Jenesesi 38

Muselu wa mulombwana Juda na nijaliye Tamari

1Mwa tempu yenne Juda ohovenyawo wa abalaye, liye dowa kala vande va Hira, nkuda Adulawu. 2Agali wewule, Juda ohomuonaga namwali mmohi. Namwali ule babaye ali nkuda Kana eriwa Suwa. Evale Juda ohomutela mwana Suwa ule, aliwa gonaga vamohi. 3Evale muhiyanaye ule ohokana vambani, mbala mwanapongwe, babaye liye nvaha nzina na Eri. 4Noira enne, ohowelela kana vambani akoka, mbala mwana mmohiwa wa mulombwana, mmayele liye nvaha nzina na Onani. 5Kagadowile Kezibe, ohombala mwana mmohiwa wa mulombwana, nvaha nzina na Sela.

6Evale mwanaye murandji aitaniwa Eri ule, agaulukunle, Juda ohomuteliha na muhiyana mmohi aitaniwa Tamari. 7Mbwenye Eri mwana murandji baliwa wa Juda ali mutu wabure vamentoni va Yehova. Na mwasa wenne, Yehova ohompa. 8Evale Eri agakwile, Juda ohomuwandelaga mwanaye mmohiwa wanembinli wenno aitaniwa Onani ule, liye ira: <<Umutele makwele ula, umugonegena ira umbalele mwana mbalawo wenno ukwile.>>#38:8 umbalele mwana mbalawo wenno ukwile: Malambo a mundulrimu yolemelela yanna atu yali ira mulombwana akwa, mbalaye amutele makwele ira mwana oroma baliwa atukule nzina na marafula. Sogolro eto nnovwa ira Mulugu ohawandela aIzarayeli ira kairegena eno. (Detoronomiyo 25:5-10)

9Mbwenye Onani ohovayela iziwa ira: <<Eni masiki miyo dimbale mwana na muhiyanola, mwana unafuna miyo mbala kanakala waga, unakala wa mbalaga ukwile.>> Mwa enne liye agonaga na mulamwaye ule, ilombwaniwa atatilela vati, mwasiwa kafuna mbala mwana ira akale wa mbalaye ukwile. 10Yenne yairana liye yali yengo yotakala vamentoni va Yehova. Na mwasa wenne, Yehova ohompa na liyene.

11Evale Juda ohowonga na nijaliye Tamari eraga: <<Uwelele vande va ababawo, wakaleve makwele eno, fiyeda mwanaga Sela aulukule. Liye aulukula, unoza autele.>> Juda airaga enne aova ira mwanaye Sela unakwe nnga jairile abalaye ale. Mwa enne Tamari ohowelelaga vande va ababaye.

12Vagavirile malambo, Juda muhiyanaye, mwana Suwa ohokwa. Juda agamanle munlela muhiyanaye ule, ohovenyaga vamohi na nfwaye Hira, nkuda Adulawu, aliwa dowa ilambo ya Timina ira Juda adowe agumane na alombwana kasata mabilaye. 13Evale Tamari ohowandeliwaga ira: <<Marafula mamunawo babaye unadowa Timina ira asate mabilaye.>> 14Tamari agawandeliwe mazu anne, ohoumbuwelaga eraga: <<Miyo nijalaga adilanyaga ohodiwandela ira: <Mwanaga aulukula unoutela.> Eto mwanaye amuwonga liye uhuulukula eto kinafuna za ditela.>> Mwa enne ohowungulaga jowara jaye ja umakwele jile,#38:14 ohowungulaga jowara jaye ja umakwele: Tempu yenne amakwele kokana jowara jawaretcha atu jotonyiheda ira mutule gu makwele, masiki nnga tempu ili hiyo ila vilambo dimohi diwa kohokana yolemelela yenno. liye wara jimohi jiwa eto ohovikunela na nguwo wintoni, liye dowa garati mundila nnga puta, va mulango ovolowa Enayimi, ndila yodowa Timina.

15Evale Juda azaga, kamuona pama, esaga gu puta na mwasa oira muhiyanole ohovikunela wintoni. 16Evale Juda ohodowaga valigi Tamari mundila mule, liye muwongana eraga: <<Nnafuna digone na weyo>>, ahaiziwile ira ali nijaliye. Tamari ohomuwakula, liye ira: <<Wagona na miyo unafuna udivahe nni?>> 17Juda ohomuwakula ira: <<Miyo dadowa vande, nnourumiheda mbuzi imohi ing'onong'ono mwa jifuwo jaga.>> Liye ohomuwakula eraga: <<Miyo mbwenye nnafuna ubabihe dihiyeda ipanda fiyeda udirumihede mwana mbuzi iyo.>> 18Evale Juda ohonfuka, liye ira: <<Ipanda tchivi nnafuna miyo uhiyeda?>> Liye ohowakula, liye ira: <<Udihiyede karimbu ukapatchile we nkohi mwawo, na ngohiwene#38:18 karimbu inawongiwa ila ali nnga kolare kawara atu, vevo vafwanyeya nzina na mutule, liye wendagana. Evale afuna asinari dugumento, abubuda na karimbu yaye. vamohi na ikumbuzo inna we mmandani mo.>> Noira eno, Juda ohomuhiyeda jengo jejile, liye mugonana. Agamugonnena, funa dowa vande, Tamari ohokana vambani.

19Noira eno, ohodowaga kumihawo nguwo yali wintoni waye ule, liye wara, jowara ja umakwele. 20Eto mulombwana Juda ohotukulaga mbuzi, liye nvaheda nfwaye nkuda Adulawu ule ira adowena wa muhiyanole anvahede jengo jaye jile. Mbwenye agadowile, kanfwannye. 21Evale nfwayele ohafuka alombwana a wewule ira: <<Kodi puta wa Enayimi afwanyeya vandila vale, udowile uvi?>> Aliwa kohomuwakula, aliwa ira: <<Vano kanababihege kalavo puta.>>

22Noira eno, liye ohowelelaga wa Juda, liye muwandela ira: <<Miyo kadinfwannyevo. Eto daganfukedile atu a wewule kawongile ira: <Uno kanababihege kalawo puta.> >> 23Juda ohomuwakula, liye ira: <<Umuhiyede jengo jo, tawiha ira unaninyaswihe. Kalivo unafuna wongaga, tchoira miyo dihimurumiheda mwana mbuzi ila, weyo wire hanfwanya.>>

24Vagamanle medi miraru, Juda ohowandeliwa ira: <<Nijalawo Tamari uraruwa fiyeda kana vambani.>> Evale Juda agavwile enne ohowongaga, liye ira: <<Mmudowena unde wa sidadi ira atumeyiwe wewo.>> 25Evale atu kamudowagana unde wa sidadile ira atumeyiwe, Tamari ohorumiha milanyo dodowa wa nijaliye Juda ira: <<Mwinnya wa jengo jinna miyo ji, gudivahile garavida ila. Nnouvepani ira mmusayele mwinnya wa karimbu ila, na ngohiwa, vamohi na ikumbuzo ila.>> 26Evale Juda agaonne jengo jile, ohorumelelaga ira: <<He, na ibaribari jengo ji jaga!>> Mwa enne ohowongaga, liye ira: <<Liye gu mutu wapama dikwaranya miyo. Tchoira miyo dimukamelihile mwanaga Sela.>> Kuma evale Juda kamugonnena akoka.#38:26 Kuma evale Juda kamugonnena akoka. Muwari mwa istoriya ila, kahi ira Tamari ohosakanyeda yengo yapama vamentoni va Mulugu. So mazwala ananiwandela jairile atu wanle. Mazwala anohidedela umboni ira mutu wapama unafwanyeya mwilamboni ya vati gu Mulugu bahi.

27Tempu yobala yagafiyile, aliwa kohomuona ira Tamari unaabala anasambini. 28Mwa enne aromaga bala, mwana mmohi ohokumihedaga ndanda naye unde. Evale namabaliha ohotukulaga isala yofila yagali youmbuwela liye mmangana ndanda nne, liye ira: <<Ula gu murandji baliwa.>> 29Mbwenye mwana omangihiwa na isala ule ovolotchiha mandaye. Evale murandji baliwa ali mwana mmohiwa ule. Namabaliha ule agaonne enne ohowonga, liye ira: <<Weyo uhutwa ndila!>> Evale kohonvaha mwanole nzina na Pereji [ku wonga twa ndila]. 30Ogomiheda baliwa ali mbalaye amangiwe na isala yofila yagali youmbuwela ule, aliwa nvaha nzina na Zera. Ambinlene kali alombwana ve.

Currently Selected:

Jenesesi 38: iLolo

Highlight

Copy

Compare