Ezodu 27
27
Makalelo a ibuwa ya mukuto
1Yehova ohomuwandelagave mulombwana Mozeji ira: <<Utukule matabwa a mukexa, usakanyena ibuwa. Lapa uwa no rambalala uwa ukale sawasawa, ukale mameturu menli na masentimeturu 20 eto regama uwa ukale meturu imohi na masentimeturu 30. 2Komo dannayi dene da ibuweyo, usememo manyanga, kagali yengo imohive na ibuwele. Wamala eno, utukule mukuwa ukunelena ibuwa yatene. 3Utukule mukuwa, usakanye fwaramento datene di: Jogudana ndora, paya, mabasiya, magarfu malukulu na matijela otukulana makalra ohinda. 4Eto utukule mukuwa, usakanye yotumeyavo mukuto yoluweya nnga ntavi eto mmwendoni mwannayi mwene uhelemo maaneli mannayi malukulu a mukuwa. 5Utukule ibuwa, uwarihe vazulu va yotumeyavo mukuto. Yotumeyavo mukuto ile ifiye vari va ibuwa. 6Useme eto jimiri jotembana mbinli ja matabwa a mukexa, ukunele na mukuwa ira muwandege tembana ibuwa ya mukuto ile. 7Mwafunaga tukula, muvolotchihege jimiri jotembana jile muwari mwa maaneli ale, imiri imohi ikukuru imohi ya wu, imiri imohiwa ikukuru ya wu. Era eno mutembege ibuwa iyo. 8Ibuwa ya mukuto ile musakanye na matabwa eto muwari muwa mukale pawo, molingana na makalelo duonihile miyo mwangoni uno.>>
Makalelo a vatando va Musasa wa Yehova
9<<Usakanye eto jobarelana ja vatando va Musasa wa Yehova. Jobarelana jiwa jikale makurtina osakanyiwa na usalru wapama. Ikukuru ya suli, lapa wa makurtina ukale mameturu 44. 10Ukale mambozo 20 na matiwa 20, jatene jagali ja mukuwa. Mbwenye jokokihana ja mambozo ale na jolimbihana jiwa jikale ja parata. 11Sawasawa eto ikukuru ya norti, lapa wa makurtina ukale mameturu 44. Mambozuwa kakale 20 eto matiwa kakale 20, osakanyiwa na mukuwa. Eto jokokihana ja mambozo ale na jolimbihana jiwa jikale ja parata. 12Rambalala wa ntando ikukuru ya mavirelo wa nzuwa, kakale makurtina okwakwana mameturu 22. Mambozuwa kakale kumi eto matiwa kakale kumi. 13Rambalala wa ntando na sogolro, ku wonga ikukuru ya makumelo wa nzuwa, ukale mameturu 22. 14Kuma vamwendoni dowa va mulango, vikale makurtina okwakwana mameturu 6 na masentimeturu 60 na mambozo mararu na matiwa mararu. 15Eto ikukuru imohiwa ikale sawasawa, vikale makurtina okwakwana mameturu 6 na masentimeturu 60 na mambozo mararu na matiwa mararu. 16Mulango ovolowana ntando akayena kurtina yolapa yokwakwana mameturu 8 na masentimeturu 80. Kurtiniwa ikale nguwo yosakanyiwa na usalru wapama. Nguwo ile ikale yolrembeya lrembeya na usalru wa kore ya matamba, usalru wa kore ya musuzu wa bwanda, na usalru ofila. Eto ikayena mambozo mannayi na matiwa mannayi. 17Mambozo matene owerewera ntando kagumanihiwe na jolimbihana josakanyiwa na parata. Jokokihana jiwa jikale ja parata eto matiwa kakale a mukuwa. 18Ntando natene lapa uwa ukale mameturu 44 eto rambalala uwa ukale mameturu 22. Makurtina a ntando lapa uwa dowa zulu ukale mameturu menli na masentimeturu 20. Makurtiniwa kakale a nguwo yosakanyiwa na usalru wapama eto matiwa kakale a mukuwa. 19Fwaramento diwa datene nnafunege nyo labana mabasa matene a musasa uyo, na peregu dolimbiha vati va musasa, na peregu dolimbiha vati va kurtina da ntando, jatene ejo jikale ja mukuwa.>>
Makalelo a panti ya Musasa wa Yehova
20<<Waawandele Ana Izarayeli ira kazegena wa weyo makura a azeti osakanyediwa pama, muhelege mupantini ira panti dile dikalege dohinda dene mahiyu matene. 21Mulombwana Arawu na ahimaye a alombwana kahindihege panti dile, dedo nnafwanyeya mMusasani Ogumanamo,#27:21 mMusasani Ogumanamo ku wonga Musasa wa Yehova. Tchoira musasa ule ali nimburo nadowa atu ira kagumane na Mulugu muwari molobela no velela mikuto diwa. Nione Ezodu 39:32, 40:2. ikukuru ya unde wa kurtina yogawa Nimburo Notchena na Nimburo Notchenetchetcha, kurtina yenno inafwanyeya sogolro wa Kaxa ya Umboni. Panti dile dikalege dohinda dene malambo matene kuma tchiguwoni fiyeda unde tcha vamentoni va Yehova. Neni nikale nlamulo nohomala para Ana Izarayeli atene na atu atene anabaliwelegemo musogolro.>>
Currently Selected:
Ezodu 27: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
