Ezodu 29
29
Veleliwa wa mikuto vamohi no hambihiwa wa anamakuta
1Yehova ohomuwandelagave mulombwana Mozeji ira: <<Makalelo anafuna we atcheniha Arawu vamohi na ahimaye ira kalabege mabasaga a unamakuta ba ala: Utukule mwana ng'ombe imohi ya mulombwana, na mabila menli a alombwana. Vinyama datene dikale dohorangala. 2Utukule eto utu wa tirigu otchileya pama, usakanyena pawu dohosakanyiwana leverina na mabolu ohoheliwa leverina otanganihiwa na makura vamohi na pawu dopapateya dohosakanyiwana leverina eto dozolihiwa makura. 3Utukule jatene jejile uhele mmutangani, uzena vamentoni vaga, vamohi na ng'ombe na mabila menli ale.
4<<Waira eno umutukule mulombwana Arawu vamohi na ahimaye ale waadowena vamulangoni va Musasa Ogumanamo, waahambihe na mahindje. 5Wamala eno, utukule jowara ja unamakuta, umuwarihe Arawu kuleti ya unamakuta na bata vamohi na kapa inafuna wariwaga muwari mwa kuleti ya unamakuta vamohi na yowara ya vamirimani. Umangihe eto sintu nolrembeya lrembeya na kuleti ya unamakuta nne. 6Amala eno umuwarihe tchapowa#29:6 tchapowa unawongiwa veva gu mmohive unawongiwa va 28:4. wa unamakuta mmuruni mwaye eto vatchapowani vale umangelelevo itchapa ya oru yolrembiwa Otchenihiwa Wa Yehova.
7<<Wamala eno utukule makura otchenihana jengo, ukutulele vamuru vaye momuhambiha. 8Wamala eno eto waatukule ahimaye, waawarihe bata. 9Wamala umangihe masintu a Arawu na ahimaye mmwiniwa mwewa eto waawarihe atchapowa mmuruni mwewa. Jaireya eno, unamakuta unokala wewa nnga nlamulo nohomala. Ayo ba makalelo anafuna we muhambiha Arawu vamohi na ahimaye.
10<<Waira eno utukule mwana ng'ombe ile udowena vamulangoni va Musasa Ogumanamo. Arawu vamohi na ahimaye katukule mandiwa kahele vamuru va mwana ng'ombe vale. 11Evale weyo uisige ng'ombe ile vamentoni va Yehova vamulangoni va Musasa Ogumanamo ule. 12Wasiga, ukoye sangiri na mwana ng'ombe ile, wamala unyetihe ibuno yawo na sangiri, udowe wazolihe manyanga a ibuwa, sangiri natene nohala nne udowe wakutulele mmambalo mwa ibuwa, pandi ya vati. 13Eto utukule makura matene anapitikelrelreya na mirimbo eto utukule pandi ilukulu ya ilopa vamohi na xo dambinli dene vamohi na makura a xo dile, udowe watumeye vaibuwani va mukuto. 14Mbwenye roma nyama ya ng'ombele na tembe niwa vamohi na mirimbo datene, udowe watumeye na munlo unde wa tatamo wa misasa. Tchoira jejo jinafwanyeya jagali mikuto dokurumuwela jotega.
15<<Wamala eno, muwari mwa mabila menli a alombwana ale, utukulevo nibila nimohi, Arawu vamohi na ahimaye kahele mandiwa vamuru va nibila nne. 16Weyo usige nibila nne, utukule sangiri niwa uwokele mmambalo mwa ibuwa ya mukuto ile, pandi dannayi dene. 17Waira eno uvarule nibila nne yano yano, amala uhuwe mirimbo diwa na mendo diwa, ugumanihe na muru vamohi na jimohi jiwa jatene. 18Amala utumeye nibila natene nenne vaibuwani va mukuto. Wenno unakala mukuto otumeya wa Yehova, mukuto onukela pama eto ti jovelela jotumeya wa Yehova.
19<<Amala utukule nibila nimohi niwa nohala nne, mulombwana Arawu vamohi na ahimaye a alombwana kahele manda ewa vamuru va nibila vale. 20Amala usige nibila nne, utukule sangiri niwa uzolihe tonga wa nibaru na muwononi odjana na mulombwana Arawu, vamohi na tonga wa mabaru a muwononi odjana a ahimaye. Amala eto uzolihe jibuno jiwa ja nagonondo ja manda ewa odjana vamohi na jibuno jiwa ja nagonondo ja manyalo ewa a muwononi odjana. Wamala enne, sangiri natene nohala nne, uwokele mmambalo mwa ibuwa ya mukuto ile, pandi dannayi dene. 21Waira eno utukule sangiri na vang'ono neno nili mmambalo mwa ibuwa ya mukuto, ugumanihe na makura otchenihana jengo, umuwoke mulombwana Arawu na jowara jaye, na ahimayene vamohi na jowara jiwa ira Arawu vamohi na ahimayene kakale otchenihiwa vamohi na jowara jiwa jatene.
22<<Wamala utukule makura a nibila, na mwila watene na makuriwa, vamohi na makura anapitikelrelreya na mirimbo, na pandi ilukulu ya ilopa vamohi na xo dambinli dene vamohi na makura a xo dile, vamohi na mwendo wa mundulri wa pandi ya muwononi odjana, mwasiwa nibila neno ti nibila nnapiwa ira nilabe mabasa omuhambihana mutu 23eto muwari mwa mutanga muhenle nyo vamentoni va miyo Yehova, mwemo muli pawu dohosakanyiwana leverina, utukulemo pawu imohi, na nibolu nimohi nopiyiwa na azeti na pawu imohi yopapateya. 24Watukula jatene jejo, unvahede mulombwana Arawu vamohi na ahimaye kahidede mmandani mwewa, amala kawendawendihe muzulu muzulu, era eno, uvelele muwari mokala mukuto owendawendihiwa vamentoni va Yehova. 25Wagamanle irana enne, utukulemo mmandani mwewa jatene ejo, udowena watumeye vaibuwani va mukuto. Wenno unafwanyeya agali mukuto otumeya wa Yehova, mukuto onukela pama. Jejo ti jovelela jotumeya wa Yehova.
26<<Wamala utukule mirimani wa nibila neno nnapa we ulabagana mabasa omuhambihana Arawu nne, uwendawendihe muzulu muzulu muwari movelela nnga mukuto owendawendihiwa vamentoni va Yehova. Pandi yenno inakala yawo.
27<<Utchenihe mirimani wa nibila nne, unafwanyeya agali mukuto owendawendihiwa vamohi na mwendo mmohiwa wa mundulri uhanle wa nibila neno nnapa we ulabagana mabasa omuhambihana mutu. Jeji jinakalege ja Arawu vamohi na ahimaye. 28Ana Izarayeli kavelelaga mikuto da murendele wa Yehova, anerege avaha Arawu vamohi na ahimaye mirimani na mwendo mmohi wa nibila ira jikalege jewa. Neno nnakala nlamulo nohomala.
29<<Eto jowara jotchenihiwa ja mulombwana Arawu, musogolro jinahalege na ahimaye anazege mundulri mwaye. Ule unafunege hamba malro aye awarege afunaga mimineliwa makura otchenihana jengo no hambihiwa. 30Mwanaye unafuna kala namakuta vamalroni va Arawu awarege jowara jejo malambo matanu na menli ahanarome dowa mMusasani Ogumanamo ira alabe muwari mwa Nimburo Notchena.#29:30 Namakuta ahambihiwaga okana malambo matanu na menli ahanarome dowa mMusasani Ogumanamo ira alabe mwasiwa kali malambo ohambihiwa. Nione vs. 35-37.
31<<Utukule nibila neno nnapa we ulabagana mabasa omuhambihana mutu, upiye nimburo nili natene nagali notchena. 32Arawu na ahimaye kadje nyama ya nibila nne vamohi na pawu dedo dihanle mmutangani mule, kagali vamulangoni va Musasa Ogumanamo. 33Inafwanela aliwa kadje jengo jejo jivelenle atu ira kamalihena jotakala muwari mohambihiwa wewa no tchenihiwa wewa. Anamakuta bahi barumelihiwe ira kadjege jodja jejo, mbwenye atu a burebure kidje mwasiwa ti jodja jotchena. 34Aliwa kadjaga, kahiya nyama ya nibila neno nnapa we ulabagana mabasa omuhambihana mutu, nari kahiya pawu fiyeda mmetcheloni muwa, yodja yenno utumeye na munlo. Kinafwanela djiwa mwasiwa tchi yodja yotchena. 35Ayo ba makalelo anafuna we ahambiha Arawu na ahimaye. Uirena jatene jene juurumile miyo. Muwari moahambiha mule, uirena jatene eji malambo matanu na menli oharanene.
36<<Kada siku uvelelege mwana ng'ombe imohi ya mulombwana yenno inafuna kala mukuto okurumuwela jotega ira jotakala jenyu jiwande malihiwa. Utchenihege ibuwa muwari movelela mukuto okurumuwela jotega ira jotakala ja ibuwele jiwande malihiwa. Amala uhele makura ibuwele ira ikale yotchena. 37Muwari mwa malambo matanu na menli uiregena eno, uvelelege mukuto omalihana jotakala ja ibuwele, uitchenihege ira ikale yotchenetchetcha. Yengo ili yatene inasakwinye ibuwele inerege tchenihiwa.
38<<Malambo matene dowagave sogolro, uvelelege vaibuwani ana mabila menli okana yaka imohi. 39Mwana nibila nimohi uvelelege mabebehini, nimohi niwa uvelelege nzuwa naviraga. 40Wavelelaga mwana nibila nimohi noroma nne, utukule kilu imohi ya utu wa tirigu otchileya pama na lituru nimohi na azeti wapama, ukande vamohi amala uvelele vamohi na nibila nne. Eto ukutulelege vazulu va ibuwa ya mukuto vale lituru nimohi na vinyu ira vinyu ule akale yovelela ya jong'wa. 41Eto nzuwa naviraga wirena yengo imohive nnga werilena we mabebehini. Uvelele mwana nibila nimohi, yovelela ya jodja na yovelela ya jong'wa ira akale mukuto onukela pama, ikale yovelela yotumeya wa Yehova.
42<<Mukuto otumeya uyo, munavelelege vamentoni va Yehova va mulango ovolowela wa Musasa Ogumanamo malambo matene, roma nyo vamohi na ahiminyu atene anabaliwelegemo musogolro. Miyo nnerege gumana vevo na atwaga ira diwongege na weyo. 43Evale pinafunege miyo gumana na Ana Izarayeli eto undimuwa waga unerege tcheniha nimburo nenne.#29:43 undimuwa waga unerege tcheniha nimburo nenne. MaBibiliya amohiwa anawonga ira: undimuwa waga unoza waatchenihe aliwa. 44Miyo nnoza ditchenihe Musasa Ogumanamo vamohi na ibuwa ya mukuto. Eto nnoza dimutchenihe mulombwana Arawu vamohi na ahimaye ira kalabege mabasaga a unamakuta. 45Eto nnoza dikalege vari va Ana Izarayeli eto nnokala Mulugu wewa. 46Daira eno anoiziwa ira miyo dili Yehova Mulugu, wenno waakumihile ilambo ya Ijipitu ante dazana ilambo ili atu ila. Miyo dili Yehova, Mulugu wewa.>>
Currently Selected:
Ezodu 29: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
