Izaiya 6

Izaiya ohomuona Yehova

1Yaka yakwile mwene Uziya, dohomuona Yehova agagaratenle mpando wa umwene olapa, otukuleleya. Owara bata yolapa fiyeda mwezo ozala Nyumba ya Yehova. 2Vazulu vaye vohoimela aserafini. Kada serafini ohokana mapepelo matanu na nimohi. Mapepelo menli akunenlena wintoni waye. Mapepelo amohiwa menli akunenlena manyaloni. Mapepelo menli amohiwa era vavana. 3Aserafini ale kohokuwaga keraga: <<Otchena, otchena, otchena gu Yehova wa Makuru Matene. Undimuwa waye uzala ilambo ya vati.>>

4Na mwasa okuwa wewa, kaxilu da misuwo dogwedegwedeya. Mmba mule mohozala utchi. 5Evale miyo dohowongaga ira: <<Dihikwa miyo! Tchoira dihimala dimela. Mwasiwa miyo dili mutu okana milomo dotakala eto nnakala muwari mwa atu okana milomo dotakala eto dihimuona Mwene wenno uli Yehova wa Makuru Matene na meso aga.>>

6Evale mmohi mwa aserafini ale ohovavela valigi miyo aganna nikalra na munlo mmandani mwaye. Nikalra niwa atukunle na alikati vaibuwani ya mikuto. 7Evale liye ohosakwinyana nikalra nne vamilomoni vaga, liye ira: <<Kaing'ana miyo dihisakwinya milomo dawo na nikalra ni. Mulandu wawo watene umalihiwa. Jotega jawo jatene jihileveleliwa.>>

8Kuma evo dohovwa mazu a Nabwiya kawongaga keraga: <<Kodi unafuna hiyo muruma bani ira adowe?>> Evale dohoiraga: <<Miyo dili evano, dirumeni.>> 9Evale Yehova odiwakula eraga: <<Kadowa waawandele atwayo, wire: <Vwa munerege vwa mbwenye kamunavwamo. Ona munerege ona mbwenye kamunaonelramo.> >>

10Yehova eto ohodiwandela ira: <<Waavandihe atwala mirima diwa, waatiyele mabaru ewa, waafunge meso ewa tawiha ira anaze kaone na meso ewa, eto tawiha ira anavwe na mabaru ewa, eto tawiha ira anaze kaonelremo na mirima diwa, amala katwaruwe, kavulumutchiwe.>>#6:10 waafunge meso ewa tawiha ira anaze kaone na meso ewa: Mabasa a mulombwana Izaiya tchali atwarutcha aIzarayeli mbwenye ali ira awendjede mulandu wewa muwari molaleya waye. Tchoira twaruwa uli mmandani mwa Mulugu hiya mmandani mwa hiyo atu. Nione 1 Samuweli 2:25; Ezodu 4:21, 11:9-10; Roma 9:16-18. Kalaga nnga Farawu. Mazu avwile liye na Mozeji na jionihedo jaonne liye kajalabile ira atwaruwe mbwenye jalabile ira gwana waye mulandu udowegeve sogolro. (Ezodu 7:3-4; Roma 9:17-18) 11Evale dohofukaga ira: <<So Nabwiya jejo fiyeda alini?>> Evale ohodiwakulaga ira: <<Ante sidadi datene disanduwe dikale madebe, nyumba datene dahakayena atu okalamo, eto ilambo yatene isanduwe ira ikale isalesale. 12Miyo dagali Yehova nnafuna daatamihede atwala olapela wene, ira muwari mwa ilambo muindjive matala. 13Masiki pandi yanekumi ihale mwilamboni, na yenno inoza itumeyiwe akoka kalaga nnga mutu atumeyaga magodo a mugonya nari magodo a karvaliyo, agamanle kakata mitengo diwa wanle. Nigodo nne ti mbewu yotchena inafuna hala.>>#6:13 Nigodo nne ti mbewu yotchena inafuna hala. Mazwala anakala nnga kohokalawo atu a vang'ono anafuna vulumuwa. Muwari mwa livuru na Izaiya, mazu madjindji anakala oagwihana mulandu aIzarayeli. Mbwenye mazu a vang'ono anakala oalimbiha atu a nroromelo ira anoza kakale pama. (Izaiya 3:10, 4:3-4, 7:9, 10:20-21)

Currently Selected:

Izaiya 6: iLolo

Highlight

Copy

Compare