Jenesesi 37

Muselu wa Joze

1Jako akala ilambo ya Kana wewule wakaletcha babaye nnga mutu oza. 2Ula gu muselu wa Jako na mwanaye Joze. Joze aganna yaka 17, ali namakumbuza wa jifuwo ja babaye. Liye akumbuza vamohi na abalaye amohiwa anno kabaliwe na Bila na Zilpa, anno kafwanyeya kagali ahiyana amohiwa a Jako. Muzombole Joze odowetcha wongaga wa babaye jengo jotakala jaira abalaye ale.

3Jako wenno aitaniwa na nzina na Izarayeli, asimbwetcha muziveliwa Joze kwaranya ahimaye amohiwa, mwasiwa liye ambanle Joze agaulunle. Mwa enne ohomusonela bata yoriyetchetcha. 4Mbwenye Joze abalaye ale kagaonne ira: <<Baba unamuziveliwa bure Joze kwaranya hiyo vano>>, kohoroma mutakaleliwa fiyeda aliwa hawandaga tapanya na liye mwa makalelo apama.

Joroha ja Joze

5Siku nimohi, Joze ohoroha. Noira eno, ohodowa wa abalaye, liye awandela ira: 6<<Dihiroha. Nnouvepani ira muvuruwane irohile miyo. 7Miyo dirohile nagali mmindani, nimangaga mapitika. Evale nipitika naga nohoimela okave. Eto vohodibeliwa mapitika mwamangile nyo kogumana, aliwa werewera nipitika naga, aliwa nikokorela.>> 8Abalaye kagavwile enne, kohowongaga keraga: <<Mwa ibaribari weyo unafuna ukale mwene wehu ira unitongege hiyo?>> Mwa enne abalaye ale mutakaleliwa wewa wohosimbwagave na mwasa wa joroha jawonga liye jile.

9Siku nimohi niwa, Joze ohoroha akoka, liye awandela abalaye ale eraga: <<Miyo dihiroha akoka. Fendo ila morohani, dionne nzuwa, mwedi, vamohi na nyenyedi kumi na imohi, jatene ejo johoza aliwa diwerewera miyo, dikokorelaga.>> 10Mbwenye liye agamuwandenle babaye vamohi na abalaye ale yoroha yenne, babaye agavwile ohomusumulula eraga: <<Kodi yoroha yenno, yoroha nni? Weyo unaumbuwela ira miyo na mmawo na abalawo atene nnoza nukokorelege weyo nifiyihe miru dihu vati?>> 11Mwa enne abalaye ale komukalela nrima nlukulu. Mbwenye babaye agarati, oumbuwela jengo jatene jene jawongile mwanayele.

Gulihiwa wa Joze na abalaye

12Tempu imohi Joze abalaye kohodowaga djiha jifuwo ja babiwa pandi ya Sikemu. 13-14Mwa enne, siku nimohi Izarayeli ohowonga na Joze, liye ira: <<Abalawo anadjiha jifuwo Sikemu. Miyo nnafuna durume udowe waaone akala aliwa kali apamene na jifuwo jiwa jene. Wamala, uwelele uno, uze udiwandele.>> Joze ohorumelaga ira: <<Tabo.>> Mwa enne liye ohogundeya ndabo na Eboroni, adowaga pandi ya Sikemu wewo wafwanyeya abalaye. 15Joze agafiyile Sikemu ule, ohoromaga wendawenda kokola da wewule, aavendaga. Mwa enne ohokala mulombwana anfwannye, liye nfuka ira: <<We unasaka nni?>> 16Liye ohowakulaga kwi: <<Nnaavenda abalaga, anno anadjiha mabila. Nnouvepani, mudiwandele uli atu, akala muhaona.>> 17Mulombwanole ohowongaga eraga: <<Uno kohokwaranyawo. Daavwile kawongaga ira: <Kambeni ilambo ya Dotani.> >> Evale Joze ohoromaga dowa Dotani ule, fiyeda afwanya waligi atu.

18Mbwenye Joze ule ahanafiye valigi atu vale, abalaye ale kohomuona liye azelaga olapela wene. Mwa enne kohoromaga mpanganela ira kampe. 19Kohowonga kada mutu na nfwaye kera: <<Namaroha ule, unaza. 20Tempu tchenna. Ndoweni nimpeni, amala nimutatileleni muwari mwa isime imohi, dedo nnafwanyeya vale. Nadowa vande, niwongeni ira mwanainyama owopiha gumutakunne. Nione joroha jaye jile jinafuna atu gomela!>>

21Mbwenye Rubeni agavwile zelru da abalaye, ohovenda makalelo ira anvune, liye kwi: <<Kanimpeni. 22Ira muvuvihe sangiri naye, kinakala pama! Mwafuna, mmuhinde, mmutatilele muisimeni yenno ili mukokolani muli hiyo mu. Eto mwanvokeda emule, kammuirele yabure.>> Rubeni awongaga enne, afunne ira amala azembe, adowe ankumihemo mbalaye ule, anvelele wa babaye.

23Kagamanle vwanana enne, Joze agafiyile vafwanyeya atu vale, kohomuhinda, aliwa muwungula bataye yoriya yenno yawarilege liye, 24aliwa dowa mutatilela muisimeni mwahali mahindje nne mwahali yengo. 25Noira eno, aliwa garati, roma dja.

Evale kadjaga, kohaona aJomayili#37:25 aJomayili kohokana ibali na Joze vamohi na abalaye. Tchoira nlogo na Jomayili nikolo niwa ali Abarahamu. Ana Jako ale vamohi na aJomayili ale kali adibiliwa mwasiwa atene mbwiyiwa ali Abarahamu. kaviraga. AJomayili ale, kakuma ilambo ya Jileyadi, kadowa guliha malrondiwa Ijipitu. Aliwa kohokana mitolro diwa doindjiva kagwelihile atu vazulu va akamelo ewa. Katukunlege makura onukela, balsamu, mira, kadowaga guliha Ijipitu. 26Evale Juda ohowonga na abalaye, liye ira: <<Kodi hiyo nampa mbalihu, nikuwa ukwa waye,#37:26 nikuwa ukwa waye owu hehi nikoya sangiri naye. jinanilabela nni? 27Ndoweni naagulihedeni aJomayili ale. Kanimuireleni yotakala, ineriha liye gu mbalihu wa sangiri nimohive.>> Liye agawongile enne, abalaye kohorumela.

28Mwa enne aliba malronda aJomayili ale kagafiyile vafwanyeya atu vale, abalaye ale kohonkumihamo Joze muisimeni mule, aliwa aguliheda na kobiri da parata 20, molingana na mapimelo kalabana atu tempu yenne. Evale aJomayili kohomudowana Joze Ijipitu.

29Abalaye ale tempu yamukumihamo atu Joze muisimeni mule kamugulihaga, mbaliwa Rubeni ule kalivo. Evale vazilege liye apatamela muisimeni mule ahanfwanyamo, ohokawula jowara jaye.#37:29 ohokawula jowara jaye. Wanle kawula jowara wotapulela jengo mbinli. Vamohi viwa akala takaleliwa vamohi viwa ali kumbanya. Va nnaona ira afwase mwasiwa ali okumbanya. Tchi imohive eto yairile Jako vs 34. Nione eto Jenesesi 44:33; 1 Samuweli 4:2; 2 Samuweli 1:11, 13:31; Matewuji 26:65; Joira ja Anamarumiwa 14:14. 30Mwa enne ohowelela wa abalaye kwi: <<Muzombole muisimeni mule kalimo! Miyo nnafuna didowe waani?>>

31Evale aliwa kohosiga mbuzi, aliwa tukula bata ya Joze yoriya ile, aliwa ibwiniha musangirini mule, mala zoliheya sangiri yatene yenne. 32Noira enne, kohotukulaga batele, aliwa dowa muoniha babiwa, atu kwi: <<Kaing'anani babani batela. Nifwannye yagali vati gwembelre. Muing'ane akala tchenna ya mwaninyu.>> 33Evale Jako againg'anne, ohowongaga eraga: <<Mwa ibaribari batela tcha mwanaga Joze. Na ibaribari Joze mwanainyama wa mukokolani gumutakunne, liye munyenya.>>

34Evale Jako mokumbanya mwaye, ohokawulaga jowara jawarilege liye, tukula sakwi, liye mangiha mmwinini mwaye. Evale ohomala malambo madjindji amunlelaga mwanaye. 35Mwa enne anaye atene, anavihiyana, anapongwe, kofunafuna ira kammiyalihe babiwa ule. Mbwenye Jako kawanda miyaliheya. Ohowonga eraga: <<Nnerege nla eni fiyeda dikwe, didowe Nimburo na Anokwa dagumane na mwanaga.>> Mwa enne ohokalelave munlela mwanaye.

36Aliba malrondale kagamugunle Joze, kamudowilena Ijipitu, aliwa muguliheda mulombwana mmohi eriwa Potifare, wenno afwanyeya agali musogolrelri wa agwarda a Farawu, mwene wa Ijipitu.

Currently Selected:

Jenesesi 37: iLolo

Highlight

Copy

Compare