Ezodu 34

Mozeji ohosema mabwe amohiwa a malamulo

1Yehova ohomuwandela Mozeji eraga: <<Useme mabwe amohiwa menli nnga matabwa, olingana na mabwe oroma ale. Miyo nnolrembavo mazu amohive nnga anno kafwanyeya vamabweni oroma anno utwile we. 2Ukale okozeyene ira metchelo na mabebehene udowe wagwele mwango Sinayi ira ufiye vamentoni vaga, vazulu va mwango vale. 3Weyo wagwelaga, kakalevo mutu unafuna uhara eto kakalevo unafuna za pandi ya mwangoni eto nne kakalevo mutu unafuna dowa djihaga mabila nari ng'ombe wandamelana mwangoni ule.>>

4Noira eno, mulombwana Mozeji ohosemaga mabwe menli nnga matabwa, olingana na mabwe oroma ale. Mwa enne ohovenyaga na mabebehene, liye dowaga mwango Sinayi ule nnga mwemo Yehova mwamurumele liye, agatukunle matabwa menli a mabwe ale mmandani mwaye. 5Evale Yehova ohotitaga muwari mwa murambo, liye za vakwikwive na Mozeji. Evale ohowongaga nzina naye eraga: <<Miyo nzina naga dili Yehova.>> 6Yehova ohoviraga vakwikwive na vevo vafwanyeya Mozeji, awongaga mokuwa eraga: <<Miyo dili Yehova, Yehova Mulugu wa tangaranga, wa sayi, Mulugu odibeliwa takaleliwa eto dili oaziveliwetchetcha atu eto dili Mulugu ororomeleya. 7Zivela waga zela wenno unamuziveliwa miyo unofiyeda wa ahimaye eto ahimaye anno ahimiwa, vamohi na ahimiwa anno ahimiwa dowagave eno fiyeda ndila 1.000. Miyo nnokurumuwela jotega na joviringana na jodawa, mbwenye atu otega, miyo kannaahiya eno se mulandu, nari. Eto nnotonga yotega ya atu mwa ahimiwa anaabalege atu, fiyeda azuliwa ahimiwa.>>

8Mobaranya Mozeji ohooramihedaga kove yaye vati, liye mukokorela momuriheda. 9Evale Mozeji ohowonga eraga: <<Nabwiya, akala dihifwanya mahala vamentoni venyu, nnauvepani ira mukale na hiyo vari vehu. Na ibaribari atwala ba atu ohofuna vwa, mbwenye mukurumuwele viringaniha wehu na yotega yehu eto munirumele ira nikale atwinyu.>>

Venyihediwa wa yopangana

10Evale Yehova ohowongaga na mulombwana Mozeji eraga: <<Miyo peno nnasakanya yopangana na nyo. Miyo eto nnoza disakanye jotikiniha vamentoni va atwinyu, jejo jili jahanababihege ireya ilambo yatene ya vati, nari vari va mulogo uli watene. Atu atene anno anafwanyeya vamohi na nyo, anofiyeda ona jejo jinafuna miyo irana dagali Yehova. Tchoira jejo jinafuna miyo sakanya wa nyo, jinafuna jikale jowopiha na makalelo ohokala a masika. 11Inafwanela muharihegemo jatene jinaurumani miyo peno ji. Miyo nnoza daatamangihe vasogolro venyu aAmore, akuda Kana, aEti, aJebuzi, aFerizi na aEvi. 12Polre polre tawiha ira munasakanye yopangana yowandana na atu a ilambo yenno munadowa nyo. Tchoira mwairana eno, yenno inokala nnga ratuwero unafuna umangani. 13Mbwenye mofutukula mwafiya, mwabwanyulege vibuwa diwa, mutwege mambozo a mabwe anno anaatamalela atu nnga amilugu ewa eto mumale agwiha mambozo a mulugu wewa Azera.#34:13 Mambozo a mulugu wewa AzeraMambozo anno kafwanyeya nnga vikwamutu josema ja mulugu wewa wa muhiyana aitaniwa Azera. 14Nyo kammukokorele mulugu mmohiwa, tchoira miyo nnaitaniwa na nzina na Yehova wa Sandje, eto na ibaribari nnafwanyeya dagali Mulugu okana sandje. 15Polre polre tawiha ira munasakanye yopangana yowandana na anamurala a ilambo yenne. Tchoira mwawandana na aliwa, tempu inafuna atu dowa raruwaga na amilugu ewa,#34:15 tempu inafuna atu dowa raruwaga na amilugu ewa: Anamurala a ilambo ya Kana koraruwa muwari mohara amilugu ewa. (Detoronomiyo 23:17) Eto raruwaga na amilugu ewa podi tapulela muhiya Mulugu, dowa atamalelaga amilugu amohiwa. Nione Jeremiya 3:20; Ozeya 3:1. kaakutelaga mikuto, aliwa anoza kauitaneni ira mukale vamohi. Na nyenne munonyengeya mwaahare, murome dja jokuteliwa amilugu ewa. 16Mwawandana na aliwa, munofiyeda ateliha ahima enyu na anamwali a wewule eto tempu inafuna atu dowa raruwaga na amilugu ewa, anoanyenga ahiminyu ira na aliwene kadowe kararuwege na amilugu ewa ale. 17Nyo kamuvisakanyelege amilugu onyungulrutchiwa.>>

Mulugu ohawandela aIzarayeli zela pwando taru dafunege atu sakanya

18Yehova ohowongagave eraga: <<Nyo musakanyege Pwando ya Pawu Dohosakanyiwana Leverina. Mudjege pawu dohosakanyiwana leverina muwari mwa malambo matanu na menli a mwedi oroma wa Abibi, nnga mwemo muuwandenleni miyo.#Ezodu 13:5-7 Tchoira mwedi oroma wa Abibi gwenno mwakumile nyo ilambo ya Ijipitu. 19Mwana murandji baliwa wa mulombwana gwaga. Eto masiki jifuwo jenyu, ng'ombe nari nibila, malringana inakale irandji reliwa, yakala ya mulombwana, tchaga. 20So mbwenye akala mwana murandji reliwa wa buru, inafwanela mmuwombolege na mwana nibila. Mwahafunege wombola na nibila, mukotolege nikohi na mwana buru nne. Eto arandji baliwa muwari mwa ahiminyu, mwaawombolege na kobiri.#Numero 18:16 Mwa eno, kakalevo mutu unafuna za vamentoni vaga ahanna yovelela.

21<<Mulabege mabasinyu ali matene muwari mwa malambo matanu na nimohi, mbwenye siku nanetanu na mbinli muvumege. Masiki ikale tempu yolima, masiki ikale tempu yohanda, nafiya siku na sabado muvumege. 22Eto musakanyege Pwando Yokontari Sumana#34:22 Pwando Yokontari Sumana yali Pwando ya Johanda Joroma yenno yadja aIzarayeli sumana 7 kagadjile Pwando ya Mavirelo. yenno ili Pwando ya Jovaha Joroma Warala ja tirigu, na Pwando Yotamalela zela Johanda Jatene, mamalelo wa yaka. 23Mulombwana uli watene unerege fiya vamentoni va miyo Yehova, Mulugu wa aIzarayeli fendo taru va kada yaka.#34:23 fiya vamentoni va miyo Yehova: AIzarayeli kafiya ilambo ya Kana, kafuna kamutamalelege Yehova nimburo neno nafuna liye sakulra. Nimburo niwa ali nyumba yenno yamangile mwene Salomawu sidadi ya Jeruzalemu. (1 Amwene 8:16) Dowa nimburo nenne, ku wonga dowa vamentoni va Yehova. Eto fendo taru va kada yaka nnawongiwa veva, fendo yoroma ali para Pwando ya Mavirelo na Pawu Dohosakanyiwana Leverina, yowelela ali Pwando ya Johanda Joroma, yaneraru ali Pwando Yotamalela zela Johanda Jatene, yenno yaitaniwa eto Pwando ya Misasa. Nione Detoronomiyo 16:16. 24Tchoira miyo nnoza daatamangihemo malogo anafwanyeya ilambo inafuna nyo dowa eto nnoulukuliha ilambo inafuna nyo kala. Va kada yaka fendo taru dedo nnafuna nyo dowa ira mwafiye vamentoni va Yehova Mulugu wenyu, kalivo unafuna za ira atukule ilambo yenyu.>>

25<<Zela nkani odikutela mukuto wa sangiri, kakalevo mutu unafuna zana vamohi na pawu yoheliwa leverina. Eto mukuto wenno munafuna nyo sakanya vaPwandoni ya Mavirelo, mwadjaga mukutuwa, kamuhiye nyamiwa ifiyeda mmetcheloni muwa, mbwenye johala jitumeyiwe siku nimohive.#Ezodu 12:8-10 26Yaka datene mudowegena johanda joroma japama ja mmindani mwinyu Nyumba ya Yehova Mulugu wenyu. Kamupiyege mwana mbuzi na mukaka wa mmaye.>>

27Yehova ohomuwandelagave Mozeji, liye ira: <<Ulrembe mazu anauwandela miyo ala. Tchoira mazwala banno anasakanyana miyo yopangana yaga na weyo vamohi na aIzarayeli atene.>>

28Mulombwana Mozeji amanle malambo 40 mwangoni ule, agali vamohi na Yehova ntana na mahiyu, ahadjaga yengo, nne ahang'waga mahindje. Liye oholremba vamabweni menli osemiwa ale, mazu a yopangana, anno anafwanyeya kagali Malamulo Kumi.

Jerimela wa wintoni wa Mozeji

29Mozeji tempu yatita liye mwango Sinayi ule aganna matabwa menli a mabwe a Umboni mmandani mwaye, wintoni waye wojerimelaga na mwasa owonga na Mulugu. Mbwenye liye kaiziwile ira wintoni waye wojerimela. 30Evale mulombwana Arawu vamohi na Ana Izarayeli atene, kagamuing'anne Mozeji, kohoonaga wintoni waye ujerimelaga. Na mwasa wenne, kohoromaga ova muwandamela. 31Noira enne, mulombwana Mozeji ohomuitanaga Arawu na andimuwa atene a mulogo wa Ana Izarayeli, aliwa dowa vafwanyeyaga liye. Kagazile, ohoroma wonga na aliwa. 32Noira eno, mulogo watene wa Ana Izarayeli kohozaga valigi mulombwana Mozeji, evale liye ohawandelaga malamulo matene anno Yehova amuwandenle liye mwango Sinayi. 33Mozeji agamanle wonga na aliwa, ohokunelaga wintoni waye na nguwo. 34Evale Mozeji avolowaga mMusasani Ogumanamo ira awonge na Yehova, okumihawo nguwo ile. Eto akumaga mmusasani mule adowaga ira aawandele andimuwa a Ana Izarayeli jatene jamulanyedile Yehova, 35Ana Izarayeli ale koonave wintoni wa Mozeji ujerimelaga. Mwa enne Mozeji okunela wintoni waye na nguwo akoka, fiyeda tempu yavolowa liye akoka mMusasani Ogumanamo ira adowe awonge na Yehova.

Currently Selected:

Ezodu 34: iLolo

Highlight

Copy

Compare