Udilu wa atu anne anakalela indjiviha nyumba: Malambo a mundulrimu Mulugu ohagawela malogo matene a aIzarayeli ilambo yewa. Muwari mogawa, Mulugu aatongile aIzarayeli ira tereno yavahiwe atu ile kahamugulihede mutu uli watene ira ikale yaye kala no kala. So mbwenye Mulugu arumelihile ira mutu afuna, podi gulavo ira alabegena tereno ile fiyeda Yaka Yokutchiwa. Yafiya yaka yenno, tereno ile yowelela kala ya mwinnya oroma ule. (Levitiku 25:24-34) Va Mulugu unaagwihana mulandu atwale kagula tereno, aliwa garatina, aliwa hawelihedaga annyiwa nnga Mulugu mwawongele liye. Munafuna nnga ilambo yatene ikale yenyu, mukalemo nyoka. 9Dihivwa Yehova wa Makuru Matene alumbelaga ira: <<Na ibaribari nyumba didjindji do nnoza disanduwe dikale madebe. Nyumba dilukulu doriya do kamunakalege atu. 10Munda wa uva wa sitaki taru, vinyu unakumege yombwe imohi bahi. Zala malanta kumi a mbewu, johanda jiwa jinakumege lanta nimohi bahi.>>
11Udilu wa atu anno anavenya na mabebehene, katamangelaga jong'wa jolrezelriha, kang'waga fiyeda mahiyu, kagali olrezelrene na vinyu. 12Aliwa so mabasiwa ku imba arpa na lira, makotcho na mafalauta kang'waga vinyu vapwandoni viwa. Mbwenye joira ja Yehova kinabalra, eto kinawanda ona mabasa alabile Yehova na kopolo daye. 13Na mwasa wenno atwaga anoza katukuliwe, kakale azari tchoira kinna zelru. Alombwana ewa orihediwa anoza kakwe na ndala. Anamwindji a atu anoza kakwe na ntona. 14Nona Nimburo na Anokwa nilive nohuleya nene, nilive wanoni gagara ira naawatchele. Atu a muibalini mwa umwene wa Jeruzalemu vamohi na anamwindji a atu a vaheno vene anoza katitelemo, vamohi na aliba hagalala anno anaziveliwa Jeruzalemu. 15Mutu uli watene unoza ayevihiwe, atu atene anoza katitihiwe. Aliba jurungula anoza kanyaswihiwe. 16Mbwenye Yehova wa Makuru Matene unoza atamaleliwe na mwasa otonga waye wa ibaribari. Mulugu Otchena unoza aonihe tchena waye muwari mwa upama unera liye. 17Nomala eno, vadebe va atu orayela vinoza vikale vodjihiwa mabila. Ana mabila anadjege mmadebe muwa.
18Udilu wa atu anno anavitutumulela jotega muwari mwa ja ungongomwa jiwa. Anno anavitutumulela jotega nnga mutu unatukula liye mingohi dolimba amangagana aterelado na kavalo. 19Aliwa anawonga ira: <<Yehova aze mobaranya, ahinde mabasaye mobaranya ira nione mabasa aye ayo. Mulugu Otchena wa Izarayeli asusele uno na zelru daye, zelru daye dize ira niiziwe.>>
20Udilu wa atu anno anabalra jabure nnga japama, eto japama anabalra nnga jabure. Anno anaona isi nnga moneya, eto moneya anaona nnga isi. Aliwa jowawa anaona nnga jotapilra, eto jotapilra anaona nnga jowawa. 21Udilu wa atu anno anaviona nnga atu a zelru na ale anaviona nnga atu owendjela. 22Udilu wa atu anno anaiziwa ng'wa vinyu burebure na atu anatukula mirima diwa, kahelaga va jolrezelriha. 23Udilu wa atu anno anaavaha razawu atu otega na mwasa wa kunya, amala aliwa mugwihana mulandu wenno ahategile.
24Nona sawasawa nnga malumi a munlo anamida atu makata, sawasawa nnga malatchi oumma anajeliwa atu na malumi a munlo kamorelaga vati, na aliwene eto mitchitchi diwa nnoza divunde eto folori diwa nnoza diveveruwe nnga tumbulru. Mwasiwa kohokonda malamulo a Yehova wa Makuru Matene, aliwa kohopeta mazu a Mulugu Otchena wa Izarayeli. 25Nona Yehova atakaleliwaga na makalelo ohokala a masika zela atwaye. Ndanda naye nilive notapula nene ira aaonihe goyi. Mwango dohotekenyeya eto mitembo diwa dali gwembelre gwembelre nnga lixu murampani. Masiki agairilena eno, Yehova uwali waye kumanle, ndanda naye nilive notapula nene ira aaonihe goyi.
26Yehova unoza ahelewo sinale, aaitane malogo a atu anakala olapela. Unoza aaitane atu na pintu ira kakume magomelo wa ilambo ya vati, kaze kaagondjihe akuda Juda. Kaing'anani aliwa anoza kaze motamanga pama.#5:26 Unoza aaitane atu na pintu ira kakume magomelo wa ilambo ya vati, kaze: Atu anafuna za kinazela ira kamuhare Yehova mbwenye Yehova unaaitana ira kaze kaaonihe atwaye goyi na mwasa wa jotega jiwa. Nione Detoronomiyo 28:47-52; Izaiya 7:18. Atu anawongiwa ofuna za agondjiha aIzarayeli ba akuda Asiriya. Nione Izaiya 10:5-6. 27Muwari mwa aliwa kalivo unafuna waheya nne kalivo unafuna gwagwaduwa nne kalivo unafuna titela nne gona. Nne masintu ewa kiza kalrelra. Nne mingohi da xineli diwa kadiza dipazeya. 28Mafumo ewa kalive oirwene. Maurwa ewa kalive oreyene. Madodobwa a kavalo diwa anokala olimbene nnga mabwe. Maroda a aaterelado ewa anavweya nnga nalripembezu. 29Kuwa wewa uli nnga kuwa wa podogoma, nngave ana podogoma kanlaga. Aliwa anoimba turumba, aliwa anohinda nyamiwa. Anodowana ha vale eto kalivo unafuna awakiheda.#5:29 aliwa anohinda nyamiwa: Nyama inawongiwa va ba atu abure anawongiwa muwari mwa Izaiya 5:18-23. 30Siku nenne turumba yewa inoza ikale nnga kukuma wa mahindje a bara. Eto mutu aing'ana ilambo, unaonege isi na makatamiho bahi. Eto moneya unoza usanduwe ukale isi na mwasa wa mirambo.
Currently Selected:
Izaiya 5: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
