Ezodu 7

Mozeji na Arawu kohowonga na Farawu

1Evale Yehova ohomuwakulaga Mozeji eraga: <<Kaing'ana, miyo nnosakanya ira Farawu auonege weyo nnga uli miyo Mulugu. Eto namafiyiheda wawo unafuna akale mbalawo Arawu. 2Weyo unerege dowa wamuwandelege Arawu jatene jinauwandelege miyo. Era eno Arawu gunafuna dowa wongaga na mwene Farawu, amuwandele ira aahiye Ana Izarayeli kavenyemo mwilamboni mwaye. 3Mbwenye miyo nnoummiha murima wa Farawu ira aharumelege mazwinyu. Eto nnoirana jionihedo na jotikiniha joindjiva mwilamboni mwa Ijipitu. 4Mbwenye masiki eno, liye kanarumela jinawonga nyo. Era eno nnoza divenyihe ndanda naga na kopolo, daakumihemo muIjipitu atwaga Ana Izarayeli malogo matene nnga mukalele atu muwari moatonga aIjipitu na joira jidjindji ja kopolo. 5Miyo datapula ndanda naga na kopolo diroma aoniha goyi aIjipitu, difiyeda akumiha Ana Izarayeli vari vewa, pa evo vanafuna akuda Ijipitu iziwa ira miyo dili Yehova.>>

6Mwa eno, Mozeji na Arawu kohokwakwaneliheda jatene nnga mwemo mwaarumele Yehova. 7Fwanyeya ira tempu yadowa atu wonga na Farawu, mulombwana Mozeji anna yaka 80 eto mulombwana Arawu anna yaka 83.

8Yehova ohomuwandela Mozeji na Arawu eraga: 9<<Mwadowa, Farawu awonga ira: <Kairanani yotikiniha imohi ira miyo diroromele jinawonga nyo>, weyo Mozeji umuwandele Arawu ira: <Katukula ikumbuzo yawo, utatilele vati, vamentoni va Farawu>, era eno, ikumbuzo ile inosanduwa ikale nyowa.>> 10Noira eno, Mozeji na Arawu kohodowa wa Farawu eto kohoirana nnga mwemo mwaarumele Yehova. Arawu ohotukula ikumbuzwaye, liye tatilela vamentoni va Farawu na anamalabaye. Ikumbuzo ile yosanduwa kala nyowa. 11Eto Farawu agaonne enne, na liyene ohaitana ang'anga okwima. Muwari mwa ang'anga okwima ale, amohiwa kali oiziwa mirombwe, amohiwa kali aliba lowa a muIjipitu mule. Kagazile, na aliwene kohosakanya jimohive muwari mwa masenga ewa. 12Kada mutu otatilela ikumbuzo yaye vati eto yosanduwa kala nyowa. Mbwenye ikumbuzo ya Arawu yohomidaga vikumbuzo da akuda Ijipitu dile. 13Mbwenye masiki jaireyileve eno, murima wa Farawu afwanyeyave oummene. Nnga mwemo mwawongele Yehova, Farawu kafunile vwa yowonga ya Mozeji na Arawu.

Ntembelrelro noroma: Mulugu ohosandutcha mahindje kala sangiri

14Evale Yehova ohomuwandela Mozeji eraga: <<Murima wa Farawu unafwanyeya agalive oummene. Kanafuna ahiya atwaga ira kadowege. 15Mwa eno, metchelo na mabebehene udowe wagumane na mwene Farawu adowaga muhindje Nilu. Weyo ubehe, usogolre wamudedihege mutcherelani mwa muhindje ira liye adowaga, aufwanye wewo. Eto wadowaga, utukule mmandani mwawo ikumbuzo yenno yasanduwile ikala nyowa. 16Mwagumana, umuwandele wire: <Yehova, Mulugu wa aEberewu gudirumile dize diwonge na weyo ira: <<Waahiye atwaga kadowe kaditamalele muisalesaleni.>> Mbwenye weyo ante peno kunavwelele yenno iwongile Yehova. 17Nona Yehova unawonga ira unafuna asakanye yengo ira weyo uiziwe ira liye gu Yehova. Yenguwa tchi ila: Miyo nnafuna dikome mahindje a Nilu na ikumbuzo inna miyo mmandani mwaga ila ira kasanduwe kakale sangiri. 18Somba datene nnafwanyeya muhindje Nilu nnomala kwamo. Eto Nilu watene unerege nuka nrimba nabure. Era eno aIjipitu kera kang'we mahindjala, anerege awendiha mare.> >>

19Yehova ohowongagave na Mozeji liye ira: <<Umuwongena mbalawo Arawu ira atukule ikumbuzwaye, atapule muwono waye, atonye mahindje matene a Ijipitu, atonye mihindje datene dindimuwa na ding'ining'ini, na matiya eto vamohi na madabo, na mwatene mwene munakoya atu mahindje ira mahindje matene anno kasanduwe, kakale sangiri. Arawu airana eno, mahindje a mwilamboni mwatene mwa Ijipitu anosanduwa kakale sangiri, masiki mahindje anafwanyeya muwari mwa jengo ja matabwa nari ja mabwe.>>

20Evale Mozeji na Arawu kohoirana enne nnga Yehova mwaarumele liye. Kagali muhindje Nilu, Farawu na anamalabaye kaing'anaga, Arawu ohovenyiha ikumbuzo yaye, liye koma muhindje Nilu. Mahindje matene kohosanduwa kala sangiri. 21Somba datene dali muNilu dohomala kwamo mmuhindjeni mule. Muhindje ule onuka nrimba nabure. Evale aIjipitu tchawanda ng'wa mahindje a Nilu. Eto fwanyeya ira mahindje matene kafwanyeya ilambo yatene ya Ijipitu kohosanduwa kala sangiri.

22Evale ang'anga okwima a Ijipitu na aliwene kohoirana jimohive muwari mwa masenga ewa. Mwa enne, mwene Farawu murimaye afwanyeyave oummene. Nnga mwemo mwawongele Yehova, Farawu kafunile vwa yowonga ya Mozeji na Arawu. 23Evale Farawu ohovenya, liye dowaga vande vaye. Nne mmirimani mwaye kabalrile nnga yengo. 24Noira enne, akuda Ijipitu atene kohoroma timba visime mmambalo mwa muhindje Nilu ira kakayena mahindje ong'wa, mwasiwa mahindje a Nilu tchang'weya. 25Yehova agasandutchile mahindjale kala sangiri, vohomala malambo matanu na menli mahindjale keragave nuka.

Currently Selected:

Ezodu 7: iLolo

Highlight

Copy

Compare