Ezodu 5

Farawu owendjeda goyi da aIzarayeli

1Evale Mozeji na Arawu kohovenya, aliwa dowa wonga na Farawu ira: <<Yehova, Mulugu wa Izarayeli unawonga na nyo ira: <Waahiye atwaga aIzarayeli ira kadowe kadisakanyele pwando isalesaleni.> >> 2Mbwenye Farawu ohaweliheda mazu eraga: <<Yehova bani ira miyo dinvwelelege inawonga liye ira dahiye aIzarayeli kadowe? Yehova munamuwonga nyo, miyo kadimuiziwile! Teto kavili jowandeya ira nnoahiya aIzarayeli kadowege.>>

3Evale mulombwana Mozeji na Arawu kohowongagave na mwene Farawu keraga: <<Mulugu wehu wa hiyo aEberewu gunitwanyuwenle, liye niwandela ira nidowe namukutele mikuto. Pepani, munihiye hiyo aIzarayeli atene niwende ulrendo wa malambo mararu muisalesaleni ira nidowe namukutele mikuto Yehova, Mulugu wehu. Mwasiwa hiyo nahayewo, Mulugu unonipa na maurenda owopiha owu na supada kondoni.>> 4Evale mwene wa Ijipitu ule ohowakulaga eraga: <<Kodi we Mozeji na weyo Arawu munafunela nni nonga mabasa analaba atu? Mudowe mwalabege mabasinyu nnga mwazela nyo mulabagave.>> 5Farawu ohowongagave eto liye ira: <<Kaing'anani, makalelo kaindjivile aIzarayeli#5:5 Kaing'anani, makalelo kaindjivile aIzarayeli mwilamboni muno kahi a masika. MaBibiliya amohiwa anawonga ira: Kaing'anani makalelo kaindjivile atwinyu mwilamboni muno kwaranya aIjipitu. Ku wonga aIzarayeli masiki kaonihiwave goyi muwari molabihiwa bure, aliwa kerave indjiva kwaranya. mwilamboni muno kahi a masika. Kodi munafunela nni joahiyiha mabasiwa?>>

6Fwanyeya ira siku nimohive nenne mwene Farawu eto ohawongagana asogolrelri kaalabiha Ana Izarayeli mabasa na asupayi eraga: 7<<Nyo mundulrimu moavahetcha malatchi ira kagumanihege na teya, kawombegena boloki.#5:7 malatchi ira kagumanihege na teya, kawombegena boloki. Malambo a mundulrimu atu kagagadelretcha malatchi, tchakatchana vamohi na teya, aliwa wombaga boloki diwa ira dilimbege pama. Mbwenye roma peno dowa sogolro, kamwaavahege malatchi. Aliwene banasayelege malatchiwa oka. 8Eto indjiva wa boloki diwa nnafuna atu wombaga ukalege umohive nnga mwakaleletcha atu, kamuvungulege nne vang'onove mwasiwa aliwa ba atu a uyere. Nona kakuwaga ira: <Nihiyeni ira nidowe, namukutele mikuto Mulugu wehu!> 9Mwaawendjedege mabasa atwale ira tempu yatene kalabege ira kahakayegena tempu yovuruwana jonama.>>

10Evale asogolrelri oalabiha aIzarayeli mabasa vamohi na asupayi kohovenyaga, aliwa dowa wonga na anamwindji ale keraga: <<Mwene Farawu uwongile ira liye kanauvahegeni malatchi akoka. 11So nyo mudowege, mwasayelege malatchi nyoka malringana vili atu. Mbwenye mabasinyu kinavunguliwa, nne vang'onove.>>

12Ana Izarayeli kagavwile mazu anne, kohoromaga mwadeya kadowaga mwilamboni yatene ya Ijipitu kasakaga mitati dohala mmindani ira dikale ha malatchiwa. 13Roma evale asogolrelri a mabasa ale kohoroma akanyiheda aIzarayeli na kopolo keraga: <<Kabaranyihagani, mmarihe mabasinyu a kada siku nnga jeretcha nyo tempu yavahiwa nyo malatchi.>>

14Evale asogolrelri a Farawu koabubuda asupayi a Ana Izarayeli anno kaahambihile atu ira kaasogolrelrege afwiwa ale muwari mwa mabasiwa. Aliwa kaabubudaga, koafuka keraga: <<Nyo malambo a mundulri mokwakwanihetcha. Nnga mwasiwa gwa nni nzilo nari peno hakwakwanihaga indjiva wa boloki dedo dirumiwe nyo ira muwombege va kada siku?>> 15Evale asupayi a Ana Izarayeli ale kohodowa kanlaga wa mwene Farawu, keraga: <<Kodi mwasiwa gwa nni nyo nizuzumihaga hiyo anamalaba enyu eni? 16Eni hiyo anamalabinyu kannavahiwa malatchi. Amala eto ananiruma ira nisakanyegeve boloki! Eto hiyo anamalabinyu ninnana bubudiwa! Mbwenye jatene jejo unairiha ba atwinyu!>>#5:16 Mbwenye jatene jejo unairiha ba atwinyu! Para asupayi a Ana Izarayeli wonga mazu anala, aliwa kaumbuwela nnga malamulo maxa ale kakumela wa asogolrelri a Farawu ale bahi. Tchaiziwa ira mwene Farawu gwaarumile asogolrelri ale ira kairege jejile. Akala ha yengo kadowile suma.

17Mbwenye mwene Farawu ohawakula, liye ira: <<Ayere nyo! Nyo muli ayere bahi. Mwasiwa gwenno munadivepela nyo ira: <Nihiyeni nidowe namukutele Yehova mikuto.> 18Mudowege, mwalabege. Nne kamunavahiwege malatchi. Teto boloki dinasakanyege nyo, indjiva uwa nnakalege nnga dedo dasakanyetcha nyo tempu yavahiwetcha nyo malatchi.>> 19Evale asupayi a Ana Izarayeli ale kagawandeliwe ira: <<Boloki nnasakanyege nyo kada siku, indjiva uwa kamuvungulege nne vang'onove>>, kohoonaga ira: <<Peno makatamiho kohonifwanya.>>

Asupayi a aIzarayeli kohotakaleliwa zela Mozeji na Arawu

20Fwanyeya ira tempu yawonga asogolrelri ale na mwene Farawu, Mozeji vamohi na Arawu kafwanyeyaga unde kaadedihaga. Evale asogolrelri ale kakumaga wa Farawu, atene kogumana. 21Evale asupayi ale kohomuwandelaga Mozeji na Arawu keraga: <<Yehova akale wenno unafuna ona eto unafuna tonga zela jabure jatene jinaniirela nyo. Tchoira utatamunle uwali wa Farawu na anamalabaye zela hiyo gu nyo! Eni nyo mutukunle supada nyo avaheda aIjipitu ira kanipena!>> 22Evale mulombwana Mozeji agavwile mazu anne, ohovira dowa wonga na Yehova ira: <<Nabwiya, kodi mwasiwa gwa nni nyo airelaga atwala ubure eni? Kodi mwasiwa ali wa nni mudirumaga ira dize uno? 23Tchoira romela tempu yadirumile nyo didowa wa mwene Farawu ira dawonge mwa nzina nenyu, liye unnave airela atwala ubure. Mbwenye nyo kamunaireve yengo ira atwinyu kakutchiwe muuzarini mwewa.>>

Currently Selected:

Ezodu 5: iLolo

Highlight

Copy

Compare