Ezodu 26
26
Makalelo a jokunelana nnayi ja Musasa wa Yehova
1Yehova ohomuwandelagave mulombwana Mozeji ira: <<Usakanye Musasa wa Yehova na nguwo kumi dogumanihiwa, dosakanyiwa na usalru wapama. Nguwo dile dikale dolrembeya lrembeya na usalru wa kore ya matamba, usalru wa kore ya musuzu wa bwanda, na usalru ofila. Aalifiyati owanda pama kasone vanguwoni vale jofwalrafwaniha ja akerubi. 2Lapa wa kada nguwo ukalege mameturu 12 na meya. Rambalala uwa ukalege meturu imohi na masentimeturu 80. Eto nguwo da kumi dene, ulukula uwa ukalege umohive. 3Nguwo tanu disoniwe vamohive, nguwo dimohi diwa tanu eto disoniwe vamohive. 4Mmagomelo molapela mwa kada nguwo dogumanihiwa dile, usonelemo mingohi dosakanyediwa na nguwo ya matamba. Mingohi dile, dikale dokwiva eto disoniwe nnga makando. 5Nguwo imohi, usonemo makando 50. Eto nguwo imohiwa, usonemo makando 50. Makando ale kaing'ananege, nikando na nikando nfwaye na nguwo imohiwa ile. 6Eto wamala eno, usakanye jogumanihana 50 ja oru ira ugumanihena nguwo dile. Ugumanihe jatene jejo ira yokunelana yoroma ya Musasa wa Yehova ikale nguwo imohive na nguwo imohiwa ile.>>
7<<Eto usakanye yokunelana yanembinli na nguwo dimohi diwa kumi na imohi da mawoya a mbuzi ira dikunelege yokunelana yoroma ya Musasa wa Yehova. 8Lapa wa kada nguwo ukalege mameturu 13 na masentimeturu 30. Rambalala uwa ukalege meturu imohi na masentimeturu 80. Nguwo datene kumi na imohi ulukula uwa ukalege umohive. 9Nguwo tanu disoniwe vamohive eto nguwo dimohi diwa tanu na imohi disoniwe vamohive. Ile inakayena tanu na imohi uvinde vinagomela atu sogolro wa musasa. 10Mmagomelo molapela mwa nguwo imohi, usonemo makando 50. Eto mmagomelo molapela mwa nguwo imohiwele, usonemo makando 50. 11Eto usakanye jogumanihana 50 ja mukuwa, ugumanihena makando ale ira ikale nguwo imohive. 12Nguwo inafuna lapa kwaranya yokunelana yoroma ile, pandi yolapa ile idowe yakale mundulri mwa musasa ule. 13Eto nguwo inafuna rambalala kwaranya yokunelana yoroma ile ukwaranyihe mmambalo mwa musasa watene, masentimeturu 40 wu na masentimeturu 40 wu. 14Eto usakanye yokunelana imohiwa ya matembe a mabila okulruziwa eto kagali ofilihiwa. Eto unde uwa usakanyelewo yokunelana ya matembe ojajala.>>#26:14 matembe ojajala nari matembe a anavinyama a mwiko.
Matabwa oimelihana Musasa wa Yehova
15<<Usakanye matabwa a mukexa ira uimelihena musasa ule. 16Kada tabwa, lapa uwa ukalege mameturu mannayi na masentimeturu 45 eto rambalala uwa ukalege masentimeturu 66. 17Kada tabwa nikayegena joira ndjo mbinli pandi ya vati, joing'ana umohive. Matabwa matene a musasole usakanye na makalelo amohive anno. 18Usakanyede matabwa 20 ira kaimetchiwe pandi ya suli wa musasa.#26:18 suli: Mutu aimela againg'anile mavirelo wa nzuwa, pandi ya suli ku muwononi waye oromana. 19Eto usakanye matiwa 40 a parata, ira kada tabwa vati viwa, vikalege matiwa menli. Matiwa ale usakanyede na makalelo ira joira ndjo ja matabwa jile jivolowege mmatiwani mule. 20Eto usakanyede matabwa 20 ira kaimetchiwe pandi ya norti wa musasa,#26:20 norti: Mutu aimela againg'anile mavirelo wa nzuwa, pandi ya norti ku muwononi waye odjana. 21na matiwa 40 a parata, ira kada tabwa vati viwa, vikalege matiwa menli. 22Eto usakanyede matabwa matanu na nimohi ira kaimetchiwe unduli wa musasa wewo unadowa nzuwa. 23Eto usakanye matabwa mamohiwa menli ira kada mwendo wa unduli wa Musasa wa Yehova, kaimetchiwegewo matabwa menli otandanyedeya. 24Kada mwendo vikalege matabwa menli otandanyedeya. Matabwa menli otandanyedeya ale kamangiheye va aneli wa vazulu, mbwenye vati kimangiheye. 25Gumaniha matabwa matene anafuna tandiwa unduli wa musasa, kakale matabwa matanu na mararu vamohi na matiwa a parata 16 vati viwa.
26<<Useme mawongolo matanu a matabwa a mukexa ira kahidedege matabwa a ikukuru ya suli ya musasa, 27eto mawongolo mamohiwa matanu ira kahidedege matabwa a ikukuru ya norti ya musasa, eto amohiwa matanu ira kahidedege matabwa a ikukuru ya unduli, wewo unadowa nzuwa. 28Niwongolo na vari nivire vari va matabwa eto nikume magomo a wu fiyeda magomo a wu. 29Matabwa matene ukunele na oru. Eto utukule oru, usakanyede maaneli malukulu, amala ukomele va matabwani ira kavolotchihemo mawongolo olimbiha matabwa ale. Mawongolo ale ukunele na oru. 30Wamala sakanya jatene, unoimetcha Musasa wa Yehova molingana na makalelo duonihile miyo mwangoni uno.
Kurtina yogawa Nimburo Notchena na Nimburo Notchenetchetcha
31<<Utukule nguwo yosakanyiwa na usalru wapama usakanyena kurtina yogawa Nimburo Notchena na Nimburo Notchenetchetcha. Kurtina ile ikale yolrembeya lrembeya na usalru wa kore ya matamba, usalru wa kore ya musuzu wa bwanda, na usalru ofila. Aalifiyati owanda sona pama kasone vanguwoni vale jofwalrafwaniha ja akerubi. 32Ira uwande kokihavo kurtina ile, usakanye mambozo mannayi a mutengo wa mukexa, umale akunela na oru. Mambozo ale ukomelemo jokokihana josakanyiwa na oru. Eto mambozo ale kagarati mmatiwani mannayi a parata. 33Evale wagaimetchile mambozo ale, utukule kurtinele, udowe wakokihe na jokokihana jile. Kurtinele inokala madilre ogawa Nimburo Notchena na Nimburo Notchenetchetcha. Eto utukule Kaxa ya Umboni uhele Nimburo Notchenetchetcha nne. 34Wamala uhele Tampa Yosembeselrana vazulu va Kaxa ya Umboni muwari mwa Nimburo Notchenetchetcha.
35<<Eto meza yohelavo pawu, uhele Nimburo Notchena ikukuru ya norti wa musasa. Amala utukule yogoromeyavo panti, uhele ikukuru ya suli. 36Eto utukule nguwo yosakanyiwa na usalru wapama, usakanye kurtina ya vamulangoni va musasa. Kurtina ile ikale yolrembeya lrembeya na usalru wa kore ya matamba, usalru wa kore ya musuzu wa bwanda, na usalru ofila. 37Usakanye eto mambozo matanu a mutengo wa mukexa, umale akunela na oru. Mambozo ale kakayena jokokihana josakanyiwa na oru ira jihidede kurtina ile. Eto mambozo ale kakayena matiwa matanu osakanyediwa na mukuwa onyungulrutchiwa.>>
Currently Selected:
Ezodu 26: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
