Ezodu 33
33
Mulugu ohomuwandela Mozeji ira liye kanadowa vamohi na aIzarayeli
1Yehova ohomuwandela Mozeji eraga: <<Ukume nimburo nili we, uvenye vamohi na atu atene anno waakumihile we ilambo ya Ijipitu, mudowe ilambo yenno ilumbenle miyo na makolo enyu, Abarahamu, Izaki, na Jako diira: <Ilambo yenna nnoavaha ahimawo a musogolro.> 2Miyo nnomuruma mungelro ira akale vasogolro vawo. Mwa eno, miyo nnoatamangiha akuda Kana, aAmore, aEti, aFerizi, aEvi na aJebuzi. 3Nyo munodowa mwakale ilambo munafwanyeya mukaka na nuwi pwi pwi. Mbwenye miyo kannadowa vamohi na nyo, tawiha ira uwali waga unaze uhinde mundila zela nyo, difiyede utolotchani, mwasiwa nyo muli atu ohofuna vwa.>>
4Evale Ana Izarayeli kagavwile zela mazu owopiha anno awongile Yehova, kohokana kumbanya ulukulu. Mwa enne muwari mwa aliwa kalivo awara jengo joriyela mmaso. 5Aliwa kairela jejo na mwasa oira Yehova ohomuwandela mulombwana Mozeji ira: <<Udowe waawandele Ana Izarayeli wire: <Nyo muli atu ohofuna vwa. Miyo dera didowege vamohi na nyo masiki mwa tempu ya vang'onove bahi, nnomala utolotchani atene. Mwa eno inafwanela muwungule jengo joriyela mmaso jinawara nyo, mwaira eno miyo nnoiziwa makalelo anafuna miyo uirelani.> >> 6Mwa enne Ana Izarayeli kohowungulaga jengo jiwa jawarile atu joriyela mmaso mutchindo mwa mwango Orebi.#33:6 Orebi gu mwango unafwanyeya muwari mwa isalesale ya Sinayi. Orebi eto ti nzina nimohi na mwango Sinayi. Kuma siku nenne dowaga sogolro tchawelenle wara joriyela mmaso jejile.
7Nimburo nili natene aIzarayeli vakunga atu misasa diwa, Mozeji okungetcha musasa olapela wene na vamisasani vevo vakala Ana Izarayeli, liye vaha musasole nzina na Musasa Ogumanamo.#33:7 liye vaha musasole nzina na Musasa Ogumanamo. Musasa unawongiwa va kaali Musasa wa Yehova, tchoira tempu yenno ali Musasa wa Yehova ahanamangiwe. Mbwenye aIzarayeli kagamangile Musasa wa Yehova, musasa wenno amangiwa unde wa misasa da aIzarayeli ohiyiwa, roma labana Musasa wa Yehova. Musasa wa Yehova ule oitaniwa eto na nzina nimohi na musasa oroma ule, aliwa itanaga Musasa Ogumanamo. (Ezodu 39:32) Evale mutu uli watene afuna wonga na Yehova adowa Musasa Ogumanamo wenno afwanyeya unde wa tatamo da misasa. 8Eto fendo datene Mozeji adowaga ira avolowe mMusasani Ogumanamo mule, atu atene kaimela mmilangoni mwa misasa diwa, aliwa muing'anaga mulombwana Mozeji, fiyeda liye avolowe mmusasani mule. 9Mwa enne liye avolowa mmusasani mule, murambo oimela nnga nimbozo ule otita, za kala va mulango va musasa vale. Evale Yehova paroma liye wonga na Mozeji. 10Tempu yenne Ana Izarayeli kaona murambo oimela nnga nimbozo ule aza aimela vamulangoni va musasa vale, aliwa atene kovenya, aliwa oramiha kove diwa, kamutamalelaga Yehova mmilangoni mwa misasa diwa mwemo mwakala atu. 11Evale Yehova owonga na mulombwana Mozeji kove na kove,#33:11 Yehova owonga na mulombwana Mozeji kove na kove. Kahi ira Mozeji omuona Mulugu meso na meso, mbwenye era vwa Mulugu awongaga eto atapanya na liye nnga jini mutu awongaga na nfwaye. Tchoira kalivo unaona kove ya Yehova amala akalawo. Nione 33:20 nnga jini mutu awongaga na nfwaye. Mwa enne Mozeji amala wonga na Yehova, owelela vamisasani vale. Mbwenye muzombwe Jozuwe mwana Numi, wenno ali sempuru wa Mozeji, vaMusasani Ogumanamo vale liye kavenyetchavo.
Mozeji ohonvepa Mulugu ira adowe vamohi na Ana Izarayeli
12Mozeji ohowonga na Yehova eraga: <<Na ibaribari nyo munawonga na miyo ira: <Waatukule Ana Izarayeli, waadowena ilambo yenno iwongile miyo.> Mbwenye kamudiwandenle kodi mutu guvi munafuna nyo muruma ira adowe na miyo. So mukalele diwandelave bahi ira: <Duhuiziwa na nzina nawo nene eto weyo uhumala fwanya mahala vamentoni vaga.> 13Akala dihifwanya mahala vamentoni venyu, nnauvepani mudiwandele ndila denyu ira miyo diharihegemo eto ira difwanyegeve mahala vamentoni venyu. Yehova muumbuwele ira muhasakulra Ana Izarayeli ira aliwa kakale atwinyu.>> 14Evale Yehova ohowakulaga, liye ira: <<Miyo nnokala vamohi na weyo eto nnouvaha vuma.>> 15Mwa enne Mozeji ohowongaga, liye ira: <<Akala nyo kamunadowa vamohi na hiyo, ifwanele mwahanidowihe sogolro, munihiye eva. 16Kodi nyo mwahadowe vamohi na hiyo, atu amohiwa anafuna kaiziwe avi ira miyo vamohi na atwinyu nihifwanya mahala vamentoni venyu? Tchoira mwakala na hiyo pinafuna ona atu ira miyo vamohi na atwinyu atene nnafwanyeya nagali ohiyana na atu amohiwa anafwanyeya ilambo yatene ya vati.>> 17Evale Yehova ohomuwakula Mozeji, liye ira: <<Miyo nnoirana yenno ivepile we, tchoira weyo uhufwanya mahala vamentoni vaga eto duhuiziwa na nzina nawo nene.>>
18Evale mulombwana Mozeji ohowonga na Yehova, liye ira: <<Yehova miyo nnauvepani ira mudionihe undimuwa wenyu.>> 19Yehova ohomuwakulaga eraga: <<Miyo nnerege viriha upama waga watene vasogolro vawo eto nnowonga nzina naga na Yehova vasogolro vawo. Miyo nnomuirela sayi mutu wenno unafuna miyo muirela sayi. Eto nnomuwendela tangaranga mutu wenno unafuna miyo muwendela tangaranga.>> 20Yehova ohowongagave eraga: <<Mbwenye kavili jowandeya ira weyo uone kove yaga. Tchoira mutu wenne unaona kove yaga kanakalawo.>> 21Yehova eto ohowongave, liye ira: <<Kaing'ana, uno uhukala nimburo nili vakwikwive na miyo. Weyo udowe wakale vazulu va nibwe, nimburo nenne. 22Era eno undimuwa waga waviraga, nnouhela kunguni wa nibwe, dugudumeye na ndanda naga fiyeda divire. 23Amala nnokumihawo ndanda naga, ira weyo uone indulrindulri yaga bahi. Mbwenye kove yaga kunaona.>>#33:23 ira weyo uone indulrindulri yaga bahi: Mozeji afuna aone ikapekape ya undimuwa wa Mulugu bahi. Kahi ira liye ohofiyeda muona Mulugu kove na kove. Nione vs 33:20.
Currently Selected:
Ezodu 33: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
