Ezodu 28

Sakulriwa wa anamakuta vamohi no sakanyiwa wa jowara jiwa

1Yehova ohowongaga na Mozeji eraga: <<Muwari mwa Ana Izarayeli atene, umusakulre mbalawo Arawu vamohi na ahimaye Nadabe, Abiyu, Eliyazari na Itamari ira kafiye vamentoni vawo, kalabege mabasaga a unamakuta. 2Usakanye jowara jotchenihiwa ira mbalawo Arawu awara, akayegena undimuwa eto ariye.

3<<Waaitane amesilri atene owanda sakanya jengo, anno daavahile miyo dodolriso dosakanya jengo ira kasone jowara ja Arawu ira liye atchenihiwe, adihindelege mabasa a unamakuta. 4Jowara jinafuna atu sakanya ti ji: yowara ya vamirimani, kuleti ya unamakuta, kapa, bata yokana jolremba ja usalru, tchapowa wa unamakuta vamohi na sintu nomangelela mmwinini. Amesilri ale kasakanye jowara jotchena jeji ira mbalawo Arawu vamohi na ahimaye kawarege kalabaga mabasaga a unamakuta. 5Ira kawande sakanya jowara jeji, anolabana oru na usalru wa kore ya matamba, usalru wa kore ya musuzu wa bwanda, na usalru ofila, vamohi na nguwo yosakanyiwa na usalru wapama.

6<<Amesilri ale kasakanye kuleti ya unamakuta. Sakanya uwa, katukule nguwo yosakanyiwa na usalru wapama, kasonelege vanguwoni vale usalru wa oru, usalru wa kore ya matamba, usalru wa kore ya musuzu wa bwanda, na usalru ofila, ikale yolrembeya lrembeya. 7Kuleti ile igumanihiwe mmafudini ira sogolro na unduli ikale yengo imohive. 8Sintu nolrembeya lrembeya nnafuna mangeleliwaga mmwinini, nikale nguwo imohive na kuleti ile. Katukule nguwo yosakanyiwa na usalru wapama, amala kasonelege vanguwoni vale usalru wa oru, usalru wa kore ya matamba, usalru wa kore ya musuzu wa bwanda, na usalru ofila. 9Wamala, utukule mabwe menli ofuneyetchetcha anaitaniwa onikisi, ulrembevo mazina a ahima a anapongwe a mulombwana Izarayeli#28:9 mulombwana Izarayeli gwenno mmohive unaitaniwa Jako. Nione Jenesesi 32:27-28.. 10Nibwe nimohi ulrembevo mazina matanu na nimohi eto nibwe nimohi niwa ulrembevo mazina matanu na nimohi, uromagana murandji baliwa fiyeda ogomiheda. 11Ulrembe vamabweni mazina a ahima a anapongwe a mulombwana Izarayeli ale, na makalelo nnga vineretcha aliba lremba vamabweni kasakanyaga karimbu. Mmambalo mwa mabwe uhelemo jofungihana ja oru. 12Mabwe menli ale ufungihede mmafudini mwa kuleti ya unamakuta ira Ana Izarayeli kaumbuweliwege. Arawu awarege mazina ale mmafudini mwaye ira aIzarayeli kaumbuweliwege vamentoni va Yehova. 13Usakanye eto jofungihana ja oru 14vamohi na makolare menli oriteya nnga ngohi, kagali a oru ohogumanihiwa na yengo imohiwa. Wamala utukule makolare ale, ugumanihe na jofungihana mabwe menli jile.

15<<Usakanye eto yowara ya vamirimani yokana nibolrosa ira mundimuwa wa anamakuta aiziwege jofuna ja Mulugu. Usakanye na makalelo amohive nnga munafuna we sakanya kuleti ya unamakuta ile. Ikale yolrembeya lrembeya eto usakanye na nguwo yosakanyiwa na usalru wapama, amala usonele vanguwoni vale usalru wa oru, usalru wa kore ya matamba, usalru wa kore ya musuzu wa bwanda, na usalru ofila. 16Ikale nguwo yovinda ira dikalemo mbinli eto rambalala uwa no lapa uwa ukale umohive, mupime ndanda nimohi bahi. 17Wamala utukule mabwe ofuneyetchetcha, ufungihede vayowarani ya vamirimani vale na malinya mannayi. Linya noroma nikayena mabwe mararu anaitaniwa saridiyu, topaziyu na karibunkulu. 18Linya nanembinli nikayena mabwe mararu anaitaniwa ejimeralda, safira na diyamanti. 19Linya naneraru nikayena mabwe mararu anaitaniwa jasintu, agata na ametisata. 20Linya nanennayi nikayena mabwe mararu anaitaniwa berilu, onikisi, na jaspe. Mmambalo mwa mabwe mule, uwarihemo jofungihana ja oru. 21Mabwe matene anakala kumi na menli. Kada nibwe nilrembiwe nzina nimohi na ahima a anapongwe a mulombwana Izarayeli. Kada nibwe nilrembiwe nzina nimohi na makalelo nnga karimbu, fiyeda mabwe kumi na menli molingana no indjiva wa malogo a Ana Izarayeli.

22<<Eto usakanye makolare oriteya nnga ngohi, kagali a oru ohogumanihiwa na yengo imohiwa, usonele vayowarani ya vamirimani ile. 23Wamala eno, usakanye eto maaneli menli a oru. Maaneli menli ale, uhele zulu wa yowara ya vamirimani ile, aneli mmohi mwendo wa wu, mmohiwa mwendo wa wu. 24Era eno makolare menli a oru ale uvirihe muwari mwa maaneli menli ale, anno anakala mmwendoni mwa yowara ya vamirimani ile. 25Wamala eno, ugumanihe mmakomoni mwa makolare menli ale na jofungihana mbinli jinafwanyeya mmafudini mwa kuleti ya unamakuta ile. 26Wamala eno usakanye eto maaneli amohiwa menli a oru, uhele vati va yowara ya vamirimani ile, aneli mmohi mwendo wa wu, mmohiwa mwendo wa wu, maaneli ale waabandihe muwari mwa yowara ya vamirimani wandamelana kuleti ya unamakuta. 27Usakanye eto maaneli amohiwa menli a oru, uhele vakuletini ya unamakuta vevo vinagumana nguwo dokuma vafudi na vobinyalri sintu nolrembeya lrembeya. 28Utukule ngohi wa nguwo ya kore ya matamba, umangihe maaneli a yowara ya vamirimani ile na maaneli a kuleti ile ira yowara ya vamirimani ile ikale vazulu va sintu nolrembeya lrembeya nne. Yowara ya vamirimani ile kimwalanege na kuleti ya unamakuta.

29<<Mwa eno, Arawu avolowaga Nimburo Notchena, unatukulege mazina a ahima a anapongwe a mulombwana Izarayeli anafwanyeyege vayowarani ya vamirimani ile, yenno inaiziwiha jofuna ja Mulugu, ira aIzarayeli kaumbuweliwege tempu yatene vamentoni va Yehova.>>

Jowombezana jofuna ja Mulugu

30<<Utukule jowombezana jofuna ja Mulugu jineriwa Urimi na Tumimu,#28:30 Mulugu aavahile Ana Izarayeli jowombezana mbinli jairiwa Urimi na Tumimu ira kawande iziwa yofuna ya Mulugu para aliwa. Jowombezana jile awendana ali mundimuwa wa anamakuta, wenno awara kuleti. Makalelo kanna Urimi na Tumimu kaniiziwile. Eto labana uwa, kaniiziwile. So iiziwile hiyo, tchoira jengo mbinli jaitaniwa Urimi na Tumimu jakala na mundimuwa wa anamakuta ira aiziwege yofuna ya Mulugu. AIzarayeli kakana yafuna atu nfuka Yehova, liye owanda wakula muwari mwa jengo mbinli jile na makalelo kaiziwile atu. Urimi na Tumimu eto jolaba para sakulra muwari mwa atu ambinli. (1 Samuweli 14:41) Mulugu ahafune rumela, kavakuma yowakula. (1 Samuweli 28:6) uhele mbolrosani mwa yowara ya vamirimani ira jikalege mirimani wa Arawu tempu yatene inavolowege liye adowaga wonga na Yehova. Mwa eno, mulombwana Arawu unerege labana jowombezana ejo jili mirimani waye jile ira aiziwege jofuna ja Yehova zela aIzarayeli tempu ili yatene.>>

Jowara jimohi jiwa ja unamakuta

31<<Utukule eto nguwo ya kore ya matamba bahi, usone kapa inafuna wariwaga muwari mwa kuleti ya unamakuta. 32Kapa ile ikayena mulango ovolotchihelavo muru. Mulango ule mmambalo muwa mubinyalrimo nnga ha kamiza ira yahakauwege. 33Wamala eno, utukule usalru wa kore ya matamba, usalru wa kore ya musuzu wa bwanda, na usalru ofila, uluwena jofwalrafwaniha ja jovaha jinaitaniwa romaya. Utukule jofwalrafwaniha jile, usonele mmagomo mwa kapa pandi ya vati. Vari va kada jofwalrafwaniha ja romaya mbinli, uhelevo mwana belro yosakanyiwa na oru. 34Ku wonga jinafuna jitandeye eni: mwana belro imohi ya oru, amala eno romaya imohi, amala mwana belro imohi ya oru, amala romaya imohi, dowagave eno fiyeda rungunuwa kapa ile. 35Mulombwana Arawu alabaga mabasaye, unerege wara kapa yenno. Belro dile nnerege nla liye avolowaga Nimburo Notchena vamentoni va Yehova nari akumaga, tawiha ira unakwe.>>#28:35 Belro dile nnerege nla… avolowaga… nari akumaga, tawiha ira unakwe: Fwanyeya ira mutu owara jowara ja burebure kawanda volowa Nimburo Notchena vamentoni va Yehova, mwasiwa Mulugu afunne ira ule unaza vamentoni vaye aware kapa yokana belro mmambalo. Mbwenye mutu avolowa burebure ogokwa. Zela ukwa wa aliba patamela muwari mwa Kaxa ya Yopangana yenno yakala muwari mwa Musasa wa Yehova, nione 1 Samuweli 6:19.

36<<Utukule oru ohogumanihiwa na yengo imohiwa, usakanye itchapa, ulrembevo mazu oira: Otchenihiwa Wa Yehova na makalelo nnga anasakanyeda atu malremba anakala karimbuni. 37Umangelele itchapa ile na usalru wa kore ya matamba sogolro wa tchapowa wa unamakuta. 38Tempu ili yatene inalabege Arawu mabasa, itchapa ile inakalege vakoveni vaye. Mwa eno, liye unerege rumelela jotega jatene zela joviringaniha jinaira Ana Izarayeli kavelelaga jengo jatene jotchenihiwa jejo jamanle atu tcheniha ira jikale ja Yehova. Itchapa ile inakalegeve vakoveni va Arawu ira aIzarayeli kawandege rumeliwa vamentoni va Yehova. 39Utukule nguwo yosakanyiwa na usalru wapama, usakanye bata yokana jolremba jokala nnga ntavi eto usakanye tchapowa wa unamakuta. Usakanye eto sintu nagali nolrembeya lrembeya. 40Zela Arawu ahimaye a alombwana, waasakanyele bata diwa, masintu vamohi na matchapowa ira kawara, kakayena undimuwa eto ira kariye.

41<<Umale awariha jowara jiwa jatene romela mbalawo Arawu vamohi na ahimayene. Eto waamiminele makura vamuru vewa, waahambihe vamohi no atcheniha ira kalabege mabasaga a unamakuta. 42Waasonele eto akabudulra a nguwo yosakanyiwa na usalru wapama ira kawarege muwari muwari. Kakale akabudulra okuma mmwinini ante dowa fiya mmabodoni. 43Arawu vamohi na ahimaye kavolowaga mMusasani Ogumanamo eto kadowaga vaibuwani ira kalabe mabasiwa Nimburo Notchena, kawarege jowara jejo, tawiha ira anakayena yotega ira kakwe. Neni ti nlamulo nohomala para Arawu vamohi na ahimayene atene a musogolro.>>

Currently Selected:

Ezodu 28: iLolo

Highlight

Copy

Compare