Ezodu 6
6
Mulugu oholumbela wa Mozeji ira aawombole aIzarayeli
1Yehova ohomuwakulaga Mozeji liye ira: <<Tchineneva weyo unoona yengo inafuna miyo muirela Farawu. Miyo nnomukanyiheda Farawu na ndanda naga na kopolo ira auhiyeni ira nyo atwaga mudowege. Na ndanda naga na kopolo miyo nnomukanyiheda ira autamangiheni mwilamboni mwaye.>>#6:1 MaBibiliya amohiwa anawonga ira: Eto Farawu unourumani ira mukumemo na ndanda naye na kopolo. Eto na ndanda naye na kopolo unoutamangihani mwilamboni mwaye.
2Mulugu ohowongagave na Mozeji eraga: <<Miyo dili Yehova. 3Wanle miyo davioneyiha wa Abarahamu, wa Izaki, wa Jako nnga Mulugu wa Kopolo Datene. Mbwenye kadaaiziwihile nzina naga na Yehova. 4Tempu yakaletcha atu ilambo ya Kana nnga alendo, dohosakanya yopangana yaga na aliwa ira: <Vasogolro ilambwela ya Kana inoza ikale yenyu.> >>#6:4 dohosakanya yopangana yaga na aliwa ira: <Vasogolro ilambwela ya Kana inoza ikale yenyu.> Zela Abarahamu nione Jenesesi 12:3,7, zela Izaki nione Jenesesi 26:3, zela Jako nione Jenesesi 28:13.
5Mulugu ohowongave eraga: <<Miyo eto dihivwa nla wa Ana Izarayeli na mwasa okala azari mmandani mwa aIjipitu. Mwa eno, dihiumbuwela yopangana yenno yasakanyile miyo na aliwa. 6Nona, udowe waawandele Ana Izarayeli, wire: <Miyo dili Yehova. Miyo nnourulani mitolro dupwatelihileni aIjipitu, duvuneleni muuzarini muli nyo eto nnouwombolani na muwono waga wa kopolo muwari moatonga aIjipitu mwa joira jidjindji ja kopolo. 7Miyo nnoutukulani ira mukale atwaga, eto miyo nnokala Mulugu wenyu. Eto nyo munoiziwa ira miyo dili Yehova Mulugu wenyu, wenno unaurulani mitolro dupwatelihileni aIjipitu. 8Miyo nnoudowanani ilambo yenno yalumbenle miyo avaha makolo enyu Abarahamu, Izaki na Jako. Ilambo yenno miyo nnouvahani ira ikale yenyu. Miyo dili Yehova.> >>
9Evale mulombwana Mozeji ohodowa awandela jejile Ana Izarayeli. Mbwenye aliwa tchafunne nvwa jawongile liye na mwasa okatamiheya waona atu mmirimani mwewa eto na mwasa wa uzari wewa wabure. 10Evale Yehova ohomuwandelagave mulombwana Mozeji eraga: 11<<Udowe wamuwandele Farawu mwene wa Ijipitu ira aahiye Ana Izarayeli kakumemo mwilamboni muli atu.>> 12Evale mulombwana Mozeji ohowongaga na Yehova eraga: <<Akala Ana Izarayeli kinafuna divwa inawonga miyo, kodi unafune divwa unakale Farawu? Ing'ana eto miyo kannawanda wonga pama!>> 13Mbwenye Yehova ohomurumaga Mozeji na Arawu eraga: <<Mudowe mwawonge wa Ana Izarayeli eto mwawonge wa Farawu mwene wa Ijipitu ira: <Yehova gunirumile ira naakumihe Ana Izarayeli ilambo ya Ijipitu.> >>
Makolo a Mozeji vamohi na Arawu
14Ala ba mazina a andimuwa a malogo a Ana Izarayeli: Rubeni, mwana murandji baliwa wa mulombwana Izarayeli, aabanle anapongwe ala: Enoki, Palu, Ezironi na Karimi. Ala bali andimuwa a muibalini mwa Rubeni. 15Simeyawu aabanle anapongwe ala: Jemuweli, Jamimi, Owade, Jakimi, Zowari, na Sawuli, wenno mmaye ali wa ilambo ya Kana. Ala bali andimuwa a muibalini mwa Simeyawu.
16Ala ba mazina a ahima a Levi dowagave vamohi na vizulu diwa. Levi ambanle Kowati, Merari na Jeresoni. Levi akwile na yaka 137. 17Jeresoni aabanle anapongwe ambinli ala: Libini na Simeyi, kada mutu ohokana eto ahimaye.
18Mulombwana Kowati ahima a anapongwe aabanle liye ba ala: Amiramu, Izari, Eboroni na Uziyeli. Kowati ule akwile na yaka 133.
19Mulombwana Merari aabanle ahima a anapongwe ambinli ala: Mali na Musi. Ala bali andimuwa a muibalini mwa Levi dowagave vamohi na vizulu diwa.
20Amiramu mwana Kowati amutenle titiyaye Jokebede, aliwa abala Arawu na mulombwana Mozeji. Amiramu ule akwile na yaka 137.
21Izari aabanle ahima a anapongwe araru ala: Kora, Nefegi, na Zikiri.
22Uziyeli anna anapongwe araru ala: Mizayeli, Elizafani na Sitiri.
23Arawu amutenle Elizeba mwana Aminadabe, murongola wa Nasoni, aliwa abala ahima ala: Nadabe, Abiyu, Eliyazari na Itamari. 24Kora anna ahima araru ala: Asiri, Elikana na Abiyazafi. Ala bali andimuwa a muibalini mwa Kora. 25Eliyazari mwana Arawu amutenle muhiyana mmohi muwari mwa anavihiyana a Putiyeli, aliwa mbala Fineyasi. Ala bali andimuwa a muibalini mwa nlogo na Levi. Kada mutu ohokana eto ahimaye.
26Kukala atu a muibalini mukumile Arawu na mbalaye Mozeji anno kawandeliwe na Yehova ira: <<Mudowe mwaakumihemo Ana Izarayeli muIjipitu, malogo matene nnga mukalele atu.>> 27Mozeji na Arawu badowile wonga na Farawu mwene wa ilambo ya Ijipitu ira kawande akumihamo muIjipitu mule Ana Izarayeli.
Mulugu ohomuruma Mozeji ira adowe awonge akoka na Farawu
28Fwanyeya ira siku nawongaga Yehova na mulombwana Mozeji mwilamboni mwa Ijipitu, 29Yehova ohomuwandelaga Mozeji ira: <<Miyo dili Yehova. Udowe wamuwandele Farawu mwene wa Ijipitu jatene jinafuna miyo uwandela.>> 30Mbwenye mulombwana Mozeji ohomuwakula Yehova, liye ira: <<Miyo kannawanda wonga pama! Kodi mwene Farawu unafuna adivwe na makalelo bavi?>>
Currently Selected:
Ezodu 6: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
